¹ Davidmä chutä idepiyunä oju odehuiyä päi'önä aditinö. Ja̧u̧mä̧ jo̧mȩnö̧ jȩpö̧ ku̧ni̧nö̧ Dios esecuinö ȩco̧ca̧ kä̧cuo̧mȩ'i̧nö̧ ja̧'hua̧ta̧'a̧nö̧ ja̧u̧ kä̧cuode isode i̧sa̧ i̧jȩta̧ttö̧ 'tu̧'u̧ aditinö. ² Ja̧'hua̧nö̧ ja̧'a̧ Davidmä pä'inö: "Suro Levi ahuaruhuätä Dios esecuinö ȩco̧ca̧mä̧ ttu̧huä̧do̧hua̧ pä'ö ja̧'a̧, isopäi'önä jahuätömä TÖ̧Ä̧NÄ̧HUA̧ pojopö ȩmi̧nä̧u̧ ja̧'a̧ttö̧ TÖ̧Ä̧NÄ̧HUA̧ esecuinö ȩco̧ca̧ cuettäda pä'ö ja̧'hua̧ta̧'a̧nö̧ ja̧u̧tä̧ iäre 'cuäopönätä̧ a̧di̧tä̧rö̧ ttö̧ja̧ pä'ö." ³ Ja̧'hua̧nö̧ ja̧'a̧ Davidmä Jerusalén ötahuiyänä Israel ttö̧ja̧ o'catoi'önärö̧ ca̧ca̧ti̧ pi̧nö̧, TÖ̧Ä̧NÄ̧HUA̧ esecuinö ȩco̧ca̧ pä̧cuo̧mȩ aditö u̧ju̧ni̧no̧mȩcu̧ ttȩpi̧ya̧rö̧ pä'ö. ⁴ Davidmä Aarón i̧tti̧mö̧rö̧'i̧nä̧ ja̧'hua̧ta̧'a̧nö̧ Levi ahuaruhuä 'cotörö'inä ca̧ca̧ti̧pi̧nö̧. ⁵ Coat ahuaruhuä'cotöttö ttu̧ru̧hua̧mä̧ Uriel ji̧na̧'a̧, ja̧'hua̧ta̧'a̧nö̧ ahuaruhuä umätö̧mä̧ 120nö jo̧mȩnö̧ huinätö. ⁶ Merari ahuaruhuä'cotöttö ttu̧ru̧hua̧mä̧ Asaías ji̧na̧'a̧ ja̧'hua̧ta̧'a̧nö̧ ahuaruhuä u̧mätö̧mä̧ 220nö jo̧mȩnä̧ huinä̧tö̧. ⁷ Gersón ahuaruhuä'cotöttö ttu̧ru̧hua̧mä̧ Joel ji̧na̧'a̧ ja̧'hua̧ta̧'a̧nö̧ ahuaruhuä umätö̧mä̧ 130nö̧ jo̧mȩnö̧ huinätö. ⁸ Elizafán ahuaruhuä'cotöttö ttu̧ru̧hua̧mä̧ Semaías ji̧na̧'a̧, ahuaruhuä umätö̧mä̧ 200nö̧ jo̧mȩnä̧ huinätö̧. ⁹ Hebrón ahuaruhuä 'cotöttö ttu̧ru̧hua̧mä̧ Eliel ji̧na̧'a̧ ja̧'hua̧ta̧'a̧nö̧ ahuaruhuä u̧mä̧tö̧mä̧ 80nö̧ huinä̧tö̧. ¹⁰ Uziel ahuaruhuä 'cotöttö ttu̧ru̧hua̧mä̧ Aminadab ji̧na̧'a̧ ja̧'hua̧ta̧'a̧nö̧ ahuaruhuä u̧mä̧tö̧mä̧ 112nö̧ jo̧mȩnä̧ huinä̧tö̧. ¹¹ Davidmä sacerdote Sadocrö'inä Abiatarö'inä ä̧tȩpi̧nö̧ ja̧'hua̧ta̧'a̧nö̧ Levi ahuaruhuättömä, Urielrö'inä, Asaíasrö'inä, Joelrö'inä, Semaíasrö'inä, Elielrö'inä ja̧'hua̧ta̧'a̧nö̧ Aminadabrö'inä. ¹² Ja̧u̧mä̧ jahuätörö pä'inö: Ucutumä Levis ahuaruhuä tturuhuotöjä. Cua̧mö̧nä̧ pa̧ja̧tö̧ töcäu icuätucui ja̧'hua̧ta̧'a̧nö̧ cui̧jä̧hua̧tö̧rö̧'i̧nä̧, TÖ̧Ä̧NÄ̧HUA̧ esecuinö ȩco̧ca̧ 'chacuädätucuäcua'anö, ju̧huo̧ca̧ ka̧ pä'ö aditö chu̧ju̧ni̧no̧mȩcu̧. ¹³ Ucutumä ä'cojimä ȩpo̧co̧tö̧ pä'ijätöjä̧. Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ ucuturu ro̧'ȩpä̧ji̧, juhua'amä churutä ujutu tusoca'a jä̧ja̧'a̧ttö̧ ja̧'hua̧ta̧'a̧nö̧ hueinö huȩnȩ'i̧nä̧ tucuotocome jo̧mȩnä̧." ¹⁴ Ja̧'hua̧nö̧ ja̧'a̧ttö̧ sacerdotetö̧mä̧ ja̧'hua̧ta̧'a̧nö̧ Levis ahuaruhuä'inä tta̧mu̧nä̧ pa̧ja̧tö̧ töcäu icuinä̧tö̧ TÖ̧Ä̧NÄ̧HUA̧ Israel ttö̧ja̧ TTÖ̧Ä̧NÄ̧HUA̧ esecuinö ȩco̧ca̧ 'chattäda pä'ömä. ¹⁵ Ja̧'hua̧nö̧ ja̧'a̧ Levis ahuaruhuämä Dios esecuinö ȩco̧ca̧ o̧'qui̧yä̧ ttu'upi'quiyunä huȩnä̧u̧ huä̧do̧hui̧nä̧tö̧, Moisés hueita'anö, TÖ̧Ä̧NÄ̧HUA̧ jȩttä̧cuȩ i̧huȩnȩnä̧ jiähuinöta'anötä̧. ¹⁶ Davidmä Levis ahuaruhuä tturuhuotörö ucuocuinö̧, tti̧jä̧hua̧tö̧ 'porö ra̧ttä̧cuo̧tö̧rö̧ hue'ö ku̧ni̧nä̧tö̧; appiyänä 'porähuänä'inä, arpasnä 'porö'inä, ja̧'hua̧ta̧'a̧nö̧ tobirenä cuättönä'inä, pä̧i̧cu̧nä̧ rä̧mi̧pö̧nä̧ juhua'atäcu eseu ra̧ttö̧nä̧. ¹⁷ Ja̧'hua̧nö̧ ja̧'a̧ Levis ahuaruhuämä Hermán Joel i̧tti̧rö̧ hue'ö ku̧ni̧nä̧tö̧ ja̧'hua̧ta̧'a̧nö̧ a̧hua̧ru̧hua̧ Berequía i̧tti̧ Asafrö'inä. Jahuätömä ja̧'hua̧ta̧'a̧nö̧ Merari'inä Cusaías i̧tti̧ Etán ahuaruhuärö'inä hue'ö ku̧ni̧nä̧tö̧. ¹⁸ Jahuätu ttahuaruhuä tti̧dȩ'a̧nä̧ hue'ö ka̧cui̧nä̧tö̧mä̧ pitö ji̧na̧'a̧: Zacarías'inä, Jaazielm Semiramot'inä, Jehiel'inä, Uni'inä, Eliab'inä, Benaía'inä, Maasías'inä, Matatías'inä, Elifelehu'inä, Micnías'inä, Obed Edom ja̧'hua̧ta̧'a̧nö̧ Jeiel'i̧nä̧, äpate ä'ca tta̧'ä̧rä̧tö̧ ji̧na̧'a̧. ¹⁹ Ra̧huä̧huä̧ ttö̧ja̧mä̧ Asaf'inä Etán'inämä broncettö̧ adicuä obi pä̧i̧cu̧nä̧ rä̧mi̧pö̧nä̧ cuätta pä'ö huȩtti̧nä̧u̧. ²⁰ Zacarías'i̧nä̧, Aziel'i̧nä̧, Semiramot'i̧nä̧, Jehiel'i̧nä̧, Uni'i̧nä̧, Eliab'i̧nä̧, Maasías'i̧nä̧, Benaía'i̧nä̧mä̧ Alamot pä'ö micunä ka̧cu̧ appiyänä 'porinä̧tö̧. ²¹ Matatías'i̧nä̧, Elifelehu'i̧nä̧, Micnías'i̧nä̧, Obed Edom'i̧nä̧, Jeiel'i̧nä̧ ja̧'hua̧ta̧'a̧nö̧ Azazía'i̧nä̧mä̧ arpanä 'porätörö juȩ'ȩpä̧rö̧ o'ipinä̧tö̧. ²² Levis ahuaruhuä ttu̧ru̧hua̧ Quenaníasmä ra̧huä̧huä̧nä̧ oipö ra̧'ö̧ ji̧na̧'a̧ juhua'amä ra̧huä̧huä̧ huo̧juȩcuä̧ ttö̧ja̧sa̧ jo̧mȩttö̧. ²³ Berequías'i̧nä̧ Elcana'i̧nä̧mä̧ i̧so̧ca̧ tta̧huä̧cuä̧huä̧ ttö̧ja̧ ji̧na̧'a̧. ²⁴ Sebanías'i̧nä̧, Josafat'i̧nä̧, Natanael'i̧nä̧, Amasai'i̧nä̧, Zacarías'i̧nä̧, Nebaía ja̧'hua̧ta̧'a̧nö̧ Eliezernö̧mä̧, sacerdotes jö̧nä̧ huotömä, Dios esecuinö ȩco̧ca̧ ä'cattö trompetanä ppö'inätö̧. Obed Edóm'inä Jeh'ias'inämä i̧so̧ca̧ tta̧huä̧rä̧cuä̧huä̧ ttö̧ja̧ ji̧na̧'a̧. ²⁵ Ja̧'hua̧nö̧ ja̧'a̧ David. Israel ttö̧ja̧ tturuhuotö'inä ja̧'hua̧ta̧'a̧nö̧ recuätörö hue'ätö'inä TÖ̧Ä̧NÄ̧HUA̧ esecuinö ȩco̧ca̧ Obed Edóm ojusodenä pa̧'a̧ esehuäyotö ȩmö̧ 'chi̧nä̧tö̧. ²⁶ Levis ahuaruhuä TÖ̧Ä̧NÄ̧HUA̧ esecuinö ȩco̧ca̧ ttu̧huä̧do̧hua̧'a̧nä̧ Diosmä ppä̧'ä̧dä̧ri̧nö̧, jahuätömä pä̧cä̧yu̧mä̧ sietenö huotörö ja̧'hua̧ta̧'a̧nö̧ ovejastö̧ u̧mä̧tö̧mä̧ sietenö huotörö ku icu iyinätö. ²⁷ Davidmä ö̧'ca̧tä̧huä̧ta̧ jacuänä ö̧'ca̧tä̧huä̧ta̧ lino pö̧jä̧ta̧ a̧di̧huä̧ta̧ 'ca̧tä̧hui̧nö̧, Levia ahuaruhuä i̧so̧ca̧ huä̧do̧huä̧tö̧'i̧nä̧, ra̧huä̧huä̧ ttö̧ja̧'i̧nä̧ ja̧'hua̧ta̧'a̧nö̧ Quenanías ra̧huä̧huä̧ u̧ru̧hua̧'i̧nä̧, ja̧'hua̧ta̧'a̧nö̧ ra̧huä̧huä̧ ttö̧ja̧'i̧nä̧. Ja̧'hua̧ta̧'a̧nö̧ Davidmä sacerdotetö ttö̧'ca̧tä̧huä̧ta̧ lino pö̧jä̧ta̧ 'ca̧tä̧hui̧nö̧. ²⁸ Ja̧'hua̧nö̧ ja̧'a̧ Israel ttö̧ja̧mä̧ o'catoi'önä TÖ̧Ä̧NÄ̧HUA̧ esecuinö ȩco̧ca̧ eseu huopäyotö ja̧'hua̧ta̧'a̧nö̧ i̧sa̧ ä̧ja̧ i̧sa̧na̧nä̧ ppö'äyotö, obinä'inä cuä'äyotö, juhua'atäcu appiyänä 'porö kä̧nö̧ arpanä'inä 'poräyotö 'cha'adinä̧tö̧. ²⁹ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ esecuino ȩco̧ca̧ David idepiyura̧'a̧ rȩbȩhui̧po̧mȩnä̧, Saúl ittiju Micalmä ventananä topinä̧ju̧. Jahuäjumä ru̧hua̧ David eseu töa'a topinä̧ju̧. Ja̧'hua̧nö̧ topömä ka̧'cua̧nä̧ ja̧u̧rö̧mä̧ cöjö'cö juiyönä topinä̧ju̧.