¹ Recuo ji̧nö̧ o'ca'a 'cuäopina'a Nahas, Amonitas ttu̧ru̧hua̧ 'corujuo'ächinö, ja̧u̧nu̧ o'ca'amä i̧tti̧tä̧ ru̧hua̧ päi'önä ki̧nö̧ jä'o ö̧jä̧'i̧jo̧mȩ. ² Davidmä pä'inö: " Adiutä jȩchä̧cua̧sä̧ ja̧u̧ Hanún i̧tti̧ Nahasrö̧mä̧ ja̧u̧ jä'ömä ttörö adiunätä̧ jȩi̧na̧'a̧ttö̧." Ja̧'hua̧nö̧ ja̧'a̧ttö̧ Davidmä u̧mu̧huäyotörö huȩnȩ jittähua pä'ö hue'inö ja̧u̧ru̧ topö tti̧'cha̧ pä'ö a̧'cua̧ tta̧huȩcuo̧mȩ. David u̧mu̧hhuäyotömä dodepinätö Amonitas tti̧rȩjä̧ ra̧'a̧ Hanún a̧'cua̧tta̧huȩcuo̧mȩ ttu̧cuo̧cuä̧ra̧ pä'ö. ³ Ja̧'hua̧nö̧ ja̧'a̧nä̧ Amonitatö ucuo ttö̧ja̧mä̧ Hanúnru̧ pä'inätö̧: "¿Davidmä cuä'o minärö̧ ucuotö jȩa̧'a̧ pä'öjä tä̧ji̧ u̧mu̧huäyotörö huea'amä? ¿Ja̧'hua̧nö̧ jo̧ca̧'a̧ u̧mu̧huäyotömä ti̧rȩjä̧ usäu ichätötä̧ttö̧ ja̧u̧nu̧ o'comenämä ti̧rȩjä̧ 'chottipapä'ö?" ⁴ Ja̧'hua̧nö̧ ja̧'a̧ttö̧ Hanúnmä David u̧mu̧huäyotörö 'chuhuädinö, ttuhuo'che'inä kirö icuinö, ttö̧'ca̧tä̧huä̧ti̧yu̧mä̧ ttäcättö kä̧mä̧dö̧ 'cui'ö icu hue'ö icuinäu ppa̧ttä̧cha̧ pä'ö hue'ö i̧cui̧nä̧u̧. ⁵ 'Cuäopaji huȩnȩ Davidrö jitähuomenämä, huȩnȩ ji'ahuätörö hue'ö icuinö jahuätörö jittähuaja pä'ö rö'änätä dä'ä ttuttome. Jaa̧u̧ päinäu̧: Jericora̧'a̧tä̧ ka̧cuä̧tu̧cui̧ cuä'cähuiyä'chetucu bahuo o'ca'atä pä'äji ta'anö cuichätucua, ja̧'hua̧nö̧ ja̧'a̧ttö̧ ppa̧'a̧chä̧tu̧cui̧." ⁶ Amón ttö̧ja̧ David rö̧'ä̧nä̧ a̧'cua̧ ttä̧huȩcuä̧ji̧ huȩnȩ ttä̧ju̧cuo̧mȩnä̧, Hanún ahuaruhuämä Amón ttö̧ja̧cu̧mä̧ hue'inätö̧ mil talento pärätä jo̧mȩnä̧ Arameo ttö̧ja̧rö̧ 32mil jo̧mȩnä̧ caruquiyä ttö'ärohua pä'ö, ja̧'hua̧ta̧'a̧nö̧ ca̧hua̧yu̧tu̧nä̧ huä̧ttö̧tä̧ Aram ttä̧ja̧mä̧,Maacattö'inä ja̧'hua̧ta̧'a̧nö̧ Sobattö'inä. ⁷ Jahuätömä 32mil jo̧mȩnä̧ mi̧tö päröhuinätö Maaca ru̧hua̧ttö̧ ja̧'hua̧ta̧'a̧nä̧ ahuaruhuä Medebattö ichäjättötö'inä. Amon ttö̧ja̧mä̧ ji̧nä̧ yo̧mȩtȩ ca̧ca̧cu̧ ötahuiyä ttö̧ja̧cu̧ curä rohuäu rä'opinätö. ⁸ David pi̧yȩ huȩnȩ ä̧ju̧cu̧mä̧, hue'inä Joabrö u̧mu̧huäyotö su̧ro̧do̧u̧cu̧ jahuätörö topö i̧'chi̧yarö̧ pä'ö. ⁹ Amón ttö̧ja̧mä̧ ötahuiyä apate ä'ca jo̧mȩnö̧ tta̧'a̧rö̧ ko̧cui̧nä̧tö̧ curä ttörohuähua pä'ötä, korotö hue'ähuä ttö̧ja̧ ppättädätö pä'ö ichäjätömä kara'a meje'cara'atä ko̧cui̧nä̧tö̧. ¹⁰ Joab ä'canä curä ttörohuähua pä'ö isäbänä ttö̧ja̧ to'omenämä, su̧ro̧do̧u̧ ä'canä ko̧cuä̧tö̧ttö̧, Israelttö