¹ Akonojjae, Jacob jumetane liweisi Labán pejji pejumeitsi jawa, pejumeitsijawa pakuenia: "Jacob pitanajetaruka dajjita wajja piejawa, yajawa wajja piejawa bajara pakuenia jjeina najetaruka dajjita pekobekowu." ² Jacob itajjuto tane Laban peitabarata. Tane pakuenia bajara ponu wekua natsata najetarukatsi. ³ Nejjata PETUJJANENU jumeitsi Jacob jawalia: "Nawietsiename ajja pieja ira jawabelia yajawa nieja monae jawabelia yajawa JJanu kabaru najetarukaenatsi." ⁴ Jacob itoroba peto junatsinejjatsibeje Raquel yajawa Lea petsia nejjabeje dajubi pe ewetsi tusato nakua jawabetsia ⁵ yajawa jumeitsi: "JJanu tanejü pakuenia panieja ajjabeje jjanu jawarena neitoya tsaponaponae, beitsi jane tajja pieja Dioso nebaru ponapona. ⁶ Pajjamubeje payaputanemebeje tato nakuenebijawa dajjita souta tato nakuenebijawa ajja. ⁷ Panieja ajjabeje neyamujju itojoroba yajawa neto tijjita tane rajutsiapaebi matamo najua kobe kunia (10) pa epatobeje, beitsi jane itsieta Dioso apo nebijienae ejjanae. ⁸ Itsa ponu nejumeitsi: 'Pekatukatuwi dajubi nieja matamo tsane,' nejjata dajjita dajubi pejena naejjanaewi bitsouto pekatukatubiwi pitsapabieba. Itsa ponu jumeitsi: 'Pe itane rubenaiwi nieja matamotsane,' nejjata dajjita dajubi bitsouto itane rubena pejena naejjanaewi. ⁹ Bjara pakuenia Dioso nerajuta dajubi ajja piejawi yajawa jjanu nejja. ¹⁰ Pamatakabi itsa pesorowato wanu nabojjonaba, jjanu tanejü itsa ameijitsinaenu chivowanu tsaena kojjitatsi. Chivowi itane rubeneika, pekatukatubiwi yajawa pe itane tsaebiwi pepjobiewita. ¹¹ Dioso pieja angelnu nejumeitsi meitsinaebota: 'Jacob.' JJanu jumeitsinu: 'Jota nukajü.' ¹² Ponu jumeitsi: 'nawu yore yajawa taema dajjita chivo pebitonu kojjitanubena dajubi pesorowatowanu. Pamonae itane rubeneika, pepuranaewi yajawa peitane tsaebiwi pepjobiewita, tsipaji JJanu tanejü dajjita Labán peka itsijawa. ¹³ JJanu Betel pieja Diosonunu, jota tsimata epaname iboto, jota jjamu Neto najume puentame. Akonojjae, nountapunare yajawa kopare pa ira yajawa nawiere pa irabelia naejjananukame."' ¹⁴ Raquel yajawa Lea jumeitsibeje pakuenia: "¿Tsipaji itsajawayo patanerajutsi jawayo pajjanu nejjabeje pataja tajja pieja boo jawata pajjeinajü beje? ¹⁵ ¿Be itsa irannakua pijiwabeje pane taebiebabeje? Tsipaji ponu pane kanajetabeje yajawa paneto wereta dajjita pataja palatanujji. ¹⁶ Nejjata dajjita pejjeinajawa pewekua pitsijawa Dioso pataja tajjabeje akonojjae patájawa tsane yajawa patajji. Akonojjae nejjata, itsajawayo pakuenia Dioso jumeitsi, itsimure." ¹⁷ Nejjata Jacob nountapuna yajawa pejji jebaya yajawa piejawabeje camellowi juma jawatsia. ¹⁸ Ponu namata jjeinae ejjana dajjita pieja dajubi baka wiria, yajawa dajjita pekobe kowu, matatsunua dajubi baka wiria perajutsi jawatsi Padán Aram jawata. Nejjata ponu wekua pitsapa pepatsi nejja pajja jawabelia Isaac Canaán ira jawabelia. ¹⁹ Itsa Labán pitsapa pená koukubinejja ovejawi, Raquel to nakobetojjota pajja pieja diosowi pieja boojawata penubiwi. ²⁰ Jacob yajawa yamujju itojoroba Labán arameonu