¹ Ja̧'hua̧nö̧ ja̧'a̧ Jobmä TÖ̧Ä̧NÄ̧HUA̧RÖ̧ ädätömä pä'inö: ² ucumä o'cajuiyönä jȩ'cu̧'a̧nö̧ hua̧jä̧ pä'ömä huo̧jua̧sä̧, yorö'iso ji̧yȩtȩ pätetö ku̧ju̧ni̧nö̧mä̧ ttoecuoca'a jä̧cua̧'a̧. ³ ¿Dijä̧ttö̧ a̧mö̧cuädö jui̧'a̧ i̧rȩbȩhua̧ päinö daju icu'anö̧ hua̧? ja̧'hua̧nö̧ ja̧'a̧ ttömä chu̧huo̧i̧jui̧po̧cö̧tä̧ ucuocuinö̧sä̧, chu̧huo̧jui̧pa̧ pä'ömä̧ juruhuötä, ja̧u̧mä̧ ttömä chieruhuinö ja̧'a̧. ⁴ Ucumä̧ ttörö pä'äjijä: Jitämä ä̧ju̧cui̧, Ttösä ucuocumä; ji̧yȩtȩ jä̧dȩpä̧cua̧jä̧ jädepömä jicuähuattöjä. ⁵ Ttömä ucurumä ä̧ju̧cu̧tä̧ chä̧ju̧cui̧nä̧cu̧jä̧, ja̧'hua̧nö̧ ja̧'a̧nä̧ jitämä tochäcujä̧. ⁶ Ja̧'hua̧nö̧ ja̧'a̧ttö̧ chuju'cococujä; i̧sa̧ppȩnä̧'i̧nä̧, a̧ya̧ri̧sanä'i̧nä̧ pä̧mä̧dö̧ ppa̧'a̧dä̧cuä̧u̧ a̧mö̧cuädösä. ⁷ 'cuäopina'a Job-rö pi̧yȩ huȩnȩ päji o'ca'a, TÖ̧Ä̧NÄ̧HUA̧ pä'inö Elifaz tema ttö̧ja̧sa̧rö̧: "Ucuru rö̧ä̧nä̧ chamisuräcusä ja̧'hua̧ta̧'a̧nö̧ cuahuaruhuä ta̧ju̧ru̧'i̧nä̧, ja'huätömä TÖ chötö'cö jueönämä ucuocuocotö, TTÖ chu̧mu̧huä̧yä̧ Job jȩä̧'i̧'a̧nö̧mä̧. ⁸ Ja̧'hua̧nö̧ ja̧'a̧ttö̧ jitämä, ucututä i'chächätucui ji̧mu̧tȩ ta'are huotö to̧ro̧tö̧rö̧ ja̧'hua̧ta̧'a̧nö̧ pä̧ca̧yö̧rö̧'i̧nä̧, chu̧mu̧huä̧ya̧ Job öja'acu tätucui, ja̧'hua̧nö̧ 'chä̧nö̧ ucututä iyätucui 'cu'icu iyähuä. Chu̧mu̧huä̧yä̧ Job-tä ucutunä pätetö u̧cuo̧cuä̧cua̧, ja̧'hua̧nö̧ jo̧mȩnä̧tä̧ chȩsȩtä̧cua̧sä̧ jäepömä, ja̧'hua̧nö̧ jo̧mȩnä̧tä̧ suronä jȩchö̧ juiyäcua'anö ucutu suronä jȩcu̧'ä̧tu̧cua̧'a̧nä̧. Ucutumä jueönä ji'ähuocotöjä ttö chöttö'cömä, TTÖ chu̧mu̧huä̧yä̧ Job jȩä̧'i̧'a̧nö̧mä̧." ⁹ Ja̧'hua̧nö̧ ja̧'a̧ttö̧ Elifaz tema ttö̧ja̧sa̧, Bildad suh