¹ Amóz i̧tti̧ Isaías ya̧nä̧ jähuä i̧jȩcuä̧cha̧'a̧ topinödo, Jerusalénttö'inä, Judáttö'inä 'cuäopö, Judá rȩjȩttö̧ ruhuonä huettinö mo̧ro̧, Uzías'inä, Jotam'inä, Acaz'inä, Ezequías'inä. ² Mo̧ro̧ji̧yä̧ ä̧ju̧cui̧, ucu'inä äjucui rȩjȩ; tu̧ru̧hua̧ pa'anö ucuocua'amä: Chi̧tti̧mö̧rö̧ cuä̧jȩpä̧rö̧ tä̧mö̧ pätti'önä pöttädäjisä, ja̧hua̧nö̧ ja̧hua̧nö̧ ja̧'a̧nä̧'i̧nä̧ ttörötä ra̧huä̧rä̧jä̧tö̧. ³ Päcäyämä u̧ru̧hua̧rö̧ huo̧jua̧, mörö ji̧'qui̧cha̧hua̧mä̧ uruhuotö u̧cuä̧ ttiyometä kö̧, ja̧hua̧nö̧ ja̧'a̧nä̧ Israel ttö̧ja̧mä̧ ttieruhuäcusä, chumuhuäyotö Israel ttö̧ja̧mä̧ huo̧juä̧chi̧'ä̧cuä̧huä̧ jui'ätö. ⁴ ¡Jati, tti̧rȩji̧yä̧ pö̧nä̧ ka̧cuä̧tö̧ttö̧ surojötä ku̧nä̧rä̧cuä̧huä̧ ttö̧ja̧hue, surojötä ahuaruhuä, nä̧u̧cuä̧rä̧cuä̧huä̧tä̧ i̧tti̧mö̧hue, ttu̧ru̧hua̧rö̧ jaropi'inä̧tö̧, Israel ttö̧ja̧ ttö̧ä̧nä̧hua̧ surojö jui̧'a̧ttö̧ ttöjö'cö juiyönä̧ jä̧u̧ 'quȩ'i̧pä̧chö̧ icuipinä̧tö̧hue. ⁵ ¿Tta̧'a̧nö̧ pä'ö ji̧nä̧ ro̧'ȩcuo̧tö̧tä̧ kä̧tö̧jä̧ttö̧?¿Tta̧'a̧nö̧ pä'ö juhua'a yabocutä rohuähuä'chätöjättö? U'isäyu o'ca juiyönä na̧huä̧chäyujä, a̧mi̧so'qui o'ca juiyönä juiyuhuo'quitä jo'qui. ⁶ Ö̧jä̧pö̧ttö̧ kä̧mä̧dö̧ u isäyu jobömä ji̧yȩtȩ'i̧nä̧ juiya'a ja̧u̧ttu̧ adihuä juäimä, ja̧hua̧nö̧ jo̧ca̧'a̧ öttahuiyä barau o̧ppä̧tä̧ rärea'a, ttötta jareönä totte'ätta a̧'cua̧rö̧nä̧, mö̧'ȩcuä̧chö̧'i̧nä̧ mö̧ȩcuä̧cho̧co̧ttatä, hua'ächö'inä huahuächocottatä, a̧dȩjanä 'ca̧'o̧pö̧i̧nä̧ adicui'ocottatä. ⁷ Cui̧rȩjä̧mä̧ jȩpö̧ i̧cuä̧jä̧tä̧ kä̧jä̧, cuiäre ötahuiyämä ocuränätä cuo'ö'icua pä'ötä jȩpö̧ ku̧nä̧hua̧'a̧tä̧ ka̧'a̧, cu̧cuä̧ cuähuä cu̧ju̧nä̧tu̧cuo̧mȩttö̧mä̧ kara'attö ichäcuähuotötä cuä'catucu jo̧mȩttö̧ jȩpö̧ icuätö- ja̧hua̧nö̧tä̧ korotötä jȩpö̧ tti̧cuä̧cuä̧jä̧tä̧ jä̧jä̧. ⁸ Jahuata'anö Sion ittijumä isode ojiyättö 'tö̧ä̧huode