¹ Jahuätö ta̧ju̧ ángeles ni̧pä̧ro̧mȩ Sodoma ötahuiyära̧'a̧ rȩbȩhui̧pi̧nä̧tö̧do. Lotmä ötahuiyä doächäcuähuate ä'ca pinödo. Jahuätörö topö, Lotmä ä̧rä̧mi̧'i̧nö̧do. Jahuätörö te'ähuinödo. Ja̧rȩyu̧nu̧ pä'i'ö, i'ä rȩjȩ becuächönä jȩpö̧, ucuotönö esehuinödo. ² Jahuätörö pä'inödo: ―Churuhuotö, ucutu cumö̧huä̧ya̧tu̧cu̧sä̧. Ttö chojusodenä do'ächätucui. Juhuorötä cu̧jä̧pi̧yä̧ töcähui'ö'cotö ä'ächätucui. Yo̧ȩi̧ pä'ö mo̧ro̧ päi'a'a porächi'ö, cui̧'chä̧tu̧cuä̧cua̧'a̧nö̧―. Ja̧'hua̧nö̧ ja̧'a̧nä̧ jahuätö pä'inätödo: ―Isocö. U̧mi̧nä̧tä̧ yodo tö̧ja̧cuä̧cuo̧tö̧jä̧―. ³ Ja̧'hua̧nö̧ ja̧'a̧nä̧ Lotmä jahuätörö pä̧i̧cu̧nä̧nö̧ ucuocuomenä, ja̧u̧cu̧ 'chä̧nö̧ ojusodenä do'ächinätödo. Ja̧'hua̧nö̧ ja̧'a̧ Lot ttu̧cuȩ adihuä juäittö jȩpö̧, pa̧'inä ppö̧ä̧mö̧ juiyönä ȩttö̧ i̧yä̧u̧ cuinätödo. ⁴ Jahuätö ángeles ttä'a pä'ö ttö̧'ä̧mä̧dä̧cua̧'a̧ ä'canä, Sodoma ötahuiyä ttö̧ja̧ u̧mä̧tö̧, möäyotö'inä, böäcuächätö'inä o'ca toi'önä Sodoma ötahuiyära̧'a̧ ichö, Lot ojusode soböcuächönä ca̧ca̧cui̧nä̧tö̧do. ⁵ Lotrö huopinätödo: ―¿To jä̧ttö̧ u̧mä̧tö̧ ta̧ju̧ pi̧yȩ ni̧pä̧ro̧mȩ cuojusodenä dodepäjätömä? Rä'epö icu i'cächitö, nä̧tö̧rö̧ jȩttö̧'a̧nö̧ u̧mä̧tö̧ u̧mä̧tö̧cu̧ jȩta̧tö̧ pä'ö―. ⁶ Ja̧'hua̧nö̧ ja̧'a̧nä̧ Lot äpatenä rä'opö, abo ja̧'a̧cu̧ mö̧'ȩpi̧nö̧do. ⁷ Pä'inödo: ―Ja̧'hua̧nö̧ suronä jȩcu̧'ä̧tu̧cuä̧' chahuaruhuä. ⁸ Ä̧ju̧cuä̧tu̧cui̧. Chi̧tti̧mö̧ nä̧tö̧ ta̧ju̧ru̧ yorö'iso uborö jerupätörö ku̧nä̧rö̧sä̧. Jahuätörötä ucuturu hueda pä'ö jä'epätucuittö, jahuätörö ucuturu pä̧huä̧ rö̧jö̧mä̧ jȩcu̧'ä̧tu̧cua̧ pä'ö. Ja̧'hua̧nö̧ ja̧'a̧nä̧ pitö u̧mä̧tö̧rö̧mä̧ suronä jȩcu̧'ä̧tu̧cuä̧tö̧, chojusodenä dottächäja'attö―. ⁹ Jahuätö pä'inätödo: ―Pporächi'ö kä̧hui̧ kara'anä―. Ja̧'hua̧ta̧nö̧ pä'inätödo: ―Ucu kara'attö ichäcuähuamä ujutu ti̧rȩjä̧nä̧ huecu juiyö'anö ja̧'a̧. Jahuätörö suronä jȩta̧ pä'ö tamöcuädäjittö'inä abonänö suronä jȩtä̧cuo̧tö̧jä̧ ucurumä―, huopinätödo