ttö̧ja̧sa̧ ja̧'hua̧ta̧'a̧nö̧ Zofar naama tta̧ja̧sa̧'i̧nä̧ 'chä̧nä̧ jȩpi̧nä̧tö̧ TÖ̧Ä̧NÄ̧HUA̧ hueäji ta'anö, ja̧'hua̧nö̧ jo̧mȩnä̧tä̧ TÖ̧Ä̧NÄ̧HUA̧MÄ̧ esetinö Job-römä. ¹⁰ Job ahuäruhuärö amucuädö ucuocu jä'epomenä, Ö̧Ä̧NÄ̧HUA̧ ppädinäcu̧ pä'äji u̧ju̧nä̧ri̧nomettö'inä abonänö u̧ju̧nä̧rö̧nä̧ iyö. ¹¹ Ja̧'hua̧nö̧ ja̧'a̧ttö̧ Job i̧jä̧hua̧tö̧ u̧mä̧tö̧ nä̧tö̧ ja̧'hua̧ta̧nö̧ ja̧u̧ru̧ huo̧ji̧nä̧tö̧'i̧nä̧ 'chi̧nä̧tö̧ ja̧u̧ ö̧jo̧mȩcu̧ ja̧u̧tä̧ ojusodettö cuinä̧ttö̧. Jahuätömä TÖ̧Ä̧NÄ̧HUA̧ ja̧u̧ru̧ usurä ȩmä̧u̧nä̧ jȩä̧ji̧ amucuädö re'topinätö̧. Ya̧cu̧pö̧nä̧ Job-römä iyinätö̧ plata ttö'inä ji̧'qui̧cha̧nö̧ ja̧'hgu̧a̧ta̧'a̧nö̧ oro o̧bu̧'i̧nä̧. ¹² Röji ja̧'a̧cu̧ TÖ̧Ä̧NÄ̧HUA̧MÄ̧ ppa'adinö Job a̧'cua̧rö̧mä̧ ä̧cuo̧mȩnä̧ ji̧nä̧mȩttö̧'i̧nä̧ abonänö; Ohueja̧tö̧rö̧mä̧ ku̧nä̧ri̧nö̧ catorce milnö jo̧mȩnä̧, seis milnö ca̧mȩyu̧tu̧, milnö pä̧cä̧yö̧rö̧, ja̧'hua̧ta̧'a̧nö̧ milnö bö̧rö̧tö̧rö̧. ¹³ Ja̧'hua̧ta̧'a̧nö̧ ku̧nä̧ri̧nä̧ ji̧mu̧tȩ ta'arenö i̧tti̧mö̧ u̧mä̧tö̧rö̧ ja̧'hua̧ta̧'a̧nö̧ huämetucuä i̧tti̧mö̧ nä̧tö̧rö̧. ¹⁴ Ä̧cuo̧mȩnö̧ ittijuru o'inö Jeminä, ja̧u̧nu̧ ö'ca'a ittijuruCesia, ja̧'hua̧ta̧'a̧nö̧ röjinä ittijuru Keren Hapuc. ¹⁵ Pi̧jä̧ o'cajuiyönä po̧cui̧pä̧cuä̧hui̧'o̧ca̧'a̧ ji̧na̧'a̧ nä̧tö̧ adihuätörö Job i̧tti̧mö̧'a̧nö̧. Ttä'omä ujunärö iyipinäu̧ ttu̧bu̧o̧tö̧rö̧ iyöta'anö. ¹⁶ Ja̧'ha̧nö̧ 'cuä̧o̧pi̧nö̧ o'ca'a, Job-mä ki̧nö̧ 140 a̧'ȩ jo̧mȩnä̧; topinö i̧tti̧mö̧rö̧ ja̧'hua̧ta̧'a̧nö̧ i̧tti̧mö̧ tti̧tti̧mö̧rö̧'i̧nä̧, pa̧ja̧cuä̧nö̧ yottähuächinome jubu. ¹⁷ Ja̧'hua̧nö̧ ö̧jä̧'i̧jö̧ o'ca'a Job-mä 'corupä'i'inö, juiyo bu̧o̧sa̧ juo'ächötä.