¹ Ovejastö̧ u̧mä̧tö̧rö̧ hue'inö̧sä̧ ruhuotö de'a jui̧yä̧jä̧ttö̧ Sela rȩjȩnä̧ttö̧, Sión mö̧ä̧'canä̧ kä̧tö̧rö̧. ² Ppi̧yu̧ co̧'ä̧rä̧tö̧ ka̧cuä̧tö̧ jä̧'i̧nö̧'a̧nö̧, ttä̧'ti̧yu̧ pperecuächa'a jä̧'i̧nö̧'a̧nö̧, ja̧'hua̧nö̧tä̧ huotö Moab rȩjȩttö̧ nä̧tö̧ Arnón aje ttöjähua pä'ö kä̧cuä̧tö̧mä̧. ³ Huo̧juȩtä̧cuä̧huä̧ iyitö, adihuomenä jȩä̧cuä̧huä̧tä̧ jȩpi̧; a̧'u̧cu̧nä̧tä̧ yo̧'cu̧ jö̧nä̧ jȩpi̧ mo̧ro̧ kä'co päia'a jä̧'i̧nö̧'a̧nö̧; dö'ecuächäjätörömä dajö icuitö; jȩchä̧cua̧sä̧ päcua'acunä jȩpi̧tö̧. ⁴ Ucututäcu ttö̧ja̧cua̧'a̧nä̧ ja̧'a̧tä̧ topitö, Moab rȩjȩttö̧ dö'ecuächinä̧tö̧rö̧mä̧; si'epö icuähuä i̧sa̧ttö̧ jahuätö dajahuächö ttö̧ja̧cuo̧mȩ jö̧nä̧tä̧." ja̧'hua̧nö̧ jo̧mȩnä̧ suronä jȩttö̧mä̧ yabonömä̧ jȩpo̧co̧tö̧ ttäcuotö ja̧'hua̧ta̧'a̧nö̧ si'epö icuähuämä̧ beipächäcua'a, jitö 'cuȩ'cuä̧tö̧mä̧ rȩjȩttö̧mä̧ tottepächäcuotö. ⁵ Ruhuo hueähuämä rötähui'äcua'a a̧'cua̧ huȩnä̧rö̧ esecuinö̧nä̧tä̧; David ojusodettö ya̧tȩ a̧'cua̧ huȩnä̧rö̧tä̧ ju̧huȩnȩ ö̧'ä̧mä̧dä̧cua̧mä̧. Ja̧u̧mä̧ ji̧nä̧ adihuäjueinä̧ kä̧nö̧mä̧ adihuomenä̧tä̧ jȩä̧cua̧ ja̧'hua̧ta̧'a̧nö̧ jueönä jo̧mȩnä̧tä̧. ⁶ Ujutumä Moab ttö̧ja̧ ucuo tettäumä ä̧ju̧cui̧nä̧tö̧jä̧, ttucuotocö'i̧nä̧, pä̧huä̧rö̧ja̧'a̧cu̧ jȩttö̧'i̧nä̧, ja̧'hua̧ta̧'a̧nö̧ ttamisuru'i̧nä̧. Ja̧'hua̧nö̧ ja̧'a̧nä̧ jahuätö ttucuocumä micuähuocö ja̧'a̧. ⁷ Ja̧'hua̧nö̧ ja̧'a̧ttö̧ Moab ttö̧ja̧mä̧ pä̧i̧cu̧nä̧ ajahuätö jitötätä, ¡o'catoi'önä̧ pä̧i̧cu̧nä̧ ajahuätö! Cua̧'cua̧ tta̧'ȩcuä̧tu̧cui̧, ucutumä jo̧mȩnö̧tä̧ si'epö icuähuotö jö̧nö̧tä̧ huotöjä̧, Kir Hareset ötahuiyä ttö̧ja̧ ttu̧cuä̧ uvattö adicuä ja̧'a̧nö̧. ⁸ Hesbón u̧cuä̧ cuähuämä joächächäja'a, Sibma u̧cuä̧ uva jä̧ji̧ta̧'a̧nö̧. Ko̧ro̧jä̧ttö̧ ruhuotömä uva rö̧ä̧nä̧ Jaser jubö ka̧cu̧ juhua'a yabo de'a jui̧yä̧jä̧nä̧ yoähuächinö'i̧nä̧ si'epö icuäjätö. Bahuipömä o'cajuiyönä̧tä̧ yoähuächömä, aje dä'ähuotocu rȩbȩhui̧'ä̧ja̧'a̧. ⁹ Isopäi'önä̧tä̧, ttömä Jazercu yo̧mȩtȩnä̧ cha̧ja̧huä̧cua̧sä̧ Sibma u̧cuä̧ uva a̧mö̧cuädö. Ttömä chi̧'chȩrejanä ucuturumä chi̧yȩpä̧cua̧sä̧, Hesbón ötahuiyä ttö̧ja̧rö̧'i̧nä̧ ja̧'hua̧ta̧'a̧nö̧ Eleale ötahuiyä ttö̧ja̧rö̧'i̧nä̧. Ja̧'hua̧nö̧ ja̧'a̧, Du'onä cu̧cuä̧tu̧cu̧ cuähuä ka̧cu̧nä̧mä̧ ja̧'hua̧ta̧'a̧nö̧ ca̧ca̧tö̧ eseu huo'cuätucu juiyönä jȩchä̧jä̧u̧juä̧. ¹⁰ Eseäcuähuämä ttu̧cuä̧ cuähuätä 'choipinä̧u̧; ja̧'hua̧nö̧ jo̧mȩttö̧ ra̧huä̧huä̧'i̧nä̧, huoäcuä'i̧nä̧ juiya'a uva ka̧cuo̧mȩttö̧mä̧. Ya̧tȩ'i̧nä̧ vino isa päi'önä̧mä̧ 'cuȩ'cuo̧cö̧, ja̧'hua̧nö̧ ja̧'a̧ ttömä 'cuȩ'cuä̧tö̧ huottäjimä ju̧huȩnȩ jubötä beipächö jȩpä̧ji̧sä̧. ¹¹ Ja̧'hua̧nö̧ ja̧'a̧ttö̧, cha̧mi̧so'quimä arpa jä̧'i̧ja̧'a̧nö̧ juäa'a Moab ttö̧ja̧rö̧ ja'ute'ö ja̧'hua̧ta̧'a̧nö̧ ttö cha̧'cua̧rö̧ jacuänämä Kir Hareset ttö̧ja̧rö̧ ja'ute'ö a̧'cua̧ tta̧huȩcua̧'a̧. ¹² Moab ttö̧ja̧ ju'to jo̧mȩttö̧ ucuo tettähuinömä ja̧'hua̧ta̧'a̧nö̧ ttö̧ä̧nä̧hua̧ ö̧jo̧dettö ttö̧ä̧nä̧hua̧rö̧ ttucuocuinö̧mä̧ yörö'iso isojuoca'a jä̧cua̧'a̧. ¹³ Pi̧yȩ huȩnȩ ja̧'a̧ TÖ̧Ä̧NÄ̧HUA̧ Moab ttö̧ja̧rö̧ 'cuä̧o̧pä̧cuȩ ä'canä ucuocuinö̧mä̧. ¹⁴ Pä'äjita'anö TÖ̧Ä̧NÄ̧HUA̧MÄ̧ ucuocu: Huäbodäcuä a̧'ȩtä̧ o'ca'a Moab ttö̧ja̧ ucuo tettäumä toepächäcua'a; jahuätömä recuätö ji̧na̧'a̧nä̧, ka̧cui̧pi̧nä̧tö̧mä̧ a̧'u̧cu̧nä̧tä̧ huotö ja̧'a̧ micuähuocotö jö̧nä̧tä̧.