¹ Dioso jumeitsi Jacob: "Naita punare, ponare Betel jawabelia, barajota ponaponaename. To nutsiename bajara jota iboto Dioso nejja, peka tsita naitajutsinu pamatakabi wekua naitabijirabame Esaú namatapijinu." ² Nejjata Jacob jumeitsi pieja boo piji nejja yajawa dajjita pebaru jinonopaewi bajara ponuta: "Itsanania jawabelia panubare itsa diosowi pane kajinonopaewi pajjamuta, panakietsiename pajjamu panieja kuota, yajawa itsa ese pana jjatabiename. ³ Nejjata pitsapaenatsi yajawa Betel jawabetsia ponaenatsi. JJanu to nutsienajü iboto bajara jota Dioso nejja, tsipaji itsa najamatabu jjeinajü neyawenonabieba, yajawa nebaru ponaponabieba itsajawabelia itsa ponabiebajü." ⁴ Bajara jjuajitsia Jacob rajutapentatsi dajjita pieja diosowi pekajinonopaejawanu pekobeta peitsiwi, yajawa péna mujjuyoro jjatabijawanu. Jacob mutjutapenta alcornoco nae bujjupana Siquem imojjoyota. ⁵ Itsa nubenepona, Dioso junawi ejjana tomarajji pemujjunene jawatsia pe nubaponaewitsia, tsipaji bajara jjuajitsia apo pu barajinaetsi Jacob pejji. ⁶ Nejjata Jacob patanejetaruka Luz tomara jawata (bajara jjua, Betel), Canaán ira jawata eka, ponu pata najetaruka yajawa dajjita pe baru ponaewi. ⁷ Bajara jota mata kotanuta iboto yajawa wunu ruta bajara pa tusato Betel, tsipaji bajara jota Dioso tsita naitajutatsi pieja kuota petainejjatsi bajara ponu, itsa wekua nitabijiraba pematapijinu wekua. ⁸ Débora, pe ewetabiebiwatsi itsa awi tane tsabiebi Rebeca, tüpa. Powa be berekayo Betel punu yabereka alcornoco nae bujjupana jawata mutjutatsi, bajara patusato wunu ruta Alón Bacut. ⁹ Itsa Jacob nawieta ponarena Padan Aram jawa berena, Dioso tsita naitajutatsi ikatsia yajawa pejjania jume rajuta. ¹⁰ Dioso jumeitsi bajara ponuta: "JJamu newunu Jacob, beitsi jane newunu apo Jacob mutsane. Newunu Israel tsane." Nejjata Dioso wunu ruta Israel. ¹¹ Dioso jumeitsi ponuta: "JJanu Diosonunu Ta asoubejenu. Nejji bitsouto jjeinaename yawaja nemomojji bitsouto tsane. Kae nakua pijiwi tsane yajawa kae wiria kuene pitsapaena jjamu werena, yajawa ira mata kanubenaena jjamu nieja wiria jawata. ¹² Pa ira rajutajü JJanu Abraham yajawa Isaac, karajutsienatsi jjamu. Nemomojji jjamu kuijinae rajutsienajü ira." ¹³ Dioso junatabaya bajara ponu kuijinae patajjunae jawabetsia itsa jota kopieya baru kueikueijeitsi. ¹⁴ Jacob iboto to nuta patajjunaeta itsa Dioso baru kueikueijeitsi, iboto jawa to matakotanuta. Bajara ponu epana ibo matatsunuta pe apaera pejenara yajawa aceitera epana bajara pamatatsuwetsika. ¹⁵ Jacob wunu ruta bajara pa tusato Dioso baru kueikueijeitsi ponu, Betel. ¹⁶ Bajara pamonae wekua pitsapa Betel. Itsa abajju to tajayo tsatabitsi Efrata, Raquel wijjae pitatsi pe ejjanae nejja. Jjanewaitsia kueneta apo to naejjanaetsi ¹⁷ Itsa wijjae pitanajetarukatsi bitso, pe ewetsiwatsi jumeitsi: "Kujunawijitsipame, tsipaji itsa nakueto jjeinaename." ¹⁸ Itsa tüpa najetaruka, tsikiru jumaliyota bajara powa wunu ruta Benoni, itsieta pajja wunu ruta Benjamin. ¹⁹ Raquel najjuoba yajawa mutjutatsi Efrata namuto epatota (bajara jjua, Belén). ²⁰ Jacob buota iboto mutju matatsunu wereka. Tsita buota penayapuenejja Raquel pieja mutju pamatakabi jebi. ²¹ Israel namutua jawa baru najetaruka pe ponaenu nejjata baru nukajopa boo pebaru nutsi nejja bebelieyo pejuma tsuto jjaneto atjubuyo jawabetsi pe upi taenuka jumatsuto jota itsa ewetabieba dajubi bitsouto. ²² Itsa Israel baru ponapona bajara pa irajawata, Rubén baru majita Bilha pajja piejawa juyawa, Israel yaputane. Akonojjae Jacob jjeina doce pajiwibeje pejji kuenia. ²³ Pejji Leata Rubén, matapijinu totsi Jacob, yajawa Simeón, Leví, Judá, Isacar yajawa Zebulón. ²⁴ Pejji Raquelta pijinia to Jose yajawa Benjamín. ²⁵ Bilhata pijinia pejji, pieja pienewa Raquel, totsi Dan yajawa Neftalí. ²⁶ Zilpata pijinia pejji, Lea pieja pienewa, totsi Gad yajawa Aser. Dajjita pamonae Jacob pejji peto naejjanaewitsi Padám Aram jawata. ²⁷ Jacob nawieta ponarena Isaacta, pajja, Mamre jawata Quiriat Arba (kae nakua Hebrón), peponaponae kowuta Abraham yajawa Isaac beje. ²⁸ Isaac asou tsoponaponae ciento ochenta pa weybeje kuenia. ²⁹ Isaac tsikiri jumaliyota asou tsaponaponae bajara jjua kuijinae tüpa, pieja monae bajayatami pijiwi notarukupatsi, perujunuyota bitso wey kuenia pejjenaenuyo. Esaú yajawa Jacob, pejjunatobeje, mutjutatsi.