¹ Itsa Raquel tane pejji apo pejjeinaejawa Jacob jawabelia, Raquel uwia tane pematapijiwa. Powa jumeitsi Jacob jawabelia: "Nerajure tajji, itsa ajibi tupaenajü." ² Jacob bitso anaepa Raquel jawabelia. Ponu jumeitsi: "¿Tsipaji jjanu Dioso pekowuta nukajü, apo peka jjeinae ejjanae nejja nejji?" ³ Powa jumeitsi: "Taema, Bilha taja pienewa neto nuka. Baru majire powa, pejjeina nejja pejewajji tasi yawero matatsunua, yajawa jjanu jjeinainajü powa pe jumata." ⁴ Nejjata powa rajuta pieja pienewa Belha piejawa kuene, yajawa Jacob baru majita powa. ⁵ Bilha to ejjana Jacob pejjunato nakueto. ⁶ Nejjata Raquel jumeitsi: "Dioso neitajjuto tsonia tane. Ponu jjanewaitsia kueneta nejume tane yajawa nerajuta tajjunato." Bajara jjuota powa wunu ruta Dan. ⁷ Bilha, Raquel pieja pienewa, ikatsia nakojjita nejjata rajuta Jacob itsa nakueto. ⁸ Raquel jumeitsi: "Ayei kuenena baru nabiejü tamatapijiwa itsieta apo kapanepaenu. "Powa wunu ruta Neftalí. ⁹ Itsa Lea tane pejji peto kopia rukaejawa, rajuta Zilpa, pieja pienewa, yajawa pitsi ejjana Jacob piejawa nejja. ¹⁰ Zilpa, Lea pieja pienewa, Jacob to ejjana itsa nakueto. ¹¹ Lea jumeitsi: "¡Pejjania Kuene neto!" nejjata bajara jjuota wunu ruta Gad. ¹² Nejjata Zilpa, Lea pieja pienewa, rajuta Jacob itsa nakueto. ¹³ Lea jumeitsi: "¡Bitso barayanu! Tsipaji pejji petiriewi pe barayawa nejeitsane." Bajara jjuota wunu ruta Aser. ¹⁴ Rubén pona jetsa penótsi matakabi yajawa namatajjuna mandrágora tabutopa bajarapa unu tusato jawata. Bajara ponu pena Lea to kanajetaruka. Nejjata Raquel jumeitsi Leata: "Nena rajure mandrágora tabu topajawajji nejjunato pekato kanajetarukaejawa." ¹⁵ Lea jumeitsi bajara powata: "¿JJamu apo kato ayei kuene, newekua pitame tamona? ¿Mabaja ikatsia newekua pitsijitsiemu tajjunato taneto kaponae madragona tabu topa yajawa?" Raquel jumeitsi: "Nejjata bajara ponu kabaru majitsiena merewita, juya bajara pamatamo jawalia nerajutsiename mandragora tabu topa nejjunato pekato kanajetarukaejawa." ¹⁶ Jacob patá najetaruka merewiyota wayapjo tusato werena. Lea mata enena yajawa jumeitsi: "Nebaru majitsiename pamerewita, tsipaji jjanu kakomuotatsi mandrágora tabu topajawa tajjunato nateto kanajetarukaejawa." Nejjata Jacob baru majita Lea bajara pamerewita. ¹⁷ Dioso jumetane Lea, yajawa powa to nakojjita yajawa itsa nakueto rajuta Jacob 5 panakueto beje kuenia. ¹⁸ Lea jumeitsi: "Dioso nerajuta taja matamo, tsipaji taja pienewa rajutajü tamona." Nejjata wunu ruta Isacar. ¹⁹ Lea ikatsi nakojjita yajawa itsa nakueto 6 kuenia penamata ujutsinu to jjeina Jacob. ²⁰ Lea jumeitsi: "Dioso pejjania kuene nerajuta. Akonojjae tamona neyeyataena, tsipaji 6 panakuenbeje to jjeinajü." Powa nejjata wunu ruta Zabulón. ²¹ Bajara jjua kuijinae to jjeina petiriwa nejjata wunu ruta Dina. ²² Dioso najamatabu pita Raquel yajawa jumetane. Ponu towupata penakojjitsinejja bajara powa. ²³ Powa jjeina yajawa itajuta pebi nakueto. Powa jumeitsi: "Dioso newekua pita ta oura kuenia jawa." ²⁴ Powa wunu ruta José, jumeitsi pakuenia: "PETUJJANENU nerajuta itsa nakueto." ²⁵ Bajara jjua kuijinae Raquel pe itajutsi jawa José, Jacob jumeitsi Labán: "Taju neitorobare, ta ponaenejja jjanu taja boyabelia yajawa taja nakuayabelia. ²⁶ Neto kopatsiename tajawa beje yajawa tajji tsipaji bajara pamonae yabara kato nakuenebatsi, yajawa nekopare taponaenejja, tsipaji yaputaneme jjamu pakuenia jjanu kato nakuenebatsi." ²⁷ Labán jumeitsi: "Itsa akonojjae neita tsonietaneme neita jjuto