¹ Sietenö̧ kä̧hua̧tö̧ päi'omenä, mo̧ro̧tä̧ veintiunonä TÖ̧Ä̧NÄ̧HUA̧MÄ̧ profeta Hageonä ucuocuinö pa̧'a̧nö̧ pä'ö: ² Ucuocui Juda rȩjȩttö̧ ru̧hua̧ Salatiel i̧tti̧ Zorobabelrö ja̧'hua̧ta̧'a̧nö̧ sacerdotestö̧ttö̧ juȩi̧pa̧ Josué i̧tti̧ Jehosadacrö ja̧'hua̧ta̧'a̧nö̧ totte'ächa'anä ka̧cui̧pi̧nä̧tö̧rö̧'i̧nä̧. pa̧'a̧nö̧ pä'önö, ³ ¿Ucututtö ka̧cui̧pi̧nä̧tö̧ttö̧ ka̧cuä̧tö̧ ä̧cuo̧mȩnä̧ huinode öadihuä topinä̧tö̧? ¿Jitämä tocu jö̧nä̧ jode to'cuätucuättö̧? ¿Ucutu to'cuätucuomenämä ucuo juiyode 'cua̧rö̧nä̧tä̧ jode? ⁴ ¡Jitämä Zorobabel yabonö̧tä̧ juruhuächi'i! Pä'ötó TÖ̧Ä̧NÄ̧HUA̧MÄ̧ ¡Ja̧'hua̧ta̧'a̧nö̧ yabonö juruhuächi'i sacerdotetö̧ttö̧ juȩ'i̧pa̧ Jrhosadac, Josué i̧tti̧; juhua'atäcu juruhuächi'ätucui o'catoi'önä ja̧huä̧jä̧nä̧ kä̧tö̧mä̧! pä'ötó TÖ̧Ä̧NÄ̧HUA̧MÄ̧, ja̧'hua̧ta̧'a̧nö̧ aditätucui, ¡Ucutucu chö̧ja̧ pä'ömä! pä'ötó su̧ro̧da̧u̧ TTÖ̧Ä̧NÄ̧HUA̧MÄ̧. ⁵ Pi̧yȩ ja̧'a̧ ucutucu esecu chutodecuinö̧mä̧ Egipto rȩjȩttö̧ räcuopinä̧tu̧cuo̧mȩttö̧ kä̧mä̧dö̧ ja̧'hua̧ta̧'a̧nö̧ cha̧'cua̧ru̧hua̧nä̧mä̧ ucututäcu kö̧sä̧. ¡Yecuecuätucuä! ⁶ Ja̧'hua̧ta̧'a̧nö̧ su̧ro̧da̧u̧ TTÖ̧Ä̧NÄ̧HUA̧MÄ̧ pi̧yȩ pä'ö: A̧'u̧cu̧nä̧tä̧ mo̧ro̧ o'ca'a pä'äjita'anö mo̧ro̧jä̧'i̧nä̧, rȩjȩ'i̧nä̧, aje rö̧o̧to'inä ja̧'hua̧ta̧'a̧nö̧ rȩjȩ joome'inä ttö̧ȩpö̧nä̧ jȩchä̧cua̧sä̧! ⁷ Ttö̧ja̧cuo̧mȩ pö̧nä̧ ttö̧ȩpö̧nä̧ jȩchä̧cua̧sä̧ ja̧'hua̧nö̧ jo̧mȩnä̧ jahuätömä ttöäre rö̧ä̧nä̧ micuäu jähuämä tti̧'cä̧chi̧yä̧cua̧sä̧, ja̧u̧ttö̧tä̧ pode isode ucuo kodemä suhuädi'äcua'a, pä'ötó su̧ro̧da̧u̧ TTÖ̧Ä̧NÄ̧HUA̧MÄ̧. ⁸ ¡Plata'inä, oro'inämä Ttö chiäretó! pä'ötó su̧ro̧da̧u̧ TTÖ̧Ä̧NÄ̧HUA̧MÄ̧. ⁹ Juode ucuomä mo̧ ji̧no̧mȩttö̧'i̧nä̧ yabonänä jä̧cuode yodejimä, pä'ötó su̧ro̧da̧u̧ TTÖ̧Ä̧NÄ̧HUA̧MÄ̧ ja̧'hua̧ta̧'a̧nö̧ Ttö huȩnȩ juiyönä ttö̧ja̧cu̧nä̧ chi̧yä̧cua̧sä̧! Pä'ötó su̧ro̧da̧u̧ TTÖ̧Ä̧NÄ̧HUA̧MÄ̧. ¹⁰ Mo̧ro̧mö̧ veinticuatronä kä̧hua̧tö̧ttö̧tä̧ nuevenä, Dario ruhuo todäre a̧'ȩ jo̧mȩnä̧ hueomenä, TÖ̧Ä̧NÄ̧HUA̧MÄ̧ profeta Hageonä ucuocumä pa̧'a̧nö̧ pä'inö: ¹¹ Su̧ro̧da̧u̧ TTÖ̧Ä̧NÄ̧HUA̧MÄ̧ pa'anö pä'ötó: Sacerdotes päi'önä huotörö jä'epö ä̧ju̧cuä̧tu̧cui̧ hueähuä huȩnȩmä̧ jittähuätucuacu: ¹² Ya̧tȩ i̧sa̧ idepä 'cä̧'ȩpö̧ ku̧nä̧ji̧'ca̧ ȩpö̧rö̧, ö̧'ca̧tä̧huä̧ta̧ beipome mȩä̧huä̧chu̧ttö̧mä̧ panppä jö̧ttö̧'i̧nä̧, huihuatö dahuähuä jö̧ttö̧'i̧nä̧, vino isoya jö̧ttö̧'i̧nä̧, a̧dȩja jö̧ttö̧'i̧nä̧, korojuei cuäcuähuä jö̧ttö̧'i̧nä̧, ¿Ja̧u̧ mȩä̧huä̧chä̧ji̧mä̧ 'cä̧'ȩpö̧ ku̧nä̧huä̧ jö̧nä̧tä̧mä̧ pärohuächocö? Sacerdotestö̧mä̧ "pärohuächocö" pä'ötä ädätinä̧tö̧. ¹³ Ja̧u̧nu̧ o'ca'a Hageomä pä'inö: "Ya̧tȩ 'coru juo'ächäjirö mȩä̧ja̧'a̧ su̧ro̧pa̧ jö̧nä̧tä̧ ki̧'ä̧ji̧'ca̧ korojueinä mȩö̧ttö̧mä̧ ¿Mȩä̧ji̧mä̧ surojö jö̧nä̧tä̧ ka̧cui̧pa̧'a̧? Sacerdotetö̧mä̧ "a̧, surojö jö̧nä̧tä̧ ka̧cui̧pö̧" pä'ö ädätinä̧tö̧. ¹⁴ Ja̧'hua̧nö̧ ja̧'a̧ Hageo ädätönö̧ päinä̧u̧: " Ja̧'hua̧nö̧ jä̧ji̧'a̧nö̧ huotö pitö ttö̧ja̧mä̧, Ttö chä'ca jo̧mȩttö̧mä̧! Pä'ötó TÖ̧Ä̧NÄ̧HUA̧MÄ̧ ja̧'hua̧nö̧tä̧ o'cajuiyönä cu̧mö̧tu̧cu̧nä̧ jȩ'cuä̧tu̧cu̧mä̧; jahuätö Ttörö ttiyömä surojötä jö ja̧'a̧. ¹⁵ Ja̧'hua̧nö̧ ja̧'a̧ jitämä, Cutucu amötehuatucunä̧ a̧mö̧cuädätucui, mo̧ 'cuäopinö̧ttö̧ ujuturu i'cächinö jitä mo̧ro̧ jä̧cuȩ. Inähuä huämehuä TÖ̧Ä̧NÄ̧HUA̧ ojusodenä ttötäcua'a ä'canämä, ¹⁶ ¿Tocu ji̧na̧'a̧ttö̧? Ucutu cuichinä̧tu̧cu̧mä̧ veintenö u̧huä̧ju̧ ote u'chunö jä̧cua̧'a̧ päcuinätucua̧'a̧mä̧, dieznötä̧ ji̧na̧'a̧; ja̧'hua̧ta̧'a̧nö̧ isäbattö vino isoyamä cincuentanö o̧'ta̧nä̧ huätopäcuotöjä̧cö̧ päcuinätu̧cua̧'a̧mä̧, suro veintenötä huä'opinä̧tö̧jä̧. ¹⁷ Ucuturumä usurä cuȩhuä̧tu̧cu̧nä̧tä̧ jȩchi̧nä̧u̧jä̧ ja̧u̧mä̧ cu̧cuä̧ cuähuätucu ku̧ju̧nä̧tu̧cu̧mä̧ mi̧yu̧nö̧tä̧ ja̧'hua̧ta̧'a̧nö̧ tȩmö̧rehuächunä̧tä̧, ja̧'hua̧nö̧ ja̧'a̧nä̧'inä Ttöcumä ppa̧'a̧cho̧co̧tö̧ pinätöjä, pa̧'a̧nö̧tä̧ pä'ötó TÖ̧Ä̧NÄ̧HUA̧MÄ̧. ¹⁸ Jitä mo̧ro̧ kä̧mä̧dö̧ adiu topätucui, mo̧ro̧mä̧ veinticuatronö kä̧hua̧tö̧tä̧ nuevenö pä'i'ätönä TÖ̧Ä̧NÄ̧HUA̧ ojusode huä̧cuo̧mȩ kada'ca ku̧ju̧ni̧nä̧tu̧cua̧'a̧mä̧. ¡Ja̧u̧ adiu amöcuädätucui! ¹⁹ ¿Ji̧nä̧ u̧huä̧ju̧ ote ka̧cua̧'a̧ cuähuä hua'adö rutähuomenä? Uva dauhuiyä'inä, higo dauhuiyä'inä, granado pättö'inä ja̧'hua̧ta̧'a̧nö̧ olivo dauhuiyä u̧huä̧ju̧mä̧ huȩjo̧ca̧'a̧! ¡Ja̧'hua̧nö̧ ja̧'a̧nä̧ pi̧yȩ mo̧ro̧ttö̧ kä̧mä̧dö̧ adiu uhuäju huȩju̧nä̧ jȩchä̧cua̧sä̧! ²⁰ Ja̧u̧nu̧ o'ca'a TÖ̧Ä̧NÄ̧HUA̧MÄ̧ todärenä päi'önä mo̧ro̧mä̧ veinticuatronä kä̧hua̧tö̧tä̧ nuevenä Hageonä ucuocumä pä'inö: ²¹ Judá rȩjȩttö̧ ru̧hua̧ Zorobabelrö ji'äumä pä'irö: Ttömä mo̧ro̧jä̧'i̧nä̧, pi̧jä̧ rȩjȩ'i̧nä̧ ttö̧ȩpo̧nä̧ jȩchä̧cua̧sä̧. ²² Isopäi'önä ruhuo dȩä̧cä̧mä̧ ki'opö chi̧cuä̧cua̧sä̧ ja̧'hua̧ta̧'a̧nö̧ ttö̧ja̧ tturuhuotö ruhuotö ttujuru'inä si'epö chi̧cuä̧cua̧sä̧! Caruquiyä'inä ja̧'hua̧ta̧'a̧nö̧ ca̧hua̧yu̧tu̧nä̧ huȩjä̧tö̧rö̧'i̧nä̧ kisäu chicuäcua̧sä̧; cahuayu̧tu̧'i̧nä̧ jahuätunätä huȩjä̧tö̧'i̧nä̧ ma̧ttä̧chä̧cuo̧tö̧, yotucunä̧mä̧ tta̧hua̧ru̧hua̧rö̧ curä'chunä cuä'äu tticuäcuotö. ²³ Ji̧yȩnö̧ mo̧ro̧ su̧ro̧da̧u̧ TÖ̧Ä̧NÄ̧HUA̧MÄ̧ pa̧'a̧nö̧ pä'ötó Salatiel i̧tti̧ Zorobabelrömä pojopö chä̧mä̧cua̧sä̧ chumöhuä̧ya̧ jö̧nä̧ pojopö chemäcuä̧sä̧. Ucurumä ttudoche i̧so̧bö̧ jö̧'a̧nö̧ jȩchö̧cua̧jä̧, juhua'amä pojopö cheminäcu̧ cua'a̧ttö̧ Pä'ötó su̧ro̧da̧u̧ TÖ̧Ä̧NÄ̧HUA̧MÄ̧"