apo jumeitsi marabaja ponajü apojei. ²¹ Bajara pakuenia naitabijiraba dajjita pekobe kowu yajawa najjatsiyo baru nikaba Menera, nejjata kuijita najetaruka Galaad jumatsuto nakua. ²² Akueyabi matakabita Labán jumeitsitsi mabaja Jacob naitabijiraba. ²³ Nejjata pieja monae junata pebaru pubarajinaenejja siete pamatakabibeje namuto jawa. Ponu manatajjuna Galaad jumatsuto nakuajawata. ²⁴ Akonojjae Dioso mátaenena Labán arameonu mejitsinaebota merewita yajawa jumeitsi: "JJaniabaja tsane itsa baru kueikueijeijamu Jacob pejjania kuene anayakuenia ata." ²⁵ Labán namatajjuna Jacob. Akonojjae nejjata Jacob pieja boo burto núta bajara pajumatsuto nakua jawata. Labán yajawa pieja boo burto nanúta pieja monae yajawa Galaad jumatsuto nakuajawata. ²⁶ Laban jumeitsi Jacob jawalia: "¿Dejjua itsimu, neya mujju itojorobame yajawa neto baru poname tajjunatoyobeje bepe namujjuentsiwabeje penabe matakabita? ²⁷ ¿Dejjuajitsia amijibia poname yajawa neya mujju itojorobame yajawa apo nejumeitsimu? JJanu jjanewaitsia kueneta kanapüjiobijitsipatsi pejjaniakueneta yajawa penajjuonaewita, pandereta narakatsipa yajawa pemourujawata arpa. ²⁸ Apo nekopatsimu tanapüjiobinejja tamomojji itabara tsutsunijitsipajü yajawa tajjunatoyobeje. Akonojjae nejjata pebisia kueneta itsimu. ²⁹ Takobeta kaitsakuijirubitsipatsi, bitsi jane ajja pieja Diosonu nebaru kueikueijei pamerewita yajawa nejumeitsi: 'JJaniabaja tsane itsa baru kueikueijeijamu Jacob pejjania kuene anayakuenia ata.' ³⁰ Akonojjae nejjata nawietame tsipaji ajja pieja boo itajjaname. Beitsi itsieta, ¿dejjuajitsi taja diosowi neto nakobe tojjotame? ³¹ Jacob jume pita yajawa jumeitsi Labán: "Tsipaji junawajü yajawa najamatabu jjeinajü newekua kanawietsiena pejjunatoyobeje anayakuene bajara jjuota amijibia pontabajü. ³² Pajiwiyo kato pita nieja diosowi apo asoutsane. Waja monae peitabarata, jeire itsajawayo takato pitsijawa jjanu yajawa kanawiere." Tsipaji Jacob apo yaputae Raquel penakobe tojjotsijawa. ³³ Labán najetabalia Jacob pieja boo burto jawabelia pejeitsinejja, Lea pieja boo jawabelia jeita yajawa pieja pienewabeje pieja boo jawabelia jeita, itsieta apo namatajjunae. Pitsaparena Lea pieja boo werena nejjata jonenukalia Raquel pieja boo yabelia. ³⁴ Nejjata Raquel nota diosowi boota penubiwi, buota camellonu pejuma akatsijawata yajawa pejuma wetsika eka. Laban jeita dajjita bojjiya itsieta apo namatajjunae. ³⁵ Powa jumeitsi pajjanejja: "Anaepanaejitsipame, taja tujjanenu, itsa apo nountapunaenu neitabarata, tsipaji jjanu nabojjonabajü." Nejjata ponu jeitsi apo namatajjunae pieja diosowi pieja boo pijiwi. ³⁶ Jacob nejjata anaepana yajawa baru nabiejatane Labán. Ponu jumeitsi: "¿Dejjujitsia ne itoyamu? ¿Dejjua kato naneikueintatsi, taneka barajinaemu anayakueneta? ³⁷ Tsipaji jjamu jeitme takobe kowu jawajjiya. ¿Dejjua namatajjuname nekobe kowujawa? Waja monae peitabarata jebare nenamatajjunaejawa, bajara pamonae waja nakaneinkueintsinejjabeje. ³⁸ Veinte pawey beje jjanu kayajawatsi. Nieja ovejawi yajawa