¹ Joacim Judáttö huäbodäcuä a̧'ȩ jo̧mȩnä̧ päi'önä ruhuo hueö pä̧nä̧, Nabucodosortä Babilonia rȩjȩnä̧ ruhuo hueömä̧ Jerusalénra̧'a̧ ichinö ja̧'hua̧nö̧ ichi'ömä ötahuiyä jäyänä tto'epö kä̧mä̧di̧nö̧ ajiya ka̧cuo̧mȩ'i̧nä̧ o'cajuiyötä. ² TÖ̧Ä̧NÄ̧HUA̧MÄ̧ Nabucodosorö, Judáttö ru̧hua̧ Joacimcu̧ rohuäu isojuoepönä ppä'ädinö̧ ja̧'hua̧ta̧'a̧nö̧ Dios ö̧jo̧de jacuä ka̧cu̧ ro̧ö̧'i̧nä̧ i'cächinö. Ja̧u̧mä̧ Babilonia rȩjȩra̧'a̧ ö̧ä̧nä̧hua̧ ö̧jo̧decu i'cächinö ja̧'hua̧nö̧ icächömä rö̧ä̧nä̧ micuäu ro̧ö̧ jä̧ji̧mä̧ ö̧ä̧nä̧hua̧ ö̧jo̧mȩ do'ädö ku̧ni̧nö̧. ³ Ru̧hua̧mä̧ Aspenazcu̧ ucuocuinö̧ u̧mö̧huä̧ya̧ su̧ru̧do̧u̧ tturuhuotöttö ucuo ru̧hua̧cu̧, Israel ttö̧ja̧ttö̧mä̧ yotucu pönä̧rö̧ i'cächiyarö pä'ö, ru̧hua̧ ahuaruhuä'i̧nä̧ ja̧'hua̧ta̧'a̧nö̧ ruhuotö jö̧nä̧ hotörö'i̧nä̧, ⁴ u̧mä̧tö̧ mö̧ä̧yotö surojö jui'ätö a̧'cua̧cuä̧tö̧rö̧, huo̧juä̧huä̧mä̧ o'cajuiyötä huo̧juä̧tö̧rö̧, huo̧jui̧'ä̧cuä̧huä̧'i̧nä̧ ttu̧huȩpä̧ri̧'ä̧cuä̧huä̧'i̧nä̧ ja̧'hua̧ta̧'a̧nö̧ ruhuodenä'i̧nä̧ ttadita pä'ömä̧ jo̧mȩnä̧ pojopö ku̧nä̧huo̧tö̧ ji̧a̧'a̧. Ja̧u̧mä̧ jahuätörömä Babilnia ttö̧ja̧ tti̧huȩyu̧tö̧'i̧nä̧ tti̧huȩnȩ'i̧nä̧ u̧huo̧juȩta̧ pä'ötä ji̧na̧'a̧. ⁵ Ru̧hua̧mä̧ u̧cuä̧ttö̧ a̧'u̧cu̧nä̧ mo̧ro̧ji̧nö̧ta'anö iyinä̧u̧ ja̧'hua̧ta̧'a̧nö̧ vino isoya ahuoyattö'inä̧ a̧'u̧cu̧nä̧. Pitö möäyotömä huäbodäcuä a̧'ȩ jo̧mȩnä̧ ttu̧huo̧juȩtä̧cuo̧tö̧ ji̧na̧'a̧ ja̧'hua̧ta̧'a̧nö̧ ja̧u̧ o'ca'amä ru̧hua̧rö̧ u̧mö̧huäyotö jö̧nä̧ ttadita pä'ö. ⁶ Pitöcu ca̧cui̧nä̧tö̧mä̧, Daniel'inä̧, Ananias'inä̧, Misael'inä̧ Ja̧'hua̧ta̧'a̧nö̧ Azarias'inä̧ yotöcupunä̧mä̧ Judá ttö̧ja̧'i̧nä̧ ji̧nä̧. ⁷ Ja̧u̧ ru̧hua̧mä̧ i̧mi̧nä̧ oinä̧cu̧: Danielrömä̧ Beltsasar pä'ö; Ananiasrö̧mä̧ Sadrac pä'ö, Misaelrömä̧ Mesac, Ja̧'hua̧ta̧'a̧nö̧ Azariasrömä̧ Abed Nego pä'ö oinö̧ i̧mi̧nä̧. ⁸ Ja̧'hua̧'a̧nö̧ ja̧'a̧ Danielmä̧ chutä a̧mö̧nä̧tä̧ a̧mö̧cuähuinö̧ Ru̧hua̧ u̧huȩ'inä̧ acu vino'inä̧ cua̧nö̧ surojuepa'acu pä'ö Ja̧'hua̧'a̧nö̧ ja̧'ä̧ttö̧ ja̧u̧mä̧ jäepinö̧ Su̧ro̧do̧u̧tö̧u̧ ä̧cuo̧mȩnä̧ uhuo ru̧hua̧rö̧ surojuohuiya pä'ömä̧. ⁹ Diosmä̧ Su̧ro̧do̧u̧ ttö̧ru̧hua̧rö̧'i̧nä̧ adiu a̧mö̧cuädönä̧ jȩpi̧nö̧. ¹⁰ Su̧ro̧do̧u̧ ttö̧ru̧cua̧mä̧ pä'nö Danielrö: ttömä̧ yȩ'ȩcuä̧sä̧ chu̧ro̧cuä̧ ru̧hua̧rö̧mä̧ repedäcuja̧tö̧. Ja̧u̧mä̧ jȩpö̧ ku̧nä̧ji̧ Ucuturumä̧ cu̧huȩ'i̧nä̧ cuä̧huȩ'i̧nä̧ ku̧nä̧ cu̧jä̧tu̧cua̧ pä'ö. ¿tocu pä'ö ucutumä̧ korotö mu̧äyotötö ucutu tä ttere a̧jȩ ku̧nä̧rä̧tö̧'i̧nä̧ abonä̧nö̧ juotijä̧ttö̧? Ja̧u̧ ru̧hua̧mä̧ huea pä'ö ja̧'a̧ ucutu jähuänä̧ chuyu 'cui'opu tticuä pä'ö." ¹¹ Ja̧'hua̧nö̧ ja̧'a̧ Daniel ucuocuinö ru̧hua̧ u̧mu̧huä̧ya̧ su̧ru̧da̧u̧ ttu̧ru̧hua̧ juȩ'i̧pa̧cu̧ Danielrö'inä, Ananíasrö'inä, Misaelrö'inä ja̧'hua̧ta̧nö̧ Azariasrö'inä tta̧hua̧ra̧ pä'ö huȩä̧cua̧cu̧. ¹² Ja̧u̧ pä'inö: "Ppä'ädi, cu̧mu̧huäyotörö to̧mu̧rȩ mo̧ro̧ jo̧mȩ ka̧cuä̧mu̧ topö. Tucua pä'ömä iyitö ojiyätä ja̧'hua̧ta̧nö̧ tacua pä'ömä ajiyatä. ¹³ Ja̧u̧nu̧ o'ca'amä ujutu tidepäcu yoretö to'cua muä̧yotö ru̧hua̧ u̧cuä̧ttö̧ cuätö ttidepäcu, ja̧'hua̧nö̧ ja̧'a̧ttö̧ ucu cumuhuäyotöromä, tocu'utä ja̧'a̧." ¹⁴ Ja̧'hua̧nö̧ ja̧'a̧ttö̧ ru̧hua̧ u̧mu̧huä̧ya̧mä̧ esecui̧nö̧ ja̧u̧cu̧ to̧mu̧rȩ mo̧ro̧ jo̧mȩ ka̧huä̧mu̧ topinö. ¹⁵ To̧mu̧rȩ mo̧ro̧ jä̧ji̧ o'camä jä'huätö ttidepänämä märichei juiyönä huinättö̧, ja̧'hua̧ta̧nö̧ tu̧cuä̧ttö̧'i̧nä̧ juiyo adiunä huinättö ru̧hua̧ u̧cuä̧ adihuä juäi cuätöttö'inä abonänö. ¹⁶ Ja̧'hua̧nö̧ ja̧'a̧nä̧ ru̧hua̧ u̧mu̧huä̧ya̧mä̧ adihuä juäitä ȩpi̧nö̧ ja̧'hua̧ta̧nö̧ a̧huä̧ vino'inä ja̧'hua̧nö̧ ja̧'a̧nä̧ ja'huätörömä iyinö ojiyätä. ¹⁷ Pitö pa̧ja̧cuä̧nö̧ huotö muäyätömä, Dios i̧yi̧nä̧u̧ huo̧juä̧huä̧ttö̧'i̧nä̧ ja̧'hua̧ta̧'a̧nö̧ huȩyu̧cuä̧ ucuocu'inä ttu̧ttȩpä̧rö̧nä̧, ja̧'hua̧nö̧ ja̧'a̧ttö̧ Danielmä u̧huo̧ju̧nä̧ ji̧nä̧cu̧ u̧'cuo̧ti̧nä̧ i̧jȩcu̧'i̧nä̧. ¹⁸ Ru̧hua̧ jahuätö dottächa pä'ö pätetö u̧ju̧ni̧no̧mȩ beipächomenä, su̧ro̧do̧u̧ ttu̧ru̧hua̧mä̧ i'chächinö Nabucodonosor ä'ca jo̧mȩ. ¹⁹ Ru̧hua̧ ucuocuinö ja'huätörö, ja'huätöttömä ya̧tȩ'i̧nä̧ Daniél jö̧'a̧nä̧ hua̧mä̧ toina'a, Ananias'inä Misael'inä ja̧'hua̧ta̧'a̧nö̧ Azarías'inä. Ja'huätömä ru̧hua̧ ä'cajome ä̧rä̧mi̧'ö̧ ko̧cui̧nä̧tö̧, jo̧mȩnö̧ ocuo tettähuarö pä'ö. ²⁰ O'cajuiyönä ttu̧'ȩpä̧rö̧nö̧ huo̧juä̧huä̧ ru̧hua̧ jȩo̧mȩnä̧mä̧, juiyomettö yapare räopönä jȩpä̧ttö̧ttö̧'i̧nä̧ to̧mu̧rȩnö̧ jo̧mȩ yabonänö adiunä pätta'a po̧cui̧pi̧nö ja̧'hua̧ta̧'a̧nö̧ 'corujuo'ächinätu̧cu̧ ucuocuätöjä pä'ätucu'inä, ruhuo hueome jacuä ko̧cuä̧tö̧ttö̧mä̧. ²¹ Yaute a̧'ȩ jo̧mȩtä̧ ki̧nä̧ Danielmä̧ ru̧hua̧ Ciro huea'amä.