¹ Ttö profeta Habacuc jidähua pä'ö rȩbȩhui̧nä̧cu̧sä̧, ² CHI̧Ä̧NÄHUA̧, ¿Ucuru recuo mo̧ró̧ jä̧'ȩpä̧rä̧'i̧jö̧sä̧ ja̧'hua̧nö̧ ja̧'a̧nä̧ ucumä ä̧ju̧cuo̧co̧tö̧ kö̧jä̧? Pä̧i̧cu̧nä̧ jä̧'ȩpä̧rä̧'i̧jö̧sä̧ suronä jȩtti̧yä̧cu̧, ja̧'hua̧nö̧ ja̧'a̧nä̧ ucumä usurä ȩmä̧huä̧tö̧rö̧ ppäcuädo̧co̧u̧ pä'ijätöjä. ³ ¿Dä pä'ö ttidepä hueönä ttö̧ja̧'a̧ tochönä jȩ'cua̧'a̧ttö̧ ja̧'hua̧ta̧'a̧nö̧ suronä jȩttö̧'i̧nä̧? Ttö chä'cattö o'cajuiyönä ttö̧ja̧cuo̧mȩttö̧ rohuähuö surojoepä'chö ja̧'hua̧ta̧'a̧nö̧ jarodä'chö ka̧cuä̧tö̧. ⁴ Ja̧'hua̧ta̧'a̧nö̧ hueähuä huȩnȩ́'i̧nä̧ jȩpo̧co̧tö̧ ja̧'hua̧nö̧ ja̧'a̧ttö̧ recuiyacuaa ro̧ȩcuä̧mä̧. Adihuätöttö'inä juiyo recuätö suronä jȩpä̧tö̧mä̧, ja̧'hua̧nö̧ ja̧'a̧ttö̧ ro̧ttȩ päjimä yapare jittäutä ra̧o̧pä̧ra̧'a̧. TÖ̧Ä̧NÄHUA ädätinäcu̧ Habacuc rö: ⁵ Korome pi̧jä̧nä̧ ttö̧ja̧cuo̧mȩ o̧dö̧nä̧ 'cuäoputtö topu huo̧jui̧pä̧tu̧cui̧; ucuru jittäumä cuesetiyä̧cua̧jä̧ ucú cumoró̧ ttö cueröhuaanä chiyö ja̧'hua̧nö̧ ja̧'a̧nä̧ eseunö cu̧ji̧pä̧cua̧jä̧. ⁶ ¡Ä̧ju̧cui̧! Caldeo ttö̧ja̧rö̧ hueda pä'ö kö̧sä̧, Jahuätömä ucuotä cuähuäjuiyönä jȩpä̧tö̧ o'cajuiyönä tti̧'cho̧mȩ o̧dö̧nä̧ 'choipä'chö tti̧rȩjä̧ jo̧cö̧ o̧dö̧nä̧. ⁷ Suronä jȩtta̧'a̧ttö̧ yȩttȩcuä̧u̧; jitötä huettötä a̧di̧huä̧u̧. ⁸ Ja̧'hua̧nö̧ yähuitöttö̧'inä yodó ähuiritö̧ttö̧'i̧nä̧ juiyó juruhuätö cuäji̧mu̧ ca̧hua̧yu̧tu̧mä̧. cuäji̧mu̧ ca̧hua̧yu̧tu̧nä̧ huä̧tu̧'i̧nä̧ otonä ichätö, ja̧hua̧nö̧ ja̧'a̧nä̧ jurunä jopätö buó mu̧cá coäija'anö u̧cuȩ́ a̧bo̧ta̧ pä'ö. ⁹ O'catoi'önä jahuätö ichätö suronä jȩttä̧ peötä amucuädö; isoppa di'ö ju'tojucu rȩbá̧ cäepäjianö juiyó recuätö 'chänö 'chu'ädö cärenä