nieja cabrawi apokato yajjaitsi apo jjainu carnero nieja dajubi bitsouto jawata. ³⁹ Pebeyajjuobinutsi pekopibokoto rubenaewi unujawatalia kato kanukaponatsi. Biji karanta, jjanu kamatamo najetarukatsi penapentsiponaewi. Nematamo ejjanabiebame itsa dajubi kato napentabieba, penakobetojjotsiwi matakabita tsipaji merewita. ⁴⁰ Barajota nukajü, matakabita netsoujuwiata nukajü yajawa merewita keinejebita nukajü apo majitsinu. ⁴¹ Bajara paweybeje veinte kuenia jjanu nieja boota ponaponajü. JJanu nakuenebajü catorce paweybeje nejjunatoyobeje nejja yajawa seis paweybeje nieja dajubi nejja. Neto tijjitanejetarukame taja matamo nejja diez jjuobeje kuenia. ⁴² Tajja itsa pieja Dioso, Abraham pieja Dioso yajawa Isaac peyeyataenu, apo neyajawatsipae, jjanewaitsia kueneta kobesa nekapitsapaejitsipame. Dioso táne pakuenia neitoyamu yajawa asouya tana kuenebi jawa yajawa Ponu kamujjujioba merewita. ⁴³ Labán jume pita pakuenia jumeitsi Jacob: "Pejjunatoyobeje tajjunatoyobeje kajena, pemomojji tamomojji baja kajena pijinia dajubi bitsouto taja dajubi bitsouto jjanu. Dajjita jjua taneme majota tajawa dajjita. ¿Dejjjua itsinutsipae ajena tajjunatoyo beje tsipaji tamomojji pe itajubiwi powabeje? ⁴⁴ Nejjata baja akonojjae, nakobe waitabinatsibeje, jjamu yajawa jjanu, yajawa bajara jjua naka liweisi kakueikueijei tsane wajjeitsibeje". ⁴⁵ Nejjata Jacob pitaba iboto bajara pakuijiruta bepe kaituotetsi. ⁴⁶ Jacob jumeitsi pieja monaeta: "Pakaetuotere ibo." Nejjata bajara pamonae kaituota iboto penajuma jebinejja. Nejjata bajara jota pamonae jjayena penajumajebi ibo mujjunene jawata. ⁴⁷ Labán wunu ruta bajara patajjunae Jegar Sahaduta, itsieta Jacob pemujju nenejawa wunu ruta Galed. ⁴⁸ Labán jumeitsi: "Penajuma jebi ibo naka jume liweisi tsipaebiena wajjeitsibeje ajena." Bajara jjuota, pewunu tsane Galed. ⁴⁹ Yajawa pewunu Mizpa, tsipaji Labán jumeitsi: "Petujjanenu naitajjuto kaewetsiena waja nakataenejja, itsa apo natae tsanetsibeje taju itsa ponatsibeje. ⁵⁰ Itsa jjamu neto bename tajjunatoyobeje itsa pitame itsawa niejawa nejja tajjunatoyobeje pitsimu ata, itsa jiwiyo ata apo naka baru nukae ata tsane, taema, Dioso nakatanebeje waja nakobewaitabi jawa." ⁵¹ Labán jumeitsi Jacob."Taema penajuma jebi ibotonu yajawa taima pa iboto, tajebijawa jjanu yajawa jjamu nebuotsijawa. ⁵² Pa iboto nakatanebeje yajawa pa ibo penajuma kaituotetsijawa naka tanebeje, jjamu jawabelia jjanu apo kajjenetsitsanetsi yajawa jjamu berena apo patsimutsane apo waja naitsakuijirubi nejja beje. ⁵³ Abraham pieja Dioso, yajawa Nacor pieja Dioso, pajja pieja diosowi, naka kuijiru taenabeje." Jacob najume kapanepa pajja Isaac peyeyataenu. ⁵⁴ Jacob dajubi witajuita ponaya pejumatsuto jawatsia yajawa junata pieja monae pejjae nejja pejjaejawa. Pamonae jjayejeba yajawa barajotatsia dajjita merewi jinonopa bajara pajuma tsutojawata. ⁵⁵ Bajayakunua Labán nountapuna, itabara tsune pemomojji yajawa pejjunatoyobeje pejjania kuene to najume pueneta. Nejjata Labán nawietaponalia pieja boo yabelia.