¹ Pi̧yȩ huȩnȩ ja̧'a̧ TÖ̧Ä̧NÄ̧HUA̧ ucuocuinömä Beeri i̧tti̧ Oseasrö, Uzías'inä, Jotam'inä, Acaz'inä, ja̧'hua̧ta̧'a̧nö̧ Ezequías'inä Judá ttö̧ja̧rö̧ ruhuonä huettinö pä̧nä̧ ja̧'hua̧ta̧'a̧nö̧ Joás i̧tti̧ Jeroboam Israel ttö̧ja̧rö̧ ru̧hua̧ jö̧nä̧ hueinö pä̧nä̧. ² TÖ̧Ä̧NÄ̧HUA̧ ä̧cuo̧mȩnä̧ Oseasnä ucuocu, Ja̧u̧mä̧ pä'inö: "Kidepä iyä'chäcuähuäjuru cuirecua päi'önä ȩmä̧ji̧. Jahuäjumä kidepä iyä'chäcuäu kemä̧u̧ ki̧tti̧mö̧rö̧ ku̧ju̧nä̧rä̧cua̧ju̧. Ötahuiyä ttö̧ja̧mä̧ TÖ̧Ä̧NÄ̧HUA̧RÖ̧ u̧ni̧chi'ö ttidepä iyä'chäcuähuätö jȩtta̧'a̧ jä̧'i̧nö̧'a̧nö̧ jȩpä̧tö̧. ³ Ja̧'hua̧nö̧ hueäjäcu, Oseasmä Diblaim ittiju Gomerö irecua päi'önä ȩmi̧nö̧ ja̧'hua̧nö̧ ja̧'a̧ jahuäjumä muchaju juojäcumä ki̧tti̧mä̧ ubo ji̧na̧'a̧. ⁴ TÖ̧Ä̧NÄ̧HUA̧MÄ̧ Oseasrö pä'inö: "Ja̧u̧rö̧mä̧ Jezreel pä'ö o'irö. Ja̧'hua̧nö̧ ja̧'a̧ a̧'u̧cua̧'a̧tä̧ jö̧ o'ca'a Ttömä Jehú i̧tti̧mö̧rö̧ ro̧dȩpä̧cua̧sä̧ Jezrrelttö cuä'äu icuinomenä ja̧'hua̧ta̧'a̧nö̧ Israel ttö̧ja̧rö̧ ruhuo huettömä ju̧huȩnȩ jubutä rȩbȩu̧nä̧ jȩchä̧cua̧sä̧. ⁵ Jezreel ötahuiyättö pämäroppä päi'omettö Israel ttö̧ja̧ttö̧ su̧ro̧da̧u̧ ttujurumä jȩpö̧ chicu mo̧ro̧'i̧nä̧ jä̧cua̧'a̧. ⁶ Gomermä pä'äjita'anö muchaju juo'ä'caju ji'quichajuru uhuäbecuinäju. Ja̧'hua̧nö̧ kuhuäbecuäji o'ca'a TÖ̧Ä̧NÄ̧HUA̧MÄ̧ Oseasrö pä'inö: Ruhamá pä'ö o'iju, ja̧u̧ pä'ömä Ttömä Israel ttö̧ja̧rö̧ yabonö rȩrö̧jö̧nä̧mä̧ topocö chä̧cua̧sä̧, Ttömä jähuätörömä esecuocö chä̧cua̧sä̧. ⁷ Ja̧'hua̧nö̧ ja̧'a̧nä̧ Judá ttö̧ja̧rö̧tä̧ re chu̧jä̧cua̧sä̧ ja̧'hua̧nö̧ re kä̧nö̧ ra̧huä̧pi̧jö̧ttö̧ ttö̧ji̧pö̧nä̧ ppädädäcuotö, Ttötä, TTÖ̧Ä̧NÄ̧HUA̧ Diostä. Jahuätö rä̧huä̧pi̧ju̧ttö̧ ttu̧ji̧pö̧nä̧mä̧ ppä'ädocö chä̧cua̧sä̧, 'po'obönä'inä, curä'chunä'inä, curä rohuäu'inä, caballotö̧nä̧'inö, jahuätönä huȩjä̧tö̧nä̧'inä." ⁸ Ja̧'hua̧nö̧ ja̧'a̧, Gomermä kittiju Ruhamárö katate a̧do̧dö̧ kicuäji o'ca'a, muchaju juojina'a ka̧ra̧ ki̧tti̧rö̧ uhuäbecuinä̧ju̧. ⁹ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ pä'inö: "Ammí pä'ö o'irö, ja̧u̧ pä'ömä ucutumä Ttömä chi̧tti̧mö̧mä̧cö̧jä̧ ja̧'hua̧ta̧'a̧nö̧ Ttömä cu̧ru̧hua̧tu̧cu̧ Diosmäcö̧sä̧. ¹⁰ Ja̧'hua̧nö̧ ja̧'a̧nä̧, Israel ttö̧ja̧mä̧ aje rö̧o̧tonä pä̧ba̧ rȩba̧ jä̧'i̧nö̧'a̧nö̧ ttirecuäcuotö, ya̧tȩ'inä pa̧ja̧tö̧mä̧ ö̧'a̧tö̧ juiyönätä̧. Pi̧yȩmä̧ jahuätörö päinome jä̧cua̧'a̧: "Ucutumä chi̧tti̧mö̧mä̧ huocotö cuäcuotöjä, jahuätörömä pähui'äcua'a: Ucutumä Dios 'cuäopönä ku̧ ahuaruhuäjä." ¹¹ Judá ttö̧ja̧mä̧ ja̧'hua̧ta̧'a̧nö̧ Israel ttö̧ja̧mä̧ ji̧nä̧ yo̧mȩtȩ ö̧ca̧ca̧ti̧'ä̧cuo̧tö̧. Jahuätömä ttu̧ru̧hua̧rö̧ pojopö ttȩmä̧cuo̧tö̧ ja̧'hua̧nö̧ pojopi'ö rȩjȩttö̧mä̧ 'chattächäcuotö ja̧'hua̧nö̧ jo̧mȩnä̧ ja̧u̧ mo̧ro̧mä̧ rö̧ä̧u̧ mo̧ro̧ jä̧cua̧'a̧ Jezreel ötahuiyättömä.