pätta kä'co kode jä̧'i̧nö̧'a̧nö̧tä̧ kä̧ju̧, jahuata'anö isode a̧'u̧cuode pepino pättanä kode jä̧'i̧nö̧'a̧nö̧'inä, juhua'a jö̧ ta̧'a̧nö̧tä̧ ötahuiyä'inä tto'epö icuähuometä kö̧nä̧. ⁹ O'ca juiyönä ru̧hua̧ Su̧ro̧da̧u̧ ttu̧ru̧hua̧ Dios a̧'u̧cu̧nä̧tä̧ huotörö u̧ju̧ni̧'o̧ca̧'a̧ ji̧nö̧ttö̧mä̧ Sodoma ttö̧ja̧cu̧, Gomorra ttö̧ja̧cu̧ totte'inö̧'a̧'a̧nö̧tä̧ to'e'ina̧ja̧tö̧jä̧ ujutu'inä. ¹⁰ Ä̧ju̧cuä̧tu̧cui̧ Sodoma ötahuiyättö hueähuä ttö̧ja̧, tu̧ru̧hua̧ Dios i̧huȩnȩ; ä̧ju̧cuä̧tu̧cui̧ Gomorra ötahuiyä ttö̧ja̧, tu̧ru̧hua̧ Diosttö hueähuä huȩnȩmä̧: ¹¹ "¿Tta̧'a̧nö̧ pä'ö ucutu recuätömä i̧sa̧rö̧ ku icu cuiyätucuäcusättö?" pä'ö tu̧ru̧hua̧mä̧. "Täcö 'cuä'ächächösä i̧sa̧rö̧ cuä'ö ku'icu iyähuättömä, de'a isotö bärepätö ttö̧a̧dȩttö̧'i̧nä̧, juhua'a jö̧ ta̧'a̧nö̧ pä̧cä̧yö̧ ttucuoja'i̧nä̧, o̧huȩja̧tö̧ ppo̧'ä̧tö̧ ttucuoja'i̧nä̧, cabrastö jö̧ttö̧'i̧nä̧ ttucuojamä, esehuocösä ttömä." ¹² Ttö chä'ca jo̧mȩ i̧jȩcu̧ cuichätucuomenä, ¿Di jä̧ttö̧ ucuturu jä'epinömä ttö chä'ca jo̧mȩ ucuotäcuähuä juiyönä cui̧jä̧dä̧tu̧cua̧ pä̧'ö?. ¹³ Cuiäretucu i̧sa̧rö̧ ku'icu iyähuä surojömä juhua'a yabonömä cui'cächätucuä; A̧mȩu̧ juäimä chöjö'cocötä ja̧'a̧ ttö̧mä̧, yodo kä̧hua̧ ja̧rȩpa̧ i'ärohuächomenä'inä̧, adicuocö mo̧ro̧ ji̧nä̧ yo̧mȩtȩ cu̧ca̧ca̧cuä̧rä̧tu̧cu̧'i̧nä̧, ja̧hua̧nö̧ ji̧nä̧ jiyo̧mȩtȩ ca̧ca̧cuä̧rö̧ jȩcu̧'ä̧tu̧cu̧mä̧ jua'a yabonö̧mä̧ cha̧mi̧'qui'ächi'cösä. ¹⁴ Kö'cocösä yodo kä̧hua̧ ja̧rȩpa̧rö eseu pä'cäri jȩcu̧'ä̧'chä̧tu̧cu̧'i̧nä̧; pätecuächö jö̧ a̧'u̧cuä̧ jȩcu̧'ä̧'chä̧tu̧cu̧mä̧; ja̧u̧ juäimä ämäca'a jä̧'i̧nö̧'a̧nö̧ jä̧cu̧sä̧ ttömä, juhua'a yabonö cha̧mi̧'qui'ächi'ö chö̧ja̧ pä̧'ö̧mä̧. ¹⁵ Ja̧hua̧nö̧ ja̧'a̧ttö̧ pa̧'a̧nö̧'i̧nä̧ jä̧cua̧'a̧ cu̧mö̧tu̧cu̧ te'ädö jäcuepätucuomenä, ttö chi'äriyämä dajö chi̧cuä̧cua̧sä̧ ucututtumä; adiunä pä'ä'chö kä̧nö̧ rö̧ä̧nä̧ jäcuepätucuttu'i̧nä̧, chä̧ju̧cui̧yä̧cua̧sä̧; cu̧mö̧pi̧yä̧tu̧cu̧nä̧mä̧ ttucuojatä rö̧ä̧nä̧ ka̧'a̧ttö̧. ¹⁶ Töcäu'icu, 'ca̧'ä̧u̧ icuätucui, ttö chä'ca jo̧mȩttö̧ surojömä, suronä jȩcu̧'ä̧'i̧jä̧tu̧cu̧mä̧ cä'ädi'ö icuipätucui. ¹⁷ Adiunä jȩcu̧'ä̧tu̧cua̧ pä'ötä huo̧juä̧chä̧tu̧cui̧, jueönä jȩä̧cuä̧huä̧tä̧ usätucui, suronä jȩcu̧'ä̧'i̧jä̧tu̧cu̧mä̧ jue'epäcuäu'icu, reyotörömä jueönä jȩpö̧ ppä'ädätucui, rȩcua̧mö̧rö̧'i̧nä̧ adiunä ttö̧jö̧nä̧ ppä'ädätucui. ¹⁸ ''Jitämä ichätucui, ji̧nä̧ yo̧mȩtȩ pä'i'ö ta̧mo̧cuädätucua, ''pä'ö tu̧ru̧hua̧mä̧; huä̧i̧nä̧ suronä jȩcu̧'ä̧ji̧tä̧tu̧cu̧mä̧ tuunä kä̧dȩpa̧'a̧ jä̧'i̧nö̧'a̧nö̧ ka̧'a̧nä̧, pi̧yȩmä̧ ajiya i̧sa̧ppä̧ adiunä tȩa̧ppä̧ jä̧'i̧nö̧'a̧nö̧tä̧ päi'äcua'a; ja̧u̧mä̧ ji̧nä̧ tuunä kä̧dȩpö̧nä̧ jä̧'i̧nö̧'a̧nö̧ ja̧'a̧nä̧, jahuata'anö pi̧yȩmä̧ ohueja i̧jȩta̧ttö̧ a̧di̧cuä̧ta̧ tȩä̧ta̧tä̧ päi'äcua'a. ¹⁹ Jahuata'anö ucuturu pä̧huä̧rö̧jö̧ttö̧mä̧, ucuotöi'nä cucuotätucuttumä, rȩjȩttö̧mä̧ adihuä juäi u̧huä̧ju̧tä̧ cucuäcuotöjä, ²⁰ ja̧hua̧nö̧ ja̧'a̧nä̧ cucuotätucuoca'a curohuähuätucuttumä, curodätä cuä'ö icuäcuotöjä, ja̧hua̧nö̧tä̧ pä'ö Dios ättämä. ²¹ ¡Ötahuiyä surojö juiyönä ki̧no̧mȩmä̧, yajute isaju kidepä micuänä iyä'chäju jä̧'i̧nö̧'a̧nö̧tä̧ päi'ina̧'a̧, jueönä jȩä̧cuä̧huä̧ttö̧tä̧ su̧'pȩnö̧ adihuinä̧ju̧mä̧, ja̧hua̧nö̧ ja̧'a̧ jitämä ttö̧ja̧rö̧ cuähuättötä su̧'pȩnö̧ huaju. ²² Kiäre pärätä ji̧nö̧mä̧ suräjuäitä päi'önä pärohuächinö, vino isoya ji̧no̧yamä, ajiyacutä huihuacuächinoya. ²³ Ku̧mu̧huäyotö jue'ipotö pinätö̧mä̧, pä̧i̧cuä̧tö̧tä̧, jahuata'anö nä̧u̧cuä̧rä̧tö̧rö̧ ppä̧dä̧rä̧cuä̧huä̧ ttö̧ja̧tä̧ pä'i'inä̧tö̧, ya̧cu̧nä̧mä̧ korotörö ppättäda'a jä̧'i̧nö̧'a̧nö̧ jȩpö̧, nä̧u̧cuä̧rä̧cuä̧huä̧tä̧ repe'ätö, ka̧ra̧rö̧ ppättädäjimä micuä iyatö pä'ötä ru̧'ä̧rȩ'ä̧tö̧. Jahuätömä reyotörö ppä'ädocotö, jahuätö ttä'cattömä jiyete'inä re topocotö rȩcua̧mö̧rö̧mä̧. ²⁴ Pi̧yȩtä̧ ja̧'a̧ ju̧huȩnȩ ya̧bo̧nä̧nö̧ su̧ro̧da̧u̧ ttu̧ru̧hua̧ Dios ucuocu u̧ju̧nä̧ji̧mä̧, Israelttö ju̧ru̧hua̧:''Jahuätöhue'' Ttötä micuä jȩchä̧cua̧sä̧ to'ijicu pä'ä'chätörömä, jahuata'anö ttötä ro̧dȩpä̧cua̧sä̧ chabo'iyotörö'i̧nä̧. ²⁵ Jahuata'anö chu̧mö̧ cä'epö chö̧ro̧huä̧huä̧cuasä̧ ucutucu, surojö cu̧ju̧nä̧rö̧ adiunä päi'önä töcö chi̧cuä̧cua̧sä̧, jahuata'anö surojö ucunä ka̧cu̧mä̧ ȩmö̧ chi̧cuä̧cua̧sä̧. ²⁶ Pä'äji ji̧nö̧ ta̧'a̧nö̧ ucuru to̧ä̧rä̧cuä̧huä̧ ttö̧ja̧rö̧ hue'ö chu̧ju̧nä̧cua̧sä̧, pä'äji ä̧cuo̧mȩnä̧ ji̧nö̧'a̧nö̧ ucuru huo̧juȩtä̧rö̧ kä̧nö̧ ppä̧'ä̧dä̧rä̧tö̧rö̧'i̧nä̧; pi̧yȩ o'comȩnä̧mä̧ ucumä adihuä ötahuiyä, 'quiyönä kö̧ ötahuiyä pättäcuomȩjä̧.'' ²⁷ Sionmä jueönä jȩä̧cuä̧huä̧nä̧tä̧ ppädäcuähuäcuome, jua'a'i̧nä̧ adiunä jȩä̧cuä̧huä̧nä̧ tti'ärohuächomenä̧tä̧. ²⁸ Ju̧huȩnȩ yabonö ucuotocotömä, jahuata'anö surojötä jȩpä̧tö̧mä̧ to'ädäji icuähuäcuotö, jahuata'anö ttu̧ru̧hua̧ Diosrö jaropi'inä̧tö̧mä̧ be'epäjipö icuähuäcuotö. ²⁹ Ja̧hua̧nö̧ ja̧'a̧ ucumä dä'ä ttu̧cu̧huä̧cua̧jä̧ bäreu dauhuiyä 'quiyö juäi pä̧huä̧rö̧jö̧nä̧ tocu'inö̧mä̧, jahuata'anö adihuä ppo̧ö̧ dauhuiyä ka̧cuo̧mȩ cuȩmi̧nö̧mä̧ dä̧'ä̧rö̧jö̧ juäitä cu̧ju̧nä̧rä̧cua̧jä̧. ³⁰ Ja̧hua̧nö̧ ja̧'a̧ ucumä 'quiyö dauhuiyä isojä moächäi jä̧'i̧nö̧'a̧nö̧tä̧ pä̧cui̧'ä̧cua̧jä̧, jahuata'anö ppo̧ö̧ a̧'cua̧cu̧ dau ajiya juiyome käi jä̧'i̧nö̧'a̧nö̧tä̧. ³¹ Ju̧ru̧hua̧ ubomä ijiyä jo'ö'icu jä̧'i̧nö̧'a̧nö̧tä̧ pä̧i̧'ä̧cua̧, ja̧u̧ aditähuämä cuoa pä'ö rȩdȩcuä̧chö̧ juäi jä̧'i̧nö̧'a̧nö̧ jä̧cua̧'a̧; rä̧dȩcuä̧chö̧ ji̧nä̧ yo̧mȩtȩnä̧ cuo'ö kä̧cua̧'a̧, ya̧tȩ'i̧nä̧ toäcua'a na̧huȩpö̧'a̧nö̧ hua̧mä̧.