¹ Pi̧yȩ ja̧'a̧ huo̧juȩcuä̧ ttö̧ja̧sa̧, David Jerusalénnä ru̧hua̧ jö̧nä̧ hue'inö i̧tti̧ i̧huȩnȩmä̧. ² Huo̧juȩcuä̧ ttö̧ja̧sa̧mä̧ pi̧yȩ pä'ö. "Ajiya isoppa jä̧'i̧nö̧'a̧nö̧, kä̧ru̧'coppa kä̧ru̧'cohua'a jä̧'i̧nö̧'a̧nö̧, o'cajuiyönätä̧ toepächä̧cuȩ, jäecuä huȩnȩtä̧ ku̧ni̧pö̧. ³ ¿Däje ppädötä ttu̧ju̧nä̧rä̧cua̧'a̧ttö̧ kä̧hua̧ i̧dȩa̧'a̧ kä̧nö̧ o'cajuiyönä aditö ka̧cuä̧tö̧mä̧? ⁴ Jitä ka̧cuä̧tö̧mä̧ 'corujuottächa'anä ja̧'hua̧ta̧'a̧nö̧ korotömä̧ a̧'cua̧rö̧ ka̧cuä̧tö̧, ja̧'hua̧nö̧ 'cuäopa'anä pi̧jä̧ rȩjȩmä̧ 'cuäopönä̧tä̧ kä̧cuä̧jä̧. ⁵ Mo̧ro̧ kä̧hua̧mä̧ rä'opö'ca̧ ma̧'ä̧chö̧ ja̧'hua̧ta̧nö̧ pä'äjita'anö räopa pä'ö jurunä̧ 'chö̧. ⁶ Kä̧ru̧'coppamä kä̧hua̧ u'ohuecu ppöoppa juhua'atäcu kä̧hua̧ u̧huo̧jua̧'a̧cu̧ mo̧ruhuoppa, 'cuäopönä̧tä̧ oto 'chä̧nö̧ rä̧nö̧ kä̧ru̧'co̧hua̧'a̧nä̧ pä'äjita'anö̧ ppa̧huä̧cho̧ppa. ⁷ O'cajuiyönä̧ ajehuiyämä̧ ajecu suhuäda'a, ja'hua̧nö̧ ja̧'a̧nä̧ yorisotä suhuädio'ca'a ajemä̧. juȩnȩcu̧ ajehuiya ka̧cuo̧mȩcu̧mä̧ 'cha̧'a̧, juȩnȩ pä'äjita'a̧nö̧tä̧ ppa̧huä̧chä̧'a. ⁸ O'cajuiyönä̧ juiyuhuächötä ja̧'a̧, ya̧tȩ'i̧nä̧ jiäu juiyönä̧tä̧. Tti'äriyänämä̧ tottö juiyönätä̧, ttä̧ja̧hui̧yä̧huä̧nä̧'inä̧ adiu tä̧ju̧cu̧ juiyönä̧tä̧. ⁹ Ji̧yȩtȩ ä'coji ka̧cui̧nö̧mä̧, ja̧u̧tä̧tä̧ kä̧cua̧'a̧, ja̧'hua̧ta̧nö̧ jiyȩtȩ jȩ'cui̧nö̧mä̧, pä'äjita̧'a̧nö̧ jȩttä̧cuȩ ja̧'a̧. yorisotä juiya'a jareömä̧ ka̧hua̧ i̧dȩa̧'a̧dä̧ttö̧mä̧. ¹⁰ ¿Ji̧yȩtȩ ka̧'a̧ pättö'anö jö̧: Topittö pi̧yȩ ja̧'a̧ jareömä̧? korojuei ka̧cu̧mä̧ täbocutä päi'önä̧ ka̧cui̧'ä̧nö̧ ja̧'a̧, mo̧ täbocutä päi'önä recuomo̧ro̧ ujutö ttö̧jä̧cua̧'a̧ ä'cojitä ka̧cui̧nö̧. ¹¹ Täbojähuä cuäopinö̧mä̧ ya̧te'inä a̧mö̧cuädömä̧ toa'a, ja̧'hua̧ta̧nö̧ ji̧yȩtȩ recuo ji̧nö̧ o'ca'a cuäopinö̧mä̧, juhua'atäcu ja̧u̧tä̧ ja̧'a̧ 'cuä̧o̧pä̧cuȩmä̧, ja̧u̧'i̧nä̧ a̧mö̧cuädäcuähuocö jä̧cuȩ.'' ¹² Ttömä huo̧jȩcuä̧ i̧sa̧sä̧, ja̧'hua̧ta̧nö̧ Israelttömä ucuo ru̧hua̧ pä'inä'inä ki̧nö̧sä̧ Jerusalén'nä̧mä̧. ¹³ Ttö chamucuädome su̧ppȩnö̧ jö̧nä̧ iyähuinösä̧ susa pä'ö huo̧jȩcu̧nä̧ huo̧ji̧cuä̧ pi̧jä̧nä̧ kä̧nö̧ jȩttö̧. Ja̧u̧ susumä adicuä amä'cö ja̧'a̧ Diostä iyinö ttö̧ja̧rö̧ ttamucuädiyarö pä'ö. ¹⁴ Ttö topösä o'cajuiyönä kä̧cua̧ i̧dȩ'a̧cu̧ ko̧cu̧nä̧ aditinömä, ja̧'hua̧ta̧nö̧ topi, ja̧u̧ o'cajuiyönämä isoppa 'cua̧rö̧nä̧tä̧ jö̧ ja̧'hua̧ta̧nö̧ juoppa chuädö tta̧cua̧rö̧'a̧nö̧ jö̧ttö̧mä̧. ¹⁵ ¡Suahuacuächömä juettepa pä'ö juiyö! ¡Toeächömä pa̧cuä̧mä juiyö!. ¹⁶ Ttötä cha̧mo̧nä̧ chami so'quicu ucuocu pä'inösä̧: ''Topi, Jerusalén'nä ä̧cuo̧mȩnä̧ ki̧nä̧ttö̧ttö̧'i̧nä̧ abonänö huo̧jä̧cuä̧ ku̧nä̧rö̧sä̧ ttö̧mä̧. Ttö chamucuädönämä topä'ijösä rö̧i̧'ö̧nä̧ huo̧jä̧cuä̧'inä ja̧'hua̧ta̧nö̧ ttu̧ȩpä̧rä̧cuä̧cuä̧'inä. ¹⁷ ''Ja̧'hua̧nö̧ ja̧'a̧ttö̧, ttömä chu̧huo̧ji̧'a̧ pä'ö jȩpi̧nä̧sä̧ chamiso'qui jacuättömä̧ huo̧jä̧cuä̧'inä ttu̧ttȩpä̧ro̧ca̧'a̧ jȩä̧cuä̧cuä̧'inä micuähuoca'a päcuä'inä. Ttömä pi̧yȩmä̧ huo̧jä̧chi̧'i̧nö̧sä̧ sä̧ru̧'cu̧ isoppa tta̧tta̧ra̧ pä̧'ö̧ jȩtta̧'a̧ 'cua̧rö̧nä̧tä̧ ja̧'a̧pä'ö. ¹⁸ Rö̧ä̧nä̧ huo̧jä̧cuä̧mä̧ tteseunämä rä̧bȩcuä̧huä̧huo̧'cö̧, ja̧'hua̧ta̧nö̧ huo̧jä̧cuä̧mä̧ rö̧ä̧cha̧'anä barahuö'inä rö̧ä̧cha̧'a̧.