¹ Jumetaima Israel; jjamü raja kato imijjoyo ne epa nikabi nejja Jordán ajena, ne jaitsi nejja matatojjetsia piniji tomarranü piasaü jjamü matatojjentsia, yajawa pa piniji tomarranü pe patsi jawanü ata athübüabetsia, ² Piniji jjanetonü piapiawi, Anaceo pejjia, pamonai jjamü yapütaneme, pamonai baja jumatai biabame pejumaitsi jawa:''´¿depatsa meta na nukaina Anac pejji tutujuta? ³ Yapütaneme, ta ponai jawa, jjua waja TUJJANENü DIOSO bajarra ponaü raja namatajjaina najetarrukauina be piaya petajue kotia; Bajarra ponü raja kawekua ajibi ejjaniana, bajarra ponü bijiobi ejjanaina nitabünejewa; nejjata jjamü kapitsapainame nabijiobi ejjanainame najjatsiyo kueneta, pakuenia baja waja TUJJANENÜ ka jumaitsi. ⁴ Putsa jammatabü jumaitsimü, PETUUJJANENÜ pe torrotsi kujinai jjamü wekua: ''jjanü ta pejjania jamatabü kueneta jjua nerrajuta waja TUJJANENÜ tane rajutsi jawa pa irrata je'', tsipaji piji pabisia jamatabü kueneta PETUJJANENÜ jukapona pajjamü pane wajunaya. ⁵ Apo ne pejjani jamatabü yabarra raja apo karrajutsi bajarra pa irra, pabisia jamatabü kuene yabarra tomarranü waja DIOSO jukapona waja ne wajünaya, bajarra , Nejjata bajarra PONÜ pakuenia pe pe itsi nejja jjua najumekopata waja wajünai pijiwi jawabelia, Abrahamta, Isaacta ata Jacob jabelia ata. ⁶ Itsiata baja yapütaneme, jjua waja TUJJANENÚ DIOSO apo karrajutsi ma pa irra je ne pejjania jamatabü kuene jjai je, tsipaji paniajamatabü jitsibi tomarra. ⁷ Panajamatabü napitsianotsianame pütsa pa nokofünütame pakuenia anaipanai ejja jawa waja TUJJANENÜ DIOSO pe tsewi tusato jawata; pa matakