¹ Cuahuaruhuäru ji'ähui, "¡Chahuaruhuä! ja̧'hua̧ta̧'a̧nö̧ ucutu chi̧jä̧hua̧ju̧tö̧, "Ucuturumä re kä̧cuä̧huä̧ i̧jȩpi̧nö̧sä̧." ² Cua̧ju̧tu̧ru̧ suronä jȩpi̧nä̧ju̧jä̧ pä'ätucuiju, jahuäjumä täcö ttömä chirecuamäcö̧ ja̧'hua̧ta̧'a̧nö̧ ttömä jahuäjumä kirecuomä̧cö̧sä̧. Jahuäju kidepä kiyä'chäcuäumä cäjädächa pä'iju ja̧'hua̧ta̧'a̧nö̧ kirecuo pocöcu jȩjä̧'chä̧cuä̧u̧'i̧nä̧. ³ Cäjächi'ächö juiyöttömä ttötä kö̧'ca̧tä̧huä̧ta̧ ko̧'ä̧dö̧ chicuäcuaju ja̧'hua̧nö̧ jȩpö̧ kuhuäpächinö ku̧'ca̧tä̧huä̧ta̧ juiyönä ku̧jinö'a̧nö̧tä̧ kö̧ja̧'a̧ chi̧jȩpä̧cua̧ju̧. De'a jui̧yä̧jä̧ jä̧'i̧ja̧'a̧nö̧tä̧ jȩchä̧chä̧cua̧ju̧, rȩjȩ ajiya jo̧ä̧jä̧ jä̧'i̧ja̧'a̧nö̧tä̧ ja̧'hua̧nö̧ jo̧mȩnä̧ kahua a̧di̧ttö̧ 'corujuojächönä jȩchä̧cua̧ju̧. ⁴ Re kö̧cö̧ chä̧cua̧sä̧ ya̧tȩrö̧'i̧nä̧ cui̧tti̧mö̧rö̧mä̧, jua'amä̧ täcö quidepä iyä'chäcuähuäju ki̧tti̧mö̧ jo̧mȩttö̧, ⁵ Jahuäju tta̧ju̧mä̧ kidepä iyä'chäcuähuäju ji̧no̧mȩttö̧, Ja̧'hua̧ta̧'a̧nö̧ juajumä̧ dä'äjä juiyönä̧ jȩpo̧tä̧ mu̧chä̧ju̧ juojinä̧u̧ ja̧'a̧. juajumä̧ pä'inä̧ju̧: "Ttömä̧ chusäcua̧jusä chu̧ju̧'cä̧u̧ru̧, täcö juätömä chu̧cuȩ'inä, chahua pä'ö'inä, chi̧ä̧rȩta̧ oveja i̧jȩta̧ttö̧ adicuäta̧'i̧nä̧ ja̧'hua̧ta̧nö̧ lino i̧sä̧ta̧'i̧nä̧, chö̧a̧deja'inä juhua'atäcu chahuoya'inä ttiya'attö." ⁶ Ja̧'hua̧nö̧ ja̧'a̧nä̧, Ttömä ttoecuäbä so̧ö̧ a̧ri̧ ka̧cu̧nä̧ ju̧huȩnȩnä̧ 'cuättopö juiyäcua'anö̧. Ttömä cha̧di̧tä̧cua̧sä̧ jibäte ttoecuäbä juätörö tto̧ȩpä̧rö̧nä̧ ttu̧mä̧nä̧ ttö̧'o̧cui̧'ö̧ juiyäcua'anö. ⁷ Juajumä cu̧ju̧'cä̧u̧rö̧ kusäcuaju, ja̧'hua̧nö̧ usu rujua'anä rȩbȩhuo̧co̧ju̧ käcuaju. Juajumä juätörö kusa'anä po̧cui̧po̧co̧ju̧ käcuaju. Juajumä päjäcuaju: "Ä̧cuo̧mȩnä̧ chirecuo pinö̧rö̧tä̧ ppa̧dä̧cha̧jä̧, ja̧u̧cu̧ chö̧jo̧mȩnä̧tä̧ adihuina'a pa̧'a̧nö̧ jä̧cua̧'a̧ ä'canämä." ⁸ Ja̧'hua̧nö̧ ja̧'a̧ juajumä jerupinä̧ju̧ Ttötä ja̧'a̧nä̧ ku̧cuȩ trigo'inä, vino isoya jareoya'inä ja̧'hua̧ta̧'a̧nö̧ a̧dȩja'inä chiya'anä juhua'atäcu ttöäre plata'inä, oro'inä chiya'amä, ja̧u̧nä̧tä̧ ttö̧ä̧nä̧hua̧ Baalrömä̧ ttaditäcua'anä̧. ⁹ Ja̧'hua̧nö̧ jo̧mȩttö̧ Ttömä cuähuä huȩju̧ pä̧nä̧ ttu̧cuȩ trigo'inä, cha̧huȩ vino isoya'inä ppa̧dä̧di̧pä̧cua̧sä̧. Chi̧ä̧rȩta̧ oveja i̧jȩta̧ttö̧ a̧di̧cuä̧ta̧'i̧nä̧, ja̧'hua̧ta̧'a̧nö̧ lino pö̧jä̧ta̧ jättäpäyotö juättocuinä̧ta̧mä̧ 'chodipäcuotö. ¹⁰ Ja̧u̧nu̧ o'ca'amä ku̧'ca̧tä̧huä̧ta̧ jui'ajutä kö̧ji̧pö̧nä̧ kö̧jö̧'cä̧u̧ to̧ttä̧ra̧'a̧nä̧ ko̧'ä̧dö̧ chicuäcuaju, ja̧'hua̧nö̧ jȩcho̧mȩnä̧ ya̧tȩ'i̧nä̧ Ttö chujuruttö kö̧ji̧pö̧nä̧ ppäda pä'ö toäcua'a. ¹¹ Ttömä ja̧'hua̧ta̧'a̧nö̧ o'cajuiyönä eseu, ttö'ä'cäri'inä, kä̧hua̧ ja̧rȩpa̧nä̧ pä'cäri jȩtti̧nö̧'i̧nä̧, 'cuä'ächi'ö ttö̧'ȩji̧nö̧ jähuä'i̧nä̧ juhua'atäcu o'cajuiyönä pä'cäri jȩtta̧ pä'ö jȩpö̧ ttu̧ju̧ni̧nö̧'i̧nä̧ jȩpö̧ chicuiyäcuotö. ¹² Ttömä si'epö chicuiyäcuotö ttu̧cuȩ uva'inä, ja̧'hua̧ta̧'a̧nö̧ higos dauhuiyä'inä, ja̧u̧nä̧mä̧ pä'inä̧ju̧: Pi̧yȩ ja̧'a̧ chu̧ju̧'cä̧u̧ ttörö chaditähuä micuä jö̧nä̧ ttiyinö̧mä̧. Ttömä dauhuiyä bahui'önä jȩchä̧cua̧sä̧, ja̧'hua̧ta̧'a̧nö̧ ja̧u̧ u̧huä̧ju̧mä̧ de'a isotötä ttu̧cui̧'ä̧cuȩ. ¹³ Ttö̧ä̧nä̧huo̧tö̧ Baalesrö päcäri jȩjö̧ mo̧ro̧mä̧ ro̧dȩpä̧cua̧ju̧, juaju incienso pättö kujuhuomenämä juätörö, juajumä ködo'che o̧bö̧ rö̧nä̧u̧ ja̧'hua̧ta̧'a̧nö̧ kuräu o̧sa̧ rö̧nä̧u̧ a̧'cua̧cui̧'ö̧mä̧, cu̧ju̧'cä̧u̧ tto'ca'anä 'chä̧nö̧ Ttörömä unichi'inä̧ju̧, pä'ö huäjunä ji'äutó TÖ̧Ä̧NÄ̧HUA̧MÄ̧." ¹⁴ Ja̧'hua̧nö̧ ja̧'a̧ pä'äjita'anö Ttömä ttöjö'cächi'önä jȩchä̧cuo̧tö̧. De'a jui̧yä̧jä̧ra̧'a̧ ȩpi̧'ö̧'ca̧ tto̧ȩcuä̧nä̧ chucuocuäcuotö. ¹⁵ Ttu̧cuä̧ uva ka̧cuo̧mȩ'i̧nä̧ ppa̧dä̧dä̧cuo̧tö̧ ja̧'hua̧ta̧'a̧nö̧ Acortttö ppämäroppä päi'omemä tta̧huä̧rä̧cuä̧huä̧ äpate jä̧'i̧nö̧'a̧nö̧ ja̧'a̧. Jahuäjumä kädätä̧cua̧sä̧ möäyaju kö̧jö̧ pä̧nä̧ jȩji̧nö̧ ta̧'a̧nö̧tä̧, Egipto rȩjȩttö̧ räjopi̧nö mo̧ro̧ ji̧nö̧ ta'anötä. ¹⁶ Ja̧u̧nu̧ mo̧ro̧ jä̧cua̧'a̧ Ttörö chirecuojä päcuäcua'amä pä'ö TÄÖ̧Ä̧NÄ̧HUA̧MÄ̧ ja̧'hu̧ta̧'a̧nö̧ chu̧ru̧hua̧ Baal pä'ömä päcuococu chä̧cua̧sä̧. ¹⁷ Ttömä jahuäju känä tö̧ä̧nä̧huo̧tö̧mä̧ Baal ja̧'a̧ päju juiyö̧nä̧ jȩchä̧cua̧sä̧; Jahuätö ttimimä yorö'isotä juhua'a yabonömä a̧mö̧cuädäcuähuoca'a jä̧cua̧'a̧." ¹⁸ Ja̧u̧nu̧ mo̧ro̧ Ttömä̧ jahuätörömä de'a i̧sa̧cu̧'i̧nä̧ ju'tojunä co̧'ä̧rä̧tu̧cu̧'i̧nä̧ ttesecunä jȩchä̧cuo̧tö̧ ja̧'hua̧ta̧'a̧nö̧ rȩjȩnä̧ do'ähuätucu'i̧nä̧. Ttömä 'po'obö'i̧nä̧ curä'chu'i̧nä̧ jäyäcu pätetö chu̧ju̧nä̧cua̧sä̧ juhua'atäcu ja̧huä̧jä̧ rȩjȩttö̧ curä tturohuähuö'i̧nä̧ ja̧'hua̧nö̧ jȩpö̧ u̧ni̧chä̧rö̧ 'quiya'a jacuä ttä'ecunä jȩcuä̧cuo̧tö̧. ¹⁹ Ttömä pä̧dä̧cua̧sä̧ 'cuäopönä̧tä̧ cuirecuo jö̧nä̧tä̧ chä̧cua̧sä̧ jö̧nä̧. Ttömä cuirecuotucu adiu jö̧ jähuä'i̧nä̧, jueö jähuä'i̧nä̧ jȩpö̧sä̧ tta̧'cua̧ huȩnä̧rö̧ esecuäcuähuänä'i̧nä̧ ja̧'hua̧ta̧'a̧nö̧ rȩrö̧jö̧nö̧ toäcuähuänä̧'i̧nä̧. ²⁰ Ttömä päcumä jȩchä̧cua̧sä̧ pä̧dä̧cua̧sä̧ ucurunä ja̧'hua̧nö̧ jo̧mȩnä̧ TÖ̧Ä̧NÄ̧HUA̧MÄ̧ pide ja̧'a̧ päcuäcuotöjä. ²¹ Ja̧u̧nu̧ mo̧ro̧, Ttömä chä̧dä̧cua̧sä̧ pa̧'a̧nö̧ pä'ö TÖ̧Ä̧NÄ̧HUA̧MÄ̧, Ttömä mo̧ro̧jä̧ra̧'a̧ttö̧ chä̧dä̧cua̧sä̧ ja̧'hua̧nö̧ chädätome jahuätömä rȩjȩnä̧cu̧ttö̧ ttädäcuo. ²² Rȩjȩmä̧ u̧huä̧ju̧ oterö'i̧nä̧, vino jareörö'i̧nä̧ ja̧'hua̧ta̧'a̧nö̧ a̧dȩjarö'i̧nä̧ ädätäcua'a ja̧'hua̧nö̧ ja̧'a̧ ja̧u̧mä̧ Jȩzrȩȩlrö ädätäcua'a. ²³ Rȩjȩmä̧ Ttötä cuähuämä chu̧ju̧nä̧cua̧sä̧ ja̧'hua̧ta̧'a̧nö̧ Ruhamárömä re chö̧jä̧cua̧sä̧. Ttömä Ammírömä pä̧dä̧cua̧sä̧: Ucutumä chahuaruhuämä̧cö̧jä̧ ja̧'hua̧nö̧ pädomenä ja̧huä̧tö̧mä̧ ttädäcuotö: Ucumä TÖ̧Ä̧NÄ̧HUA̧JÄ̧ jö̧nä̧."