¹ Ttö jä̧dȩpä̧rä̧'i̧mä̧ täcö jidähuä jäcujä ja̧'hua̧nö̧ ja̧'a̧ttö̧ jitämä ttä̧a̧rö̧tä̧ kö̧sä̧ ttö̧ȩpä̧rö̧nö̧ ucú cuädäta'anätä̧ ja̧'hua̧ta̧'a̧nö̧ pää'chocösä täcö TÖ̧Ä̧NÄHUA̧. ² TÖ̧Ä̧NÄHUA̧ ädätö päinäcu̧sä̧: pi̧yȩ to'cuäjimä̧ huȩyu̧ti̧, huȩyu̧cuä̧ jö̧ta̧'a̧nö̧ 'chä̧nö̧ ttöcuo cuäcua'anö huȩyu̧ti̧ to'cuäjita'anö i̧nä̧bi̧nä̧. ³ To'cuäjimä ji̧nä̧ recuiäcua'a jitätämä pätetoca'a ja̧'hua̧nö̧ ja̧'a̧nä̧ huȩyu̧cuä̧ huȩnȩ́ päöta'anö 'cuäopäcua'a ja̧'hua̧ta̧'a̧nä̧ huȩyu̧cuä̧ huȩnȩ́ pu̧ta̧'a̧nö̧ pätecuächomenämä pätecuchäcua'a. ⁴ Ä̧ju̧cui̧! juiyo ri̧ȩnä̧ ucuo teähuätö ja̧'hua̧nö̧ ja̧'a̧nä̧ tta̧'cua̧nä̧mä̧ suropätö,. Ja̧'hua̧nö̧ ja̧'a̧ttö̧ ttörö a̧'cua̧ huȩnä̧rö̧tä̧ ö̧jä̧cua̧. ⁵ Ttö̧ja̧'i̧sä̧ mu̧ä̧ya̧rö̧ adihuä'iyaanö vino isoya a̧'ti̧poya, ja̧'hua̧nö̧ usú 'cuäopunä öadihuätä, ja̧'hua̧nö̧ jȩpu̧ amöcuädö hua'ö tticua pä'ö ttöjö'cocaa jä̧i̧nö̧'a̧nö̧, u̧ju̧nä̧rö̧'i̧nä̧ ji̧nä̧ juayabonö esetocö. Jo̧u̧mä̧ usú o'cajuiyönä pi̧jä̧ ttö̧ja̧cuo̧mȩ o̧dö̧nä̧ ja̧'hua̧ta̧'a̧nö̧ o'catoinärö̧ ttö̧ja̧rö̧'i̧nä̧ ca̧ca̧tö̧. ⁶ Esetocöjä o'cajuiyönä pätömä ja̧'hua̧nö̧ ja̧'a̧ttö̧ ppä̧a̧dä̧rö̧ ya̧ttä̧huä̧ 'chä̧cua̧jä̧ ucurö, pa̧'a̧nö̧ päö: ¡Ayó ucuhué surojötä̧ rö̧ä̧chä̧cua̧jä̧! ¿ucutu cuäre jo̧cö̧́ cueminätö̧cu̧ korotö ttiärettö tenebu cäädö cu̧ju̧nä̧cua̧jä̧ttö̧? ⁷ ¿ Ucuru kö'cocotömä pä'äjita'anö ttichäcuotö, ja̧'hua̧ta̧'a̧nö̧ ucuru ttösomenä yecuecui̧'ä̧cua̧jä̧? Jähuätö ttöjö'cococu cui̧jä̧cua̧jä̧. ⁸ ja̧'hua̧nö̧ ja̧'a̧ttö̧ ucú jahuätörö 'chocuipinö, o'cajuiyönä ka̧cui̧pi̧nö̧mä̧ jahuätö 'cho̧tti̧ pä̧cua̧jä̧. Tti̧rȩjä̧ ttö̧ja̧cuo̧mȩ o̧dö̧nä̧ docuächomenä suronä cuäu icú ttöcuojatä huerädinöjä̧ juȩnȩ ka̧cuä̧tu̧rö̧. ⁹ ¡Ucuhué! korotö ttiäre 'chocui̧pä̧ra̧'a̧ttö̧ cuahuaruhuämä surojötä pätecuächätö, surojöttö chö̧ji̧pa̧ pä'ö otó cuadita pä'ö amucuädöjä. ¹⁰ Ja̧hua̧nö̧ yettecui'inätä̧ jȩpi̧nö̧jä̧ cuahuaruhuä'inä ja̧'hua̧ta̧'a̧nö̧ ucutädä̧jä̧ korotörö cuä'ähuö cuicuomenä. ¹¹ Ötahuiyä ttoecuä'ca'inä ucuru jiähuäcua'a ja̧'hua̧ta̧'a̧nö̧ cuahuaruhuä'inä tädätäcuotö ucuru. ¹² ¡Ä̧jui̧cui̧! ötahuiyä cuaditömä korotörö cuä'ähuicu suronä jȩpu̧kä̧nö̧. ¹³ ¿O'cajuiyönä ju̧ru̧hua̧ TÖ̧Ä̧NÄHUA̧TÄ̧ jȩpu̧ icumä juruhuächiö ttäditö'inä siepu icumä ocuränätä̧ ki̧'ö̧ juiyunä̧ ja̧'hua̧ta̧'a̧nö̧ surojötä rö̧ä̧cha̧a̧ttö̧ mi̧cuähuocötä ki̧'ö̧? ¹⁴ Ajé de'ähuoto o'cajuiyönä rä̧ji̧ya̧'a̧nö̧ ja̧'hua̧ta̧'a̧nö̧ TÖ̧Ä̧NÄHUA̧ öädihuä ttö̧huo̧juä̧cuo̧tö̧ tti̧rȩjä̧ o'cajuiyönä. ¹⁵ ¡Ä̧ju̧cui̧! cuippeyänä kä̧tö̧rö̧ ttähuönä jȩpu̧mä̧, ucú koro huihuatö ajumä ri̧ȩnä̧ tä̧ttä̧mä̧cho̧mȩbu tottacu pä'ö o'cajuiyunä cu̧'ca̧tä̧huä̧ta̧ jui'ö cui̧ju̧. ¹⁶ Ttesehuachi'ajimä surojötä kö̧nä̧rä̧tö̧. Juo̧'u̧cu̧ ahuätömä ja̧'hua̧ta̧'a̧nö̧ ttö̧ttȩpä̧ri̧'ä̧cuo̧tö̧ surojö ttö̧ju̧nä̧rö̧. TÖ̧Ä̧NÄHUA̧ a̧huo̧'ta̧ u̧huo̧jua̧'a̧nä̧ 'chuhuä̧ro̧'ta̧ ucuru pä'ö moró̧ pätecuächäcua ja̧'hua̧ta̧'a̧nö̧ ttö̧cuȩ pä̧rä̧chi̧'a̧cua̧jä̧ suronä jȩ'cuä̧'i̧jö̧mä̧. ¹⁷ Libanorö̧ cuä'ähuö cuicuinötä̧ suronä jä̧cua̧jä̧ ja̧'hua̧ta̧'a̧nö̧ ttä̧ji̧mu̧rö̧ cuä'ähuö cuicuinötä̧ surojä̧cua̧jä̧. Ttö̧já̧ ttöcuoja huerächi ina'a̧ttö̧ ja̧'hua̧ta̧'a̧nö̧ suronä i̧jȩpä̧'i̧yä̧ tti̧rȩjä̧ ttö̧ja̧cuo̧mȩ ötahuiyäna o̧dö̧nä̧ ja̧'hua̧ta̧'a̧nö̧ o'cajuiyönä juȩnȩ kä̧tö̧rö̧'i̧nä̧. ¹⁸ ¿Isotö ttä̧'cua̧juȩ adicuämä däjé ppadäcu̧ttö̧? 'co̧'ö̧ aditäjimä ja̧'hua̧ta̧'a̧nö̧ cuoräubittö kuhuö'icu aditömä isoto ttä̧'cua̧juȩ, juo̧u̧mä̧ yapare huo̧juȩ tä̧cuä̧huä̧'i̧sä̧; juo̧u̧mä̧ chutä aditötä úcuo teähuö i̧ä̧nähua̧tu̧ ju̧nä̧ tta̧'cua̧ juiätörö. ¹⁹ ¡Ä̧jui̧cui̧! ya̧tȩ päöttömä däu 'co̧ä̧huä'ca ¡porächii! ja̧'hua̧ta̧'a̧nö̧ inä'inä a̧'cua̧rö̧ juiyähuä ¡ä̧rä̧mi̧i̧! ¿pi̧yȩmä̧ päöta'anö jȩö̧́? Topi, orottö'inä platattö'inä aditö to̧rä̧dö̧ icuähuaa, juo̧u̧mä̧ ji̧yȩtȩ'i̧nä̧ juäocö. ²⁰ ¡Ja̧'hua̧nö̧ ja̧'a̧nä̧ TÖ̧Ä̧NÄHUA̧ surojö jui̧a̧mä̧ surojö juiyodenä kö̧! o'cato'inä ka̧cuä̧ttö̧mä̧ 'coröchiötä kä̧tu̧cui̧ juo̧ú̧ ä'cajo̧mȩtö̧mä̧.