¹ Nejjata Dina, Jacob pejjunatoyo Leata, pitsapa penamatajjunaenejja pejena petiriewi bajara pa ira pijiwi. ² Nejjata Siquem, Hamor pejjunato heveonu, pemata kanukaenu bajara pa ira, taetaba yajawa pita, namuetsia, yajawa baru majita bajara powa. ³ Bajara ponu jitsipa ponapona Dina, Jacob pejjunatoyo. Bajara ponu pita pejenawa yajawa jitsipaeyakueneta baru kueikueijei. ⁴ Siquem baru kueikueijei pajja Hamor, pakuenia: "Neto wajure pejena petiriwa tajawa nejja." ⁵ Akonojjae nejjata Jacob jumetane bajara ponu pekentsia taejawa pejjunatoyo Dina. Pejji pebijiwi baru jinonopa baka bitsouto wayapjo jawata, nejjata Jacob moya tsaponaponae kuijiru eweta pepatsijawa bajara pamonae. ⁶ Hamor pajja Siquem pitsapa Jacob penamatajjunae nejja pebaru kueikueijei nejja bajara ponu. ⁷ Jacob pejji nawieba najetarubena wayapjo jawa werena itsa jumetane bajara pa liweisi. Bajara pa pebijiwi tsi atanetsi. Bajara pamonae bitso anaepana tsipaji bajara ponu uraba Israel tsipaji apo na kuijiru kopatsi Jacob pejjunatayo jawabelia, tsipaji bajara jjua pakueni itsi apo kuijiru jjanepanae. ⁸ Hamor paru kueikueijei, pakuenia: "Tajjunato Siquem jitsipa nejjunatoyo. Itajjuto tsonia taema rajure bajara ponu piejawa nejja. ⁹ Nakae monaetsanetsi wajjeitsi, panerajure panejji petiriewi, yajawa panotsiename patajji petiriewi pajjamunejja. ¹⁰ Pajinonopaename pajjanu jawata, yajawa pana jonename para irajawata panena jinonopaenejja yajawa pane kanajetsinejja, yajawa panejjeinayabinejja panenamatá wenonaejawa." ¹¹ Siquem jumeitsi pajjata yajawa pematapijiwi: "Pane itajjuto tsonia taema, jjuoyo pane wajutame jjanu paka rajutsienatsi. ¹² Pane wajure ira yajawa amoneya kuene itsajawayo panenamata wenonaejawa, yajawa jjanu paka rajutsienatsi patane wajukaejawamu, beitsi jane pane rajure pejena petiriwa tapitsinejja." ¹³ Jacob pejji jumeitsi pakuenia Siquem jawabelia yajawa pajja Hamor najametsunutsieya, tsipaji Siquem matayatsiaya keneta Dina bajara pamonae pejuyapijiwa. ¹⁴ Pamonae jumeitsi: "Pakueni apo bena itsi, pata rajutsijawa pata juyapijiwa pajiwiyo apo pena bo upi koukutsi jiwiyo; tsipaji pajjanu paneto ayeitsipae. ¹⁵ Itsieta pakuenia najume yaputaenatsi itsa pajjamu pajü jamamu: itsa pajjamu pana bo upi koukubame be pajjanu kuenia, itsa dajjita pebijiwi pajjamu jawata pana bo upi koukubame. ¹⁶ Nejjata pakarajutsienatsi patajji petiriewi pajjamu nejja, yajawa pajjanu panotsienajü panejji petiriewi pajjanu nejja, yajawa pajjamuta pajinonopaenajü yajawa be kae tomara tsanetsi. ¹⁷ Beitsi jane itsieta pajjamu itsa apo pane jumetaemu tsane panena bo upi koukubijawa, nejjata patajuyapijiwa pakanawietsienajü pata ponaenejja. ¹⁸ Hamor yajawa pejjunato Siquem jume jjania tane beje. ¹⁹ Pewujuoto jume jjania tane pejumeitsi jawatsi apo to tajayotsatabitsi, tsipaji Jacob pejjunatoyo jitsipaponapona, tsipaji yajawa ponu pejjania jamatabu kuenenu dajjita pajja pieja boo jawata. ²⁰ Hamor yajawa Siquem pejjunato kuijitabalia beje boupa tomara peita bara taenukae jawabelia yajawa pabru kueikueijei pebijiwi tomara jawata pejinonopaewi, pakuenia: ²¹ "Pamonae jjanewaitsia kuenete jinonopa wajjeitsi jawata, bajara jjuota pakopare pejinonopae nejja pa ira jawata yajawa pena kanajatsi nejja majota tsipaji, jjanewaitsia kueneta, pa ira ayeijawajjaneto bajara pamonae nejja. Notsienatsi pejji petiriewi waja baru nakojiobi nejja, yajawa rajutsienatsi wajajji petiriewi. ²² Beitsi jane bajara pa pebijiwi wajjeitsita jinonopaena itsa wajjeitsi pakueni jumeitsi itsitsanetsi yajawa kae tomara kuenia nataenatsi: itsa dajjita pebijiwi wajjeitsita penubenaiwi nabo upi koukuba, pakueni bajara pamonae nabo upi koukuba. ²³ Pieja baka yajawa pekobe kowu, dajjita penajjeinayabi jawa, dajjita pieja dajubi, ¿apo wajawa tsane? Nejjata bajara pamonae kae liweisi kuenia nabara kueikueijei tsane, yajawa pamone wajjeitsita jinonopaena." ²⁴ Dajjita pebijiwi bajara patomarata pejinonopaewi jume yeyatane Hamor yajawa Siquem, pejjunato. Dajjita pebijiwi nabo upi koukuba. ²⁵ Akueyabi matakabita, abajju itsa atane tsarubenae, najua nubeje Jacob pejjunatobeje, Simeón yajawa Leví, Dina pemata pijinubeje, kaenu kanakuijitsia pitabeje pieja wakapa tsimajju ponabeje tomara tsipaji bajara pamonae jjanewaitsia kueneta jinonopa, nejjata beyejeba dajjita pebijiwi. ²⁶ Bajara pajiwibeje peyajjuoba Hamor yajawa Siquem, pejjunato, wakapata mujju burujawata. Pajiwibeje Dina kanawieta Siquem pieja boo werena nejjata baru nawieta. ²⁷ Itsa monae Jacob pejji ponarena petupaewi jawaberena yajawa nakobe tojjota tomara pijijawa, tsipaji bajara pamonae pejuyapijiwa keneta. ²⁸ Notanubena pieja dajubi bitsouto, baka bitsouto, burro bitsouto, yajawa dajjita tomara jawata yajawa wayapjo pijijawa pemata kanukaejawa bajara panakua ²⁹ dajjita pekobewu kapona. Dajjita pejewajji yajawa penakojiobiwanu, pamonae waitaba. Bajara pamonae nakobe tojjota dajjita pejebi jawa bojjiya. ³⁰ Jacob jumeitsi Simeón yajawa Leví: "Pajjamubeje pane urabame, tsipaji pakuenia bajara pamonae jawalia jjanu neitoyatsane, cananeowi yajawa ferezeowi. Taja monae apo ayei bitsouto. Itsa bajara pamonae nakaetuotsiena tane benejja, nejjata nebeyajjuobiena, jjanu yajawa taja boo." ³¹ Beitsi jane itsieta Simeón yajawa Leví pakuenia: "¿Nejjata Siquem pakuenia pekenetsijawa pata juyapijiwa to jjanepanatsi?"