¹ Pakujinai tajjuaba jiwi pe naya wiatsi na ayai bitsaüto ejjana irrata to naitajübatsi bitso pejjania petirriwi, ² Nejjata DIOSO pejji itsa tane pebijiwi pejji pejjani a petirriawi. Bajarra pamonai piaja kueneta nota bajarra pa petirriawi piajawanü nejja, itajjutema saya powa itsa jamatabü pita. ³ PETUJJANENÜ jumaitsi: ''Taja espiritu apo tsiteikai tsane bajarra pamonai jawata dajjita matakabi, tsipaji saya bajarra pamonai pewi. Saya bajarra pamonai jinawapaina Ciento veinte (120) pa wai beje. ⁴ Bajarra pamatakabi jinawanapa piapianüanü bajarra pa irrata, bajarra jjua kuinai ata. Ma jjua pakujinai DIOSO pejji ukua pebijiwi pejjunatoyonü pejji baja barru jjaina bajarra powanü jawabelia. Ma pamonaije piasaü bejewije pitabü nejewa bajayatami, pepo pebijiwi pena wünü jaiwimi. ⁵ PETUJJANANÜ tane bitso jiwi pepo piabeje jawa ayakuenia irrata, dajjita jamatabü kueneta pena jamatabü natojjorrotsi jawa, saya baja ü pabisia jawa jamatabü kuene napüna. ⁶ PETUJJANENÜ jamatabü kuene na kanawitsi ejjana tsipaji jamatabü büjai penawitsi ejjanai jawa jiwi bitsaüto irrata, bitso tsiatanetsi pejamatabü kueneta. ⁷ Nejjata PTUJJANENÜ jumaitsi: ''JJanü baja kajena ikinainajü dajjita pa jiwi irra matatsunüta itsinü pe jinawanpaiwi, bajarra pakuenia ata piniji dajjita dajubianü, bajarra pakuenia ata penarrobobikaiwi pe pünaiwi athubüyo ata, Tsipaji JJanü bitso jamatabü büjanü itsi jawa.'' ⁸ Bitsi jane Noé ta itabü nejewa pejjania kuene itsi jai PETUJJANENÜ. ⁹ Ma jjuaje itsije Noé. Noé baja itsiata pejjania jamatabü kuenenü, apo jjainai itsamonai pe nekoni bajarra ponü, Noé najetarruka DIOSO petajju namutua. ¹⁰ Noé jjaiana akueyabi (3) ponübeje pejji, Sem, Cam, Jafet. ¹¹ Bitso baja abeje tsaónai irra DIOSO pitabü nejewa, bitso baja nawerretapona piayai kuenita. ¹² DIOSO nejjata tane irra; bitso baja kajena abeje, bitso baja kajena nabijiana dajjita pewi pabisia namutua najetarrubena irrata. ¹³ DIOSO jumaitsi Noé jawabelia; ''Taniji ma pamatakabije ta kopia rutsi nejja dajjita pewi, tsipaji baja bitso irra ayai pe itsi jawa pabiasia kuene bajarra pamonai yabarra. Bajarra jjuata jjanü baja kopiarrutsianajü bajarra pamonai irra wekua. ¹⁴ JJamü nejja itsimü tsane arca cipre naijawamo. Yatu ukubianame arca ünüta, bajarra jjua kujinai katsanainame brea nabitota pepünü nenia pejuma nenia ata. ¹⁵ Ma pakuenia itsimü tsane: Apia ejjanainame 135 pa metro beje, pijinia peyenepana beje 22.5 pa metro beje tsane, pemujjunene apia ejjanainame 13.5 pa metro beje tsane. ¹⁶ Mata akatsianame bajarra pa arcamo, 45 pa metro beje kuenia tsane pepümü jawa werreka kujinai yajawa dajjita yenepana. rubianame kai baüpa kai yenepanata itsa jawa be irriyota rutsianame, bajarra jjua kujinai itsa jawa tsane akueyabi jjua beje rutsianame. ¹⁷ Jumetaima, JJanü rabaja ü ta bubutsi ejjanai nejja merrata irra , ta werrebiabi nejja dajjita pewi jua baja pomonai pena jumali notsiwi itabojjo büjjüpana jinawonopa. Dajjita pamonai jinawonopa irrata ata baja tüpaina. ¹⁸ Itsiata baitsi jane jjanü najume kopatsianajü jjamüta. JJamüjonename arca ünü jawabelia, jjamü yajawa nejji, bajarra pakuenia nejji pijawajiwi ata jjamü yajawa. ¹⁹ Dajjita pe jinawonopaiwi dajjitawi, najua wirria kanakujitsia beje kajonename arca ünüa berrena, ne yajawa asaü nejja jjamü, najuanü beje tsaponai pebito pesorrowato. ²⁰ Bajarra pijinia pakueneta pepünai wirria ata, pamonai piniji dajubiwi wirria ata, yajawa dajjita wirria pamonai penarrobobokaiwi irrata ata, najuanü wirrianü beje jjamü jawaberrena ponaina, jjamü ne kapanepai nejja pe asaü nejja. ²¹ Kaituarre dajjita wirria pejjaijawa jjamü nejjainejja bajarra pamonai ata pejjai nejja, kai jawata najuma erre, pejjai jawa nejjainai nejja bajarra pamonai ata.'' ²² Nejjata baja Noé bajarra pakuenia itsi. Pakuenia dajjita DIOSO itorrobatsi, bajarra pakuenia baja itsi bajarra ponü.