¹ Ru̧hua̧ Dario todäre du'o ruhuo hue'omenä, ji̧mu̧tȩ ya'utenö kä̧hua̧ päi'omenä, kä̧hua̧ttö̧mä̧ ä̧cuo̧mȩnä̧ mo̧ro̧, TÖ̧Ä̧NÄ̧HUA̧ i̧huȩnȩ Hageo u̧mö̧nä̧ ichina'a̧, i̧huȩnȩ jiähua pä'ö huȩ'ä̧hua̧nä̧, Judá ru̧hua̧rö̧, Salatiel i̧tti̧ Zorobabel, ja̧'hua̧ta̧'a̧nö̧ juȩ'i̧pa̧ ji̧na̧'a̧ i̧huȩnȩ jiähua pä'ö huȩ'ä̧hua̧nä̧, Jehosadac i̧tti̧ Josuérö pa̧'a̧nö̧ pä'ö: ² Su̧ro̧do̧u̧'i̧nä̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: Pittö ttö̧ja̧mä̧ pä'ätö: Jitä mo̧ro̧mä̧ ji̧nä̧ pätecuächoca'a TÖ̧Ä̧NÄ̧HUA̧ ö̧jode tadita pä'ömä." ³ TÖ̧Ä̧NÄ̧HUA̧ i̧huȩnȩ ji'äcuähuä i̧sa̧nä̧ Hageo u̧mö̧nä̧ ichina'a̧, pa̧'a̧nö̧ pä'ö ⁴ ¿Jitämä ucututä chojusodetucunä cu̧jä̧tu̧cua̧ pä'ö ja̧'a̧, ji̧nä̧ juode isode cädäcuähuoca'atä ka'anä? ⁵ Jitämä su̧ro̧do̧u̧'i̧nä̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: ¡Amucuädätucui cu̧mä̧nä̧tu̧cu̧! ⁶ ¡Ucutumä u̧huä̧ju̧ rö'änä ku̧nä̧tö̧jä̧, ja̧'hua̧nö̧ ja̧'a̧nä̧ ji̧'qui̧cha̧nö̧tä̧ i̧'chächätöjä cu̧ju̧nä̧huä̧tu̧cu̧mä̧; ucutumä cuätöjä, ja̧'hua̧nö̧ ja̧'a̧nä̧ rö̧ä̧nä̧mä̧ jui'ätöjä; ucutumä ahuätöjä ja̧'hua̧nö̧ ja̧'a̧nä tä̧cuä̧mä̧chä̧tu̧cuä̧. Ucutumä pö̧jä̧ta̧ 'ca̧tä̧huä̧tö̧jä̧, ja̧'hua̧nö̧ ja̧'a̧nä̧ juiyo du'unämä cu̧'ca̧tä̧huä̧tu̧cuä̧, cuaditätucuomenä pärätä'inä cuȩmä̧tu̧cua̧'a̧nä̧ cusacuyu'inä huäyunätä̧ ȩnä̧tö̧jä̧! ⁷ Su̧ro̧do̧u̧'i̧nä̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: "¿Jȩcu̧'ä̧tu̧cu̧mä̧ adiunä amucuädätucui! ⁸ ¡'Chä'achätucui muä'cara̧'a̧, i'chächätucui dauhuiyä ja̧'hua̧nö̧ jȩpö̧ chojusode aditätucui; Ja̧u̧nu̧tä̧ chesehuäcuasä̧ ja̧'hua̧ta̧'a̧nö̧ ja̧u̧nu̧tä̧ ocuo i̧sa̧ chä̧cua̧sä̧ pä'ö TÖ̧Ä̧NÄ̧HUA̧MÄ̧" ⁹ "¡Ucutumä rö̧ä̧nä̧ usätöjä, ja̧'hua̧nö̧ ja̧'a̧nä̧ topätucui! ¡Ucutumä ji̧'qui̧cha̧nö̧tä̧ i'chächätöjä̧ cuojusodera̧'a̧cu̧mä̧, Ttömä ppö'ötä icusä! ¿Tta̧'a̧nö̧ pä'ö?" pa̧'a̧nö̧tä̧ pä'ö Su̧ro̧do̧u̧'i̧nä̧ TÖ̧Ä̧NÄ̧HUA̧MÄ̧. "Ttö chojusodemä surojuo'ächa'a, cua̧mö̧nä̧ cuojusodetucutä cua̧di̧tä̧rä̧tu̧cua̧'a̧nä̧. ¹² Ja̧u̧nu̧ o'ca'amä Salatiel i̧tti̧ Zorobabel, juȩ'i̧pa̧ sacerdote Jehosadac i̧tti̧ Josué, o'catoi'önä jua'a ko̧cui̧pi̧nä̧tö̧'i̧nä̧, ucuotinätö̧ TÖ̧Ä̧NÄ̧HUA̧ Dios i̧huȩnȩmä̧ ja̧hua̧ta̧'a̧nö profeta Hageorö'inä TÖ̧Ä̧NÄ̧HUA̧ Diomä ja̧u̧ru̧ hue'ina̧'a̧ttö̧ ja̧'hua̧nö̧ ja̧'a̧nä̧ ye'ecuinätö ja̧u̧ i'ä totta pä'ömä. ¹³ Ja̧u̧nu̧ o'ca'a Hageomä, TÖ̧Ä̧NÄ̧HUA̧ i̧huȩnȩ jiäcuahua i̧sa̧mä̧, ȩpi̧nö̧ ttö̧ja̧rö̧ pa̧'a̧nö̧ jiähua pä'ö: "¡Ttömä ucutucutä kö̧sä̧! Pa̧'a̧nö̧ pä'ö TÖ̧Ä̧NÄ̧HUA̧MÄ̧!" ¹⁴ Ja̧'hua̧nö̧ ja̧'a̧ttö̧ TTÖ̧Ä̧NÄ̧HUA̧MÄ̧ porädinö ru̧hua̧ Juda a̧'cua̧ru̧hua̧nä̧, Salatiel i̧tti̧ Zorobabelnä̧'i̧nä̧ sacerdotetö̧ttö̧ juȩ'i̧pa̧ Jehosadac i̧tti̧ Josué, ja̧'hua̧ta̧'a̧nö̧ o'catoi'önä tta̧'cua̧ru̧hua̧nä̧ juȩnȩ ko̧cuä̧tö̧nä̧, jahuätö'inä Su̧ro̧do̧u̧'i̧nä̧ TTÖ̧Ä̧NÄ̧HUA̧ ojusode aditö ti̧'cha̧ pä'ö, ji̧yȩnö̧ mo̧ro̧ veinticuatro mo̧ro̧ ji̧mu̧tȩ ya'utenö kä̧hua̧ jo̧mȩ, ¹⁵ Ru̧hua̧ Dario todäre du'o ruhuo huo'omenä.