su̧ro̧do̧u̧ huo̧juä̧tö̧ttö̧ pojopö ku̧ni̧nö̧ ja̧u̧nu̧ o'ca'a Arameos ttöjacu örohuähua pä'ö. ¹¹ Korotö su̧ro̧do̧u̧mä̧, i̧jä̧hua̧ Abisairö hue'inö korotä su̧ro̧do̧u̧ru̧ o'ipö i̧sä̧mä̧nä̧ ku̧nu̧ Amón u̧mu̧huäyätö su̧ro̧do̧u̧cu̧ ttörohuähua pä'ö. ¹² Joabmä pä'inö: "Arameos ttöro rohuäu ttujuru'uttumä, Abisai ucumä ttörö ppä'ädö cui̧chä̧cua̧jä̧. Ja̧'hua̧nö̧ ja̧'a̧nä̧ Amon ttö̧ja̧ ucuru rohuäu ttujuru'uttumä, ttötä ucuru ppä'ädö chi̧chä̧cua̧sä̧. ¹³ Juruhuätucui tujuru ti̧jȩpä̧tu̧cua̧ tahuaruhuärö amucuädö, Dios idepiju jo̧nä̧ huotömä TTÖ̧Ä̧NÄ̧HUA̧TÄ̧ jȩa̧cua̧ churu pä̧huä̧rö̧jo̧mȩnä̧ ujuturumä. ¹⁴ Ja̧'hua̧nö̧ ja̧'a̧ttö̧ Joab u̧mu̧huäyotö su̧ro̧do̧u̧mä̧ 'chinätö Arameos ttö̧ja̧cu̧ curä ttörohuähua pä'ö, isäbänä ko̧cuä̧mi̧nä̧tö̧, tti̧'chä̧u̧mä̧ ye'ecui'ö tö'ipächinätö. ¹⁵ Amón u̧mu̧huäyotö su̧ro̧do̧u̧mä̧ to̧pi̧nä̧tö̧ Aran su̧ro̧do̧u̧ tottipächa'a, ja'huätö'inä tö'ipächinätö Joab i̧jä̧hua̧ abisaitömä, ja̧'hua̧nö̧tä̧ ppa̧'a̧chi̧nä̧tö̧ ötahuiyära'a. Ja̧'hua̧nö̧ ja̧'a̧ttö̧ Joabmä ppa̧'a̧chi̧nä̧ Amón ttö̧ja̧cu̧tä̧ juorötä ppa̧'a̧chi̧nö̧ Jerusalernra̧'a̧cu̧. ¹⁶ Israel ttö̧ja̧rö̧ rohuäu ttiyähuäji amucuädinätö Arán ttö̧ja̧mä̧, Ja̧'hua̧nö̧ jä̧u̧ Eufrate aje pä̧tȩcuä̧nö̧ ko̧cuä̧tö̧rö̧ jättepaja pä'ö hue'inätö rohuäu ppättädätö pä'ö juȩnȩ hue'ähuä ru̧hua̧ Hadac-Ezer u̧mu̧huä̧yä̧ Sofac ji̧na̧'a̧ su̧ro̧do̧u̧ ttu̧ru̧hua̧mä̧. ¹⁷ Ja̧'hua̧nö̧ 'cuäopaji Davib'rö jittähuomenä, Israel ttö̧ja̧ o'catoi'önä ca̧ca̧ti̧'ö̧ Joraán aje'inä 'cuä'o'ö 'chi̧nä̧ ja'huätö ttö̧jo̧cua̧'a̧cu̧. Jo̧mȩnö̧ su̧ro̧do̧u̧ru̧ pojopö ku̧ni̧nä̧ Arameos ttö̧ja̧cu̧ örohuähua pä'ö ja̧hua̧nö̧tä̧ rohuähuinätö ja̧u̧cu̧mä̧. ¹⁸ Arán su̧ro̧do̧u̧ dö'ecuächinätö Israel su̧ro̧do̧u̧cu̧ ttörohuähuomenä, Ja̧u̧nu̧ pä̧nä̧ Davibmä siete milnö Arameos jo̧mȩ cuä'äu icuinä caruquiyänä 'chä̧tö̧rö̧ ja̧'hua̧ta̧'a̧nö̧ cuarenta milnö ttö̧jä̧pö̧nä̧ 'chä̧tö̧rö̧. Su̧ro̧do̧u̧ ttu̧ru̧hua̧ Sofac'rö'inä cuä'ö icuinö. ¹⁹ O'catoi'önä ruhuo jue'ätö Hadad Ezer u̧mu̧huäyotömä huo̧juä̧hui̧nä̧tö̧ Israel ttö̧ja̧mä̧ ujuturumä rohuäu tticuäjä'a pä'ö, Ja̧'hua̧nö̧ ja̧'a̧ttö̧ Davibcu esecu hueöta'anö aditö ko̧cui̧nä̧tö̧. Ja̧'hua̧nö̧ ja̧'a̧ttö̧ Aran ttö̧ja̧mä̧ Amón ttö̧ja̧rö̧mä̧ ppättäda pä'ocotö pinätö̧.