¹ petujjanenü kuikuijai Moisés javabelia, jumaitsitsi: ² barrü kuikuijamürre Aarón javabelia pejji yajava, bajarra pakuenia dajjita israel tamarra pijivi. tsipaibarre bajarrapamonae jjua petujjanenü baja itorrobatsi: ³ Itajjutejema pebi israel javaverrena vacápebito baja itsabeyajjubiana, pejana oveja itsajume cabranü pepatabiabi irrajavata, itsajume itsabeyajjuaba pepatabiabi irrajava vekua, jumatejema petátsakiapae nejja. ⁴ Itsa bajarraponü apokarrena pevüpa yabarrena pekaetuatsibo, jumatejema pe ofrendabinejja be sacrificiokuene petujjanenü piaja tabernaculobó imojjoyo javata, bajarra ponü baja pejana tsikata, bajarraponü nejjata nakaukutsiana piaja tomarra tuatuajüta. ⁵ Pe itarrobijava pajamabükuene jjainae jumatejema israel tomarra pijivi pekaponaenejja piajamatámo petujjanenü javabelia pitapa javabelia penakaetuatsi ejjanae pepanabo, sacerdotenü javabelia, jumatejema penatsikiapaenejja bé amoneyakuenia petujjanenü javabelia penajamatabüjüpae kuene, petusatota perrajutsiyaniava pesaikarrükaijavata petsakiapaenü. ⁶ Pastornü pejana tsikabiana petujjanenü piaja pejuma nuka javata, penakaetuatsi ejjanae pepanabó piaja baupa itata; bajarra ponü tajuitsiana penasijava jumatejema pekapitsa paenejja pejjaikaitujjü petujjanenü javabelia. ⁷ Bajarra patomarra apotó kaponaitsane piaja matámo idolonü javabelia, bajarra jjuanüta sayabaja bajarra pamonae itsitsabiabi be penaperrabu kanajetivanü. majjuaje petsitekae jumetsaneje bajarrapamonae nejja dajjita nemomojjijavá najitarrükaijitsia: ⁸ JJanü rabaja jumaitsimutsame bajarrapamone javabelia: itajjutejema pebi israel javaverrena peponaenü, itsajúme itsatomarra verrena peponaenü itsaponapona bajarrapamonae petutuajüta, nejjata tsitajutsiana pekobekovü java petajuitsijava itsajume piajamatamo, ⁹ Apo kaponaetsane nua pevü payaverrena pekaetuatsi pepanabó javáberrena jumatejema petó tsakiapaenejja petújjanenü nejja, bajarra papebi baja nakaukutsiana piaja tomarravekua. ¹⁰ Nejjata itajut ejema Israel java verrena peponaijiviyo, nejjata itajju tejema tomarra pijinü itsa ponapona petuatuajüta bajarra bajarra pamonae, pajiviyo jjane itajju tejema jana, jjanü rabaja barrá anaepanaenajú bajarrá pajiviyo, itajju tejema jiviyo nejjeta itsa jjane pejana; jjanü rabaja kaukutsianajú piaja tomarra vekua. ¹¹ Pijiniabaja pia saüjava dajubi pejanata ruka. Jjanü rabaja paka rajutatsi pejana pajjamüjavabelia jumatejema pa ejjana ijitsiamü nekonipema tamo pejebabiabi juma javata pania saüjava yabarra, tsipaji rabaja pejana nekoni pemata motsijava, bajakajena pejana penanekonitsi ejjanaejava. ¹² Bajarra jjuata, jjanü rabaja jumaitsinü Israel tomarra pijivi javábelia itsajiviyo ata pajjamü tatuajüta apobejjae pejana, bajarra pakuenia ata itsa tomarra pijinü panetuat vajüta pe pona ponaenü apo bejjae pejana. ¹³ Nejjata itsa jiviyo ata Israel tomarra javaverrena, itsa jume itsa tomarra pijinü-ata peyajüvünunü petuajüta pe pona ponaenü bajarra pamonae javaa, pena rujuitsivi pebevi dajuvi itsa jume ukukuto nejjata baja pejjainejjatsi; bajarra pavijiyo rabaja pejana epakaijitsipa bajarra pakuenia akabijitsipa pejana atsata. ¹⁴ Tsipaji baja piasaüjava kaenakueto kanakujitsia pejana. Bajarra nejjata jumaitisinü Israel tomarra verrena peponaevi javabelia, "Pajjamü raja apo pajjaimü tsane itsakuene nakueto ata pejana, tsipaji raja piasaüjava dajita pe pona ponaena, kueto baja pejana. Itajjütejema jiviyo itsajjena nakautsiana. ¹⁵ Dajjita pajiviyó jjaena dajubi petüpenü itsajúme ata piayainü pevaetabi dajubitsi ata, itsa bajarra pajiviyo pe pona ponae tomarrata naitajuta itsajúme itsa tomarra verrena pajiviyo, náponapona pajjamü panetuatuajüta, bajarrá ponü rabaja bekiata piaja esetonü nejjata nawüijitsipa merrata, nejjata bajarra ponü ajjuirra jivi tsane kanivyo epato javabelia.Nejjata baja niojaitsne. ¹⁶ Beitsijane itsa bajarra ponú apo kiatsi tsane piaja esetonü peperrabuto ata apo kiatsi, nejjata baja piajanekoni kapona ponaena bajarraponü." v 16 a