bujjupana jawa, ewetabare, tsipaji netsitajuta PETUJJANENU tajjeinaejawa jjamu nejumata." ²⁸ Nejjata ponu jumeitsi: "Taka matamotsinejja neto wunujonare, yajawa jjanu kamatamotsienatsi." ²⁹ Jacob jumeitsi: "JJamu yaputaneme takato nakuenebijawa, yajawa pakuenia nieja baka bitsouto takato ewetsijawa. ³⁰ Tsipaji bitso apo jjeinamu tapatsi wujunae, akonojjae kato nawita bitso. PETUJJANENU ayeikuene karuta dajjita ta nakueyabi jawajjiya. Akonojjae, ¿Depakuijinae jjanu nejja nato jjeinanajü taja boo nejja?" ³¹ Nejjata Labán jumeitsi: "¿Dejjua kamatamotsienatsi?" Jacob jumeitsi: "JJamu apo nerajutsimu tsane itsa kuijiru jawayo. Itsa pakuenia jjamu itsimutsane jjanu nejja, jjanu kato abatsienatsi nieja dajubi bitsouto yajawa kato ewetsienatsi. ³² Neponaponae ejjanare nieja dajubi bitsouto jawa ajena, ta itapetsinejja dajjita ovejawi pekatu katuwiwanu yajawa pepuranaewi, yajawa ovejawi petsaebiewi bajara pamonae jawata, yajawa pekatu katuwiwanu pepuranaewii cabrawita. Nejjata bajara pamonaeta nematamotsiename. ³³ Nejjata jjanu nayeyatae ejjanaenajü pa ira nakuota, pamatakabi jjamu taejitsiemu tane matamotsi jawamu. Itsa kaenu apo katukatuwi yajawa apo puranae cabrawita, yajawa petsaebiewi ovejawita apo nubenae, nejjata itsa namatajjuname kaenu jjanu jawata, nejjata neto nakobetojjota jamu tsane." ³⁴ Labán jumeitsi: "Je bajara itsi tsane. Pakuenia jumeitsimu najume yeyataenatsibeje." ³⁵ Bajara pamatakabi Labán taenajetaruka cabrawi pebitowi peitane rubenaewi yajawa pepuranaewi, yajawa dajjita cabrawi pesorowatowi pekatukatuwiwi yajawa peitane rubenaewi, kaenu kanakuitsia pepjobia itane peto rubenaewitsi bajarapa pesorowatowi, yajawa dajjita ovejawi petsaebiewi bajara pawiria jawata, yajawa rajuta pejji pekobeta. ³⁶ Labán nejjata akueyabi matakabibeje to namatajuta peponaenejja bajara ponu wekua Jacob. Bajara pakuenia Jacob nakopata peto ewetsinejja pieja dajubi peto nakopatsi jawatsi Labán. ³⁷ Jacob kaetuota pe ukubi naemajjurana pejana koukubijawa álamo jawa, yajawa almendrojawa yajawa plátano epato, yajawa bokojonapenta kae naniawetsika nejjata bepe itane rutsitsika, nejjata itsi nae epato petunajju pjobia jawa bepe rubenae naejawata. ³⁸ Nejjata ponu jeba naejawa peboko jonaejawa dajubi peitabarata, peapae biebijawata itsa ponabiebarena. Pamonae ejjanabieba itsa ponabiebarena mera peapaewi. ³⁹ Dajubi bitsouto ejjana najetarubena naejawa itabarata, yajawa dajubi jjeina najetarubena peitane rubenaiwi, yajawa pepuranaewi yajawa pepjobiewi peitane tsaebiewi. ⁴⁰ Jacob itapeta pacorderowi, tae ejjana penakopatsiwi itsa dajubi jawalia peitane rubenaewi yajawa dajjita ovejawi petsaibiewi Labán piejawi. Nejjata ponu itapeta piejawi nejja yajawa apo nubi kae kanakuijitsia Labán piejawita. ⁴¹ Itsa oveja wiria pesou rubenaewi bajara pa bitsouto jawata to nawita najetarubenatsi, Jacob naejawa to jebabieba mera pe apaebiebi jawata petaenejja bajara pabitsouto, pe ejjanaenejja naejawa itajjutua, bajara pakuenia ejjana najetarubena nae bujjupana jawa. ⁴² Beitsi jane itsa dajubi bitsouto peasou jibiwi ponabiebarena, ponu naejawa apo to jebabiebi bajara pamonae nejja. Nejjata itapeta najetaruka bajara padajubi pesou jibiwi Labán piejawi nejja, yajawa pesou rubenaewi seikaya Jacob piejawi. ⁴³ Bajara ponu bitso peto nawitsinutsi dajjita dajubi wiria. Ayei bitsouto peto nakaetuonaenutsi baka, petiriewi peto nakuenebiwitsi yajawa pebijiwi petonakuenebiwi, yajawa camello wiria yajawa burro bitsouto.