Lotrö. Ja̧'hua̧nö̧ pä'ö kä̧nö̧, äpate'inä 'co̧ä̧chi̧'ö̧nä̧ jȩpö̧, äpate isodä'inä döäu'a̧nö̧ päi'önä Lotcu ki'ocuinätödo. ¹⁰ Jahuätö u̧mä̧tö̧ Lot ojusodenä do'ächäjätömä ttu̧mö̧ u̧mi̧cu̧ rä'epö Lotrö 'chu'huädö do'ädächinätödo jacuojucu. Äpatetä mö̧'ȩpo̧'i̧nä̧tö̧do. ¹¹ Mö̧'ȩpä̧jä̧tö̧'cotö, äpate u̧mi̧nä̧ ka̧cuä̧tö̧rö̧ möäyotörö'inä, böäcuächätörö'inä ttä̧to̧cä̧chi̧'ö̧nä̧ jȩpi̧nä̧tö̧do, äpate'inä ttö̧'o̧cui̧'ö̧ juiyönä. ¹² Ja̧'hua̧nö̧ ja̧'a̧ do'ächäjätömä Lotrö jä'epinätödo: ―¿Titö pö̧nä̧ cuahuaruhuärö cu̧ju̧nä̧rä̧ pi̧yȩ ötahuiyänämä? Cu̧jo̧ri̧rö̧'i̧nä̧, cui̧tti̧mö̧rö̧'i̧nä̧ o'ca toi'önä cu̧ju̧nä̧rä̧u̧ru̧mä̧, rä'epö icuitö ötahuiyättömä. ¹³ Ujutumä ötahuiyä be'epäjipö ticua pä'ö ichäjätöjä. Rö̧ȩnä̧ suronä jȩpö̧ ka̧cuä̧tö̧do pä'ö jittäu huȩnȩ Tu̧ru̧hua̧ Dios ä'ca jo̧mȩttö̧ tä̧ju̧cua̧'a̧ttö̧, Tu̧ru̧hua̧ Dios huȩä̧jä̧u̧jä̧ ötahuiyä be'epäjipö ticua pä'ö―. ¹⁴ Lot ja̧'hua̧nö̧ ä̧ju̧cu̧ rä'opächö ö̧jo̧ri̧mö̧rö̧, i̧tti̧mö̧rö̧ ttö̧ja̧ pä'ätörömä ucuocu 'chi̧nö̧do. Pä'inödo: ―Ä̧rä̧mi̧'ö̧ rä'opächätucui porö ötahuiyättömä. Tu̧ru̧hua̧ Dios be'epäjipö icudo pi̧yȩ ötahuiyä―. Ja̧'hua̧nö̧ ja̧'a̧nä̧ a̧mo̧nä̧ ya̧'ä̧huä̧'chö̧ jiähua'a jä̧'i̧nö̧'a̧nö̧ ji̧nä̧u̧do. ¹⁵ Ja̧'hua̧nö̧ ja̧'a̧ yo̧ȩi̧ pä'ö mo̧ro̧ päi'a'a ángeles huotömä Lotrö pä̧i̧cu̧nä̧nö̧ pä'inätödo: ―Jurunänö ä̧rä̧mi̧'ö̧ cui̧tti̧mö̧ tta̧ju̧ru̧'i̧nä̧, cui̧tti̧mö̧rö̧'i̧nä̧ pȩnȩ ka̧cuä̧tö̧rö̧ ȩmo̧po̧'ö̧ rä'opächi, ucu tocue'ö juiyäcua'anö, ötahuiyä be'epäjipö ticuomenä―. ¹⁶ Ja̧'hua̧nö̧ ja̧'a̧nä̧ Lot ji̧nä̧ a̧'u̧cua̧'a̧ hui̧rä̧cui̧pi̧nö̧do. U̧mä̧tö̧mä̧ Lot u̧mö̧ttö̧'i̧nä̧, i̧tti̧mö̧ tta̧ju̧ ku̧mö̧ttö̧'i̧nä̧, i̧tti̧mö̧ nä̧tö̧ ta̧ju̧ ttu̧mö̧ttö̧'i̧nä̧ 'chu'ädi'ö, ttȩmi̧pi̧nä̧u̧do. Ötahuiyättö oto ttu̧ju̧ni̧nä̧u̧do. Ja̧'hua̧nö̧ jȩpi̧nä̧tö̧do u̧mä̧tö̧, Tu̧ru̧hua̧ Dios Lotrö re rö̧jö̧nä̧ toa'attö. ¹⁷ Jahuätörö ȩmi̧pä̧jä̧tö̧'cotö, ya̧tȩ Lotrö pä'inödo: ―Jopö tö'ipächi'i cu̧ji̧pa̧ pä'ö. Cuo'ca'acumä kärächi'ö tocu'oca'a. De'a pä̧mä̧ra'acumä cua̧'cua̧ cu̧huȩnä̧rä̧'. Inähuära̧'a̧cu̧tä̧ tö'ipächi'i, tocue'ö juiyäcua'anö―. ¹⁸ Ja̧'hua̧nö̧ ä̧ju̧cu̧ Lot päinä̧u̧do: ―Isocö churuhuotö. ¹⁹ Ucutu yorö'iso ttö cu̧mö̧huä̧ya̧rö̧ re rö̧jö̧nä̧ topö, chö̧ji̧pa̧ pä'ö adiu jȩpä̧jä̧tö̧jä̧. Ja̧'hua̧nö̧ ja̧'a̧nä̧ inähuära̧'a̧mä̧ tödipächö juiyö'a̧nö̧ ja̧'a̧, ttörö surojö 'cuäopomenä, 'corupädi'a'acu. ²⁰ Topätucui. Yȩnȩ ötahuiyä ji̧'qui̧cha̧jo̧mȩ tö'cö ka̧'a̧ ttö tödipächa pä'ö. Ja̧u̧ ötahuiyära̧'a̧tä̧ tödipächi'a hue'opo'ö icuätucuittö. Ja̧u̧mä̧ juiyo ji̧'qui̧cha̧jö̧ ötahuiyä. Ju̧huȩnȩ kä̧nö̧ chö̧ji̧pä̧cua̧sä̧― pä'inödo Lotmä. ²¹ Jahuätö ta̧ju̧ttö̧ ya̧tȩ ädätinäcudo: ―Ye jäcuhue'ömä jȩpö̧sä̧. Ju̧huȩnȩ ötahuiyä päcumä be'epäjipö icuocö chä̧cua̧sä̧. ²² Jurunä jopächi'i juhua'acutä. Ji̧'qui̧cha̧nö̧'i̧nä̧ jȩpo̧cö̧sä̧ yotä cui̧rȩbȩhui̧'o̧mȩ jubö päi'önä―. Ja̧u̧ ötahuiyä ji̧'qui̧cha̧jo̧mȩ i̧mi̧mä̧ micuina'ado Zoar pä'ö. ²³ Kä̧hua̧ täcö cäecuächi'a'a, Lotmä rȩbȩhui̧pi̧nö̧do Zoar ötahuiyära̧'a̧. ²⁴ Ja̧u̧nu̧ o'ca'a Tu̧ru̧hua̧ Dios mo̧ro̧jä̧ra̧'a̧ttö̧ Sodomanä'inä, Gomorranä'inä ocurä mo̧ö̧nä̧ hue'inödo. ²⁵ Ja̧'hua̧nö̧ pämäroppä ötahuiyä o'ca juiyönä be'epäjipö icuinödo. Ttö̧ja̧ ju̧huȩnȩ ka̧cuä̧tö̧rö̧'i̧nä̧, juhuorötä rȩjȩttö̧ bahuinö'inä be'epäjipö icuinödo Tu̧ru̧hua̧ Diosmä. ²⁶ Ja̧'hua̧nö̧ ja̧'a̧nä̧ Lot irecua, chutä o'ca'anä ichäjumä, kärächi'ö topinäjudo ko'ca'acu. Ja̧'hua̧nö̧ tojomenä, 'cäruäbö isä'catä päi'inäjudo. ²⁷ Mo̧ro̧ juomenä Abraham porächi'ö 'chi̧nö̧do Tu̧ru̧hua̧ Dios i̧jȩcuä̧jä̧jo̧mȩ. ²⁸ Sodoma ötahuiyära̧'a̧cu̧, Gomorra ötahuiyära̧'a̧cu̧, pämäroppära'acu toomenä, ocurä isoppa rȩjȩttö̧ 'chahuäda'atä topinödo, ocurä rö̧arättö cuo'ö 'chahuäda'a jä̧'i̧nö̧'a̧nö̧. ²⁹ Ja̧'hua̧nö̧ 'cuäopina'ado, Tö̧ä̧nä̧hua̧ Dios pämäroppä ötahuiyä be'epäjipö icuomenä. Tö̧ä̧nä̧hua̧ Dios Abrahamrö̧tä̧ amöcuädö, be'epäjipö