¹ Ja̧'hua̧nö̧ jä̧ji̧ o'ca'a David ojusodenä ö̧jo̧mȩnä̧ profeta Natánrö pä'inö: Adiunä jo̧co̧cu̧sä̧ ttömä chojusode cedro dauhuiyä adiu juäittö adicuodenä chö̧ja̧'a̧nä̧ TÖ̧Ä̧NÄ̧HUA̧ Dios hueähuä huȩnȩ ȩco̧ca̧mä̧ pö̧jä̧ta̧ ttoecua'atä ka̧'a̧. ² Ja̧'hua̧nö̧ ja̧'a̧ profeta Natán ädätö pä'inö: ya̧nä̧ cuamiso'qui jacuättö cuamöcuädäjimä jȩpi̧, Diosmä ucutäcu kö̧. ³ Ja̧hu̧nö̧ ja̧'a̧nä̧ ja̧u̧nö̧ yodotä TÖ̧Ä̧NÄ̧HUA̧ Dios i̧huȩnȩ ichina Natanrö pa̧'a̧nö̧ kä̧nö̧: ⁴ "Täi ja̧hua̧ta̧'nö̧ chö̧mö̧huä̧ya̧ David'rö jiähui: pi̧yȩ ja̧'a̧ TÖ̧Ä̧NÄ̧HUA̧ päömä: ucumä tu̧'o̧cö̧ jä̧cua̧jä̧ ttö chö̧jä̧cuode isodemä. ⁵ Ttömä ko̧cu peiyösä isodenämä Israel ttö̧ja̧rö̧ ttö chicächinö mo̧ro̧tä̧ kä̧mä̧dö̧ jitä mo̧ro̧ jubö päiönä. Ja̧hua̧nö̧ jo̧ca̧'a̧tä̧ ttömä pö̧ja̧ta̧ttö̧ adicuäba isodenätä̧ kȩi̧yö̧sä̧ kuicu iyähuometä̧, ri̧ä̧nä̧ koromenö pönätä̧. ⁶ O'ca juiyönä tti̧chö̧ o̧du̧nä̧mä̧ ttömä chȩi̧yö̧sä̧ o'catoinä Israel ttö̧'quȩtȩnä̧tä̧, ¿Ttö ya'atenä jiähuinösä tä̧ji̧ korojue Israel tturuhuotuttö korotö ttö chu̧mu̧huäyotörö tta̧huä̧rä̧cuä̧huä̧ ttö̧ja̧ pädeiyahuö̧rö̧mä̧ pä'ö kä̧nö̧". ¿Dä̧bö̧ pä'ö 'ti̧cuä̧tu̧cuo̧ca̧jä̧ttö̧ cedrottö ttö chojusode?" ⁷ "Ja̧hua̧nö̧ ja̧'a̧ttö̧ chömöhuäya̧ David'rö jiähui: "Pi̧yȩ ja̧'a̧ TÖ̧Ä̧NÄ̧HUA̧ Dios päömä: Ttömä mȩji̧yä̧'chettö rä'epö chicuinäcö̧jä̧, ohueha̧tö̧rö̧ tta̧cuä̧ro̧mȩttö̧, chidepiyu Israel ttö̧ja̧rö̧ hue'ö cö̧ja̧ pä'ö. ⁸ Ttömä ucucutä ki̧nö̧sä̧ cui̧cho̧mȩ jö̧ta̧'a̧nö̧ ja̧hua̧ta̧'a̧nö̧ o'ca toinä cuaboyoturö'inä cuä'camettö̧ be'epejö chicuinä̧ö̧, ja̧hua̧ta̧'a̧nö̧ ttömä jȩchä̧cua̧sä̧ ucu cui̧mi̧nä̧ pi̧jä̧nä̧ kä̧tö̧ tä̧mö̧ tti̧mi̧ 'cua̧rö̧nä̧. ⁹ Ttömä chö̧jö̧dä̧cua̧sä̧ ucurumä ji̧nȩtȩ chömöhuäyotö Israel ttö̧ja̧rö̧ ja̧hua̧ta̧'a̧nö̧ juȩnȩtä̧ chu̧ju̧nä̧cua̧'ö̧ juätömä jitötä tta̧mo̧nä̧ ttö̧jo̧mȩ ttö̧ja̧cua̧ pä'ö ja̧hua̧ta̧'a̧nö̧ mä̧'o̧pä̧rä̧cua̧huo̧tö̧ ttö̧ji̧yö̧nä̧. Yabocumä ttö̧ja̧ suropätö huȩtta̧ra̧nä̧ ko̧co̧tö̧ ttäcuotö, äcanä jȩttȩi̧nö̧'a̧nö̧mä̧. ¹⁰ Juätö jȩtti̧nö̧ta̧'a̧nö̧ ttö hue'ö chö̧jö̧ni̧nö̧ mo̧ro̧ jubö päiönä micuäönä pä'ätörö chidepiyö Israel ttö̧ja̧nä̧, Ja̧hua̧nö̧ ttömä o'catoinä cuaboyotörö huȩdä̧cua̧sä̧. Ja̧hua̧ta̧'a̧nö̧ pä̧dä̧cu̧jä̧ Ttö, CUI̧Ä̧NÄ̧HUA̧MÄ̧, isode 'tö̧'ö̧ chi̧yä̧cua̧jä̧. ¹¹ 'Cuäopäcua'a täcö cuä̧'o̧tu̧cu̧ cui̧hua̧ pä'ö mo̧ro̧ pä̧tȩcuä̧cho̧mȩnä̧, ttömä chäräbȩä̧cua̧sä̧, ucu cuo'canä cuahuäröhuä 'cotöttö ya̧tȩrö̧; ja̧hua̧ta̧'a̧nö̧ ucutä cua̧mo̧mnä̧ cuahuäröcuättö ya̧tȩ jä̧cua̧. ttömä öröhuo chö̧jö̧nä̧cua̧sä̧. ¹² Ja̧u̧mä̧ isode 'tö̧'ö̧ i̧yä̧cua̧ ttörö ja̧hua̧ta̧'a̧nö̧ ttömä uruhuo dȩä̧cä̧'i̧nä̧ 'cuäopönä chö̧jö̧nä̧cua̧sä̧. ¹³ Ttömä ja̧u̧ Jä'o päinä chö̧jä̧cua̧sä̧ ja̧hua̧ta̧'a̧nö̧ ja̧u̧mä̧ chi̧tti̧ jä̧cua̧'a̧. Ttömä jȩpö̧ icuocu chä̧cua̧sä̧ esecu chö̧jö̧ni̧nö̧ jueönä kä̧cuä̧huä̧ ja̧u̧nä̧mä̧. Saulrö jȩpö̧ chicuinö'anömä̧cö̧, ucu cuä'canä hue'inörö̧. ¹⁴ Ttö̧mä̧ chojusodenä chö̧jö̧nä̧cua̧ ja̧hua̧ta̧'a̧nö̧ churuhunä'inä 'cuäopönätä̧, ruhuo dȩä̧cä̧'i̧nä̧ 'cuäopönä kä̧cua̧'a̧." ¹⁵ Natanmä David'rö ucuocuinö ja̧hua̧ta̧'a̧nö̧ pi̧yȩ huȩnȩ o'ca juiyönä ji'ähuinö, ja̧hua̧nö̧tä̧ 'cuo̧ti̧nä̧ toäji o'ca juiyönä ji'ähuinö. ¹⁶ Ja̧hua̧nö̧ ru̧hua̧ David do'ächinö ja̧hua̧ta̧'a̧nö̧ TÖ̧Ä̧NÄ̧HUA̧ ä'ca jo̧mȩ pä̧mä̧di̧nö̧ pä'inö ja̧u̧mä̧: ¿Dichattö ttömä, CHÖ̧Ä̧NÄ̧HUA̧ Dios, ja̧hua̧ta̧'a̧nö̧ däje ja̧'a̧ttö̧ chahuäröhuä ttörö pȩnȩ jubö i'cächö cui̧ya̧ö̧mä̧? ¹⁷ Pi̧yȩmä̧ cuiä'camettö̧mä̧ ji̧'qui̧cha̧nö̧ jahuätä ja̧ Chu̧ru̧hua̧ Dios. Ucumä cö̧mö̧ä̧ya̧ ahuäröhuä ttötö'cö'inä ucuocuejiyä tta'cacu jähuä, ja̧hua̧ta̧'a̧nö̧ cui̧jȩpä̧cu̧sä̧ ucumä yodoji chahuäröhuä ttichäcuotörö, CHÖ̧Ä̧NÄ̧HUA̧ Dios. ¹⁸ ¿Däje ri̧ä̧nä̧ ttö, Davidmä päda pä'ö ja̧'a̧ttö̧ ucurumä? ucumä cö̧mö̧huä̧ya̧rö̧ ucuotö jȩpö̧ i̧jȩpȩji̧yä̧. Ucumä cö̧mö̧ä̧ya̧rö̧ iyeiyä adihuäjuei ji̧yȩtȩ. ¹⁹ CHÖ̧Ä̧NÄ̧HUA̧ cö̧mö̧huä̧ya̧rö̧ adihua pä'ömä, ja̧hua̧ta̧'a̧nö̧ ucutä cuamäcuadinö iso päi'a pä'ömä, ucumä jȩpȩi̧jä̧ pi̧yȩ ri̧ä̧nä̧ jähuä chieru juei cui̧jȩpa̧ pä'ö o'ca juiyönä cuaditähuä ucuo jähuä. ²⁰ CHÖ̧Ä̧NÄ̧HUA̧ ucuta'anö hua̧ ka̧ra̧mä̧ tohua'a, ja̧hua̧ta̧'a̧nö̧ ucuttö'inä ka̧ra̧mä̧ tohua'a, ujutu tä̧ju̧cuȩ iyänötä̧ 'cuäopönä. ²¹ Ja̧hua̧ta̧'a̧nö̧ ¿Pi̧jä̧nä̧mä̧ titö ttö̧ja̧ ja̧'a̧ttö̧ cömöhuäyotö Israel huotömä, ucutanö hua̧mä̧ ditä, Dios; Egipto rȩjȩttö̧ ppacuädinä̧ö̧ ucutä cuahuäröhuä 'cua̧rö̧nä̧, ucutä cui̧mi̧ jȩcua̧ pä'ö rö̧ä̧nä̧ jähuänä ja̧hua̧ta̧'a̧nö̧ ttierujuei jȩpö̧kä̧nö̧? Ucumä rö̧ä̧nä̧ ötahuiyä rä'epinöjä̧ cumuäyotö ttiä'camettö̧tä̧, Egipto rȩjȩttö̧ räcuepina̧ö̧tä̧. ²² Ucumä Israelttötä jȩpi̧nä̧jä̧. Cua̧mo̧nä̧ cuahuäröhuärö 'cuäopönätä̧ ja̧hua̧ta̧'a̧nö̧ ucu TÖ̧Ä̧NÄ̧HUA̧ Tu̧ru̧hua̧ Diosrä juo'ächinöjä̧. ²³ Ja̧hua̧nö̧ ja̧'a̧ttö̧, CHÖ̧Ä̧NÄ̧HUA̧ ucu jiäö kö̧nö̧ jȩcui̧nö̧mä̧ cö̧mö̧ä̧ya̧rö̧'i̧nä̧ ja̧hua̧ta̧'a̧nö̧ ahuäröhuärö'inä 'cuäopönätä̧ ka̧'a̧, ucutä cucuocuinö̧ta̧'a̧nö̧tä̧ jȩpi̧. ²⁴ Cui̧mi̧mä̧ 'cuäopönätä̧ ka̧'a̧ ja̧hua̧ta̧'a̧nö̧ ri̧a̧'a̧, ttö̧ja̧ pättacu pä'ö: TÖ̧Ä̧NÄ̧HUA̧ ju̧ru̧hua̧mä̧ Israel Ttu̧ru̧hua̧ Dios ja̧'a̧, chojuisodemä, David, cö̧mö̧huä̧ya̧ ojusodemä cuiä'cametä̧ ka̧'a̧nä̧. ²⁵ Ja̧hua̧nö̧tä̧ ucumä, chu̧ru̧hua̧ Dios cö̧mö̧hua̧ya̧rö̧mä̧ ieru juei i̧jȩpȩjä̧ isode cuaditacua pä'ö ucutä. Pi̧yȩ jähuä ja̧'a̧ttö̧ ttömä cö̧mö̧huä̧ya̧mä̧, po̧cui̧pȩji̧sä̧ ucuru jädepa pä'ö chujuru. ²⁶ Jitämä TÖ̧Ä̧NÄ̧HUA̧, ucutä ja̧'a̧ Diosmä, ja̧hua̧ta̧'a̧nö̧ pi̧yȩ adihu juei jȩpä̧ji̧jä̧ jiä'ö ku̧nu̧ cö̧mö̧huä̧ya̧tö̧: ²⁷ Cö̧mu̧huä̧ya̧ ojusode adiunä päcua pä'ö i̧cha̧ pä'ö, ucu CHÖ̧Ä̧NÄ̧HUA̧ adiunä pä'öku̧nȩji̧jä̧, ja̧hua̧ta̧'a̧nö̧ 'cuäopönätä̧ adiu pä'äcuätä jä̧cua̧".