rutätö pä̧ja̧cuo̧mȩ juiyönä. ¹⁰ Jahuätömä esetocotö ruhuotörö'inä ja̧'hua̧ta̧'a̧nö̧ TTIÄNÄHUA̧RÖ̧'I̧NÄ̧. Ötahuiyänä 'quiecuä'ca'inä 'cuä'o'ö ttö̧ja̧rö̧ ca̧ca̧ti̧pu̧ ȩmi̧pä̧tö̧. ¹¹ Ja̧'hua̧nö̧ ja̧'a̧ttö̧ jurunänö ichö́ suro joepäcua'a ajiya isoppa. U̧mä̧tö̧ suronä jȩttä̧ji̧ttö̧tä̧ ja̧'hua̧ta̧'a̧nö̧ juayabo juittäcuotö ttujurumä. Ja̧'hua̧nö̧ ja̧'a̧ttö̧ Habacuc koró jä'epu ä̧ju̧cui̧nö̧ TÖ̧Ä̧NÄHUA̧RÖ̧: ¹² ¿Ucumä täbocutä päi'önä ki̧nö̧jä̧, CHI̧Ä̧NÄHUA̧ DIOS, SUROJÖ JUI̧'A̧JÄ̧? Ja̧'hua̧nö̧ ja̧'a̧ttö̧ TÖ̧Ä̧NÄHUA̧ ro̧ȩpä̧cua̧ ujutu hua'ö́ ticua pä'ö. Ja̧'hua̧nö̧ ja̧'a̧nä̧ inähuä ku̧ninöjä̧ jue'epu cuicua pä'ö jahuätörö. ¹³ Cuiäriyämä surojö juiya'attö topujä surojömä, ja̧'hua̧nö̧ ja̧'a̧nä̧ suronä jȩttö̧tä̧mä̧cö̧, ¿Dä̧ pe'ö ja̧a̧tä̧ to'cuättö ucurö jarodätörömä? ¿Dä̧ pä'ö ja̧'a̧tä̧ to'cuä surojö juiätörö cuä'ö tticua'anämä jahuätörö? ¹⁴ Ajé deähuoto po̧'i̧ 'cua̧rö̧nä̧ to̧'cuä̧u̧jä̧, ja̧'hua̧nö̧ ja̧'a̧nä̧ to̧'cuä̧u̧jä̧ a̧ca̧tö̧ 'cua̧rö̧nä̧ ttö̧rö̧hua̧ toätö jö̧nä̧. ¹⁵ O'cato'inä jahuätörömä ajua'chenä 'cho̧ttä̧u̧; ja̧'hua̧nö̧ ja̧'a̧nä̧ po̧i̧rö̧ huo̧ä̧huä̧sa̧nä̧ huottäa jä̧i̧nö̧'a̧nö̧ ca̧ca̧tö̧jä̧ ttö̧ja̧ u̧mä̧tö̧rö̧mä̧. Ja̧'hua̧nö̧ jo̧mȩnä̧tä̧ jahuätömä tta̧'cua̧ a̧di̧huä̧cuä̧u̧ eseu huottäcuotö. ¹⁶ Ja̧'hua̧nö̧ jȩpu̧ kuicu iyähuä iyätö po̧i̧rö̧ huottä̧sa̧tä̧ ttujuhuomenämä topätö adiunä a̧dö̧nä̧ 'choopaa jä̧i̧nö̧'a̧nö̧, juä̧sa̧tä̧ ujutu ri̧ȩnä̧ tucunä i̧yä̧sa̧ po̧i̧ deä'inä pä'ö. ¹⁷ ¿Jahuätömä ja̧'hua̧nö̧ ja̧'a̧ttö̧ juä̧sa̧ta̧ usäu 'chä̧tö̧ ttö̧ja̧ deiyu ttö̧ja̧cuo̧mȩ o̧dö̧nä̧ cuääu'icu cueächätö, ttucuota peömä juiätö?