icuomettömä Lotrötä rä'epö icuinödo, Lot ö̧jä̧'i̧jo̧mȩ ötahuiyä be'epäjipö icuomenä. ³⁰ Ja̧'hua̧nö̧ ja̧'a̧nä̧ Lotmä Zoarttö i̧tti̧mö̧ nä̧tö̧ ta̧ju̧cu̧ möä'cara̧'a̧cu̧ 'cha'achinö, juhua'amä Zoar ötahuiyänä ö̧ja̧ pä'ömä yecua'attö̧. Ja̧'hua̧nö̧ ja̧'a̧ttö̧ ja̧u̧mä̧ i̧tti̧mö̧ nä̧tö̧ ta̧ju̧cu̧ idoränä ki̧nö̧. ³¹ Ä̧cuo̧mȩnä̧ isajumä kijähuajuru pä'inä̧ju̧: Tä'omä buecuächö ja̧'a̧, pȩnȩmä̧ u̧mä̧tö̧mä̧ toome ujutu ttä'a'anö̧ huotömä pi̧jä̧nä̧ ka̧cuä̧tö̧ jȩttä̧'i̧ja̧'a̧nö̧mä̧. ³² Ichihuä, tä'orö vino aju ticuäja ja̧'hua̧nö̧ ajipö ja̧u̧cu̧ tä'äcuotöjä̧, ja̧'hua̧nö̧tä̧ ujutumä tä'o i̧tti̧mö̧ttö̧mä̧ yabonö yottähuächäcua'anö. ³³ Ja̧'hua̧nö̧ ja̧'a̧ttö̧ ja̧u̧ yodomä ttä'orö vino isoya aju icuinä̧tö̧. Ja̧'hua̧nö̧ aju tticuäja'a ä̧cuo̧mȩnä̧ isajumä do'ächi'ö kä'ocu ä'inä̧ju̧; ja̧u̧mä̧ jerupinö chutäcu kö̧'ä̧mä̧dä̧jo̧mȩmä̧ ja̧'hua̧ta̧'a̧nö̧ jahuäju kä̧rä̧mä̧chä̧jo̧mȩ'i̧nä̧. ³⁴ Ja̧u̧tä̧ mo̧ro̧ ittiju ä̧huo̧mȩnä̧ isajumä̧ hueinä̧ju̧ kijäcuajuru: '' A̧ju̧hui̧, mo̧ro̧ yodomä̧ chäocu ä'äjusä. ja̧'hua̧ta̧nö̧ jitä yodonä̧jä̧ vino acunä̧ jȩtä̧ru̧. ja̧'hua̧nö̧ jȩpo̧ docuächa pä'ö ja̧'a̧ ja̧u̧cu̧ cuä'a pä'ö, ja̧'hua̧'nö̧ jȩttö̧tö̧tä̧ ujutu tä'o jähuajäi̧'mä̧ ttö̧ji̧ pä̧cuä̧huo̧ttö̧jä̧.'' ³⁵ ja̧'hua̧'a̧nö̧ tä'orö vino isoya acunä̧ jȩpi̧nä̧tö̧ ja̧u̧ noche yodomä̧, ja̧'hua̧tä̧nö̧tä̧ äi'nä̧ju̧ ki'äcuäjudä̧jä̧ ja̧u̧cu̧mä̧, yorisotä jerupinö̧ chutä 'ca'äamä̧, ja̧'hua̧ta̧nö̧tä̧ jerupinö 'cärä̧mä̧chä̧'a̧nä̧. ³⁶ ja̧hua̧nö̧tä̧ lot i̧tti̧mo̧ päjättö tä̧ju̧cuä yottö mu̧chottö juoinättö̧ tä'ottö. ³⁷ ä̧huo̧mȩnä̧ ittijumä̧ o'cajuoi'nä̧ju̧ uboru, ja̧u̧'ro̧mä̧ oi'nä̧ju̧ Moab pä'ö. ja̧u̧mä̧ Moabita jitä mo̧ro̧ ka̧cua̧ttö̧ ttä̧'a̧dö̧mi̧jä̧, ³⁸ ja̧u̧nö̧ o'ca ittijui'inä, ja̧'hua̧ta̧nö̧ i̧tti̧cu̧ kichinä̧cu̧ uburu, ja̧'hua̧nö̧tö̧ i̧mi̧mä̧ oi'näju̧ Ben-amni. ja̧u̧i̧'nä̧ ja̧ ja̧'hua̧nö̧tä̧ Amonitas ttö̧ja̧ jitä mo̧ro̧ ka̧cuä̧ttö̧ ta̧do̧ minä'ä̧ ja̧'a̧.