¹ ¿Tta̧'a̧nö̧ pä'ö o'cajuiyönä ju̧ru̧hua̧mä̧ suronä̧ jȩpä̧tö̧rö̧ ro̧ȩpä̧cuȩ mo̧ro̧mä̧ pä'ö ku̧nä̧cö̧? ¿Tta̧'a̧nö̧ pä'ö jitömä Dios päöta'anö̧ jȩpä̧tö̧mä̧ ro̧ȩpä̧cuȩ mo̧ro̧ rȩbȩhua̧'a̧mä̧ topocotöttö? ² Ttö̧ja̧ suropätömä rȩjȩ 'to'opö ku̧nä̧huä̧ pporädö icuätö'i̧nä̧; ttö̧ja̧ suropätömä ka̧cuä̧tö̧ ovejastö̧rö̧ ttujurucu nä̧u̧cu̧ ttä̧ji̧mö̧ ttucuä'cua ka̧'a̧cu̧ ku̧nä̧tö̧'i̧nä̧. ³ Jahuätömä buroba̧tö̧ ttä̧'o̧tö̧ to'ätörö nä̧u̧cuä̧rä̧tö̧; jahuätömä recuä käji päcäyärö'i̧nä̧ nä̧u̧cuä̧tö̧ ttö'ärohuäji pärätä ppa̧ja̧da̧tö̧ pä'ö. ⁴ Jahuätömä rä'epö icuätö mänättö̧mä̧ jäyäcu usurä isotörömä; ttö̧ja̧ usurä isotömä jähuätöttömä tta̧mö̧nä̧ pa̧ja̧tö̧ jitötätä dajahuächätö. ⁵ Topittö, pitö ttö̧ja̧mä̧ usurä isotömä ttaditähuättö räopätö de'a jui̧yä̧jä̧ttö̧ bö̧rö̧ba̧tö̧ jä̧'i̧nö̧'a̧nö̧, adiu ttö̧'ȩpä̧rö̧nö̧ ttu̧cuȩ usumä̧; arabias ttö̧ja̧ ttu̧cuä̧ ttiyö'anö̧cö̧ tti̧tti̧mö̧rö̧mä̧. ⁶ Ttö̧ja̧ usurä isotömä̧ yodo rä'opö ca̧ca̧tä̧tö̧ korotö tti'ättiyuttö, juätömä̧ korotö suropätö ttö̧ja̧ tu̧ju̧nä̧huä̧ttö̧tä̧ uvas ocha ca̧ca̧tä̧tö̧. ⁷ Juätömä̧ yodo 'cuäo'önä ttö̧'ca̧tä̧huä̧ta̧'i̧nä̧ jui'ätötä ä'ecuätö; juätömä̧ diyau ttottecua̧ pä'ö'i̧nä̧ jui'ätö. ⁸ Jahuätömä mö̧ä̧'ca ajiya ichomȩnä̧ a̧cuä̧bȩ'ä̧u̧; juätömä̧ i̧nä̧yu ri̧ä̧yu ppeyänä̧ ä'ecuätö jua'amä̧ ttödajuächome'i̧nä̧ juitta'attö. ⁹ Ttö̧ja̧ suropätö'i̧nä̧ ka̧cuä̧tö̧ tta̧ju̧ katatettö reyotörö 'cä̧'ȩpö̧ icuätö, ja̧'hua̧ta̧'a̧nö̧ ttö̧ja̧ suropätö ka̧cuä̧tö̧ ppo̧'ä̧tö̧rö̧ ȩmi̧pä̧tö̧ usurä isotö ttö'ärohuäji ppa̧ttä̧dä̧cua̧'a̧nö̧. ¹⁰ Ja̧'hua̧nö̧ ja̧'a̧nä̧ ttö̧ja̧ usurä isotömä̧, ttö̧'ca̧tä̧huä̧ti̧yu̧mä̧ jui'ätötä cue'ächätö; ppäittö cuettächa'anä̧, juätömä̧ korotö ttu̧cuä̧ ote isä'cuatä ju'cohuätö. ¹¹ Tto̧ja̧ usurä isotö merätö a̧dȩ suronä jȩpa̧tö̧ ttojusode jacuättö; jahuätömä 'cuȩ'cuä̧tö̧ uva isoya suronä jȩpä̧tö̧ ttiärenä, ja̧'hua̧nä̧ ja̧'a̧nä̧ jahuatötä surähuätö ttacua a̧di̧ri̧jä̧u̧. ¹² Ttö̧ja̧mä̧ ttötähuiyättö'inä cuopätö; barahuä̧u̧ ajau, ja̧'hua̧nö̧ ja̧'a̧nä̧ Diosmä jättepumä ä̧cuo̧cö̧. ¹³ Jahuätö suronä jȩpä̧'chä̧tö̧mä̧ yotucunämä kö'cocotö tȩä̧u̧mä̧; jahuätömä ttu̧mä̧nä̧'i̧nä̧ jerupätö; ja̧'hua̧ta̧nö̧ jahuätömä juä̧mä̧tä̧'i̧nä̧ kä̧mä̧do̧co̧tö̧. ¹⁴ Mo̧ro̧ juoäcua'a a'canä porächö ä̧rä̧mö̧ usurä isotörö recuä rö̧jä̧u̧ru̧ cuä'ö icuähuä i̧sa̧mä̧; yodomä ja̧u̧mä̧ nä̧u̧cuä̧rä̧cuä̧cua̧ i̧sa̧ 'cua̧rö̧nä̧ cua̧. ¹⁵ Ja̧'hua̧nö̧ ja̧'a̧nä̧'i̧nä̧, ttirecua pocojuru jȩä̧cuä̧huä̧ tta̧huä̧ra̧'a̧ nipä̧ro̧mȩ juoöta'anö; ja̧u̧ pä'ö: Ya̧tȩ'i̧nä̧ topocö jä̧cua̧. Ja̧u̧mä̧ ka̧ra̧nä̧ a̧'a̧hui̧'ö̧tä̧ jȩpä̧'chö̧. ¹⁶ Yo̧u̧nu̧nä̧tä̧ ko̧cuä̧tö̧ suronä jȩpä̧tö̧mä̧ isodenä ko̧cu̧ ttö̧nä̧u̧cua̧ pä'ö; jahuätömä mu'ȩcui̧'ö̧tä̧ pȩjä̧tö̧ mo̧ro̧mä̧; ja'huätörömä micuähuyoca'a tȩa̧u̧mä̧. ¹⁷ Ja'huätö ä'catoi'önärö̧mä, 'quiyö yodomä mo̧ro̧ ja̧'i̧nö̧'a̧nö̧ jä̧u̧; Ja'huätömä suronä jȩä̧cuä̧hua̧ ahuaruhuätä huotö yo̧ö̧ yodomä ¹⁸ Ja'huätömä o'capäi'önätä 'coru juo'ächätö, ja̧'hua̧nö̧ ja̧'a̧nä̧, ajiya huä̧menä tteyuoppa rä̧'i̧nö̧'a̧nö̧ to'epächätö; tti̧rȩjä̧ ttö̧jo̧mȩ'i̧nä̧ suroja pä'ö pähua'atä ja̧'a̧; ya̧tȩ'i̧nä̧ aditöjui̧yä̧cua̧ ja'huätö tti'ätta uva pättanämä. ¹⁹ Duhuomenä aje diyahuo'qui dä'ähuächa'a jä̧'i̧nö̧'a̧nö̧, ja̧'hua̧nö̧ ȩmi̧pa̧'a̧ hua'are rejumä suronä jȩpä̧'i̧jä̧tö̧rö̧mä̧. ²⁰ Uäbecuinäju̧'i̧nä̧ kö̧ni̧chi̧ä̧cua̧sä̧; idepämä a̧dö̧'cua̧rö̧nä̧ ttö̧cuä̧cua̧ mi̧yö̧tä̧, juo̧u̧mä̧ täcö ttamucuädi̧ya̧cua̧ juayabocumä; pa̧'a̧nö̧ jȩpu̧, siepu i̧cuä̧cua̧ surojömä daú siepu tticuaa ja̧i̧nö̧'a̧nö̧. ²¹ Suro̧pa̧mä̧ ki̧tti̧mu̧ toajurö ucuotocö ja̧'hua̧ta̧'a̧nö̧ juo̧u̧mä̧ adiunämä jȩpo̧cö̧ recuarömä. ²³ DIOS räepuicú ujurunätä̧ ttö̧ja̧ ttöruhuo kö̧nä̧ra̧tö̧rö̧'i̧nä̧; juo̧ú̧ amucuädiomenämä tta̧'cua̧ri̧a̧mä̧ päocö. ²² DIOSTÄ tta̧'cua̧ ttȩmu̧nä̧ jȩä̧u̧, ja̧'hua̧nö̧ ja̧'a̧ttö̧ jähuätömä tta̧'cua̧ a̧di̧huä̧u̧, ja̧'hua̧nö̧ ja̧'a̧nä̧ jȩttö̧mä̧ to̧ä̧rä̧u̧. ²⁴ Pitö ja̧'a̧ ucuo ttȩttä̧huä̧u̧mä̧; ji̧nä̧, a̧'u̧cu̧nä̧tä̧ mo̧ro̧ ja̧'a̧nä̧, jahuätömä tti̧huä̧cuo̧tö̧, isopäi'önä̧tä̧ jahuätömä rȩjȩtä̧ ki'epö icuähuäcuotö; jahuätömä korotö o'catoi'önä̧cu̧ ji̧nä̧ yo̧mȩtȩ pätti'äcuotö; jahuätömä 'cui'opö icuähuäcuotö u̧huä̧ju̧ ote 'chu̧huä̧ro̧mȩ 'cui'opö tticua'a jä̧'i̧nö̧'a̧nö̧. ²⁵ Ja̧'hua̧nö̧ jo̧ca̧'a̧ jö̧ttö̧mä̧, ¿Ditä ja̧'a̧ttö̧ ttömä isopäi'önä ya̧pa̧rȩhua̧ chaja pä'ö ka̧cuä̧mö̧ toö'anö hua̧mä̧? ¿Di ja̧'a̧ttö̧ ttö chucuocumä micuähuocö pä'ö ka̧cuä̧mö̧ toö'anö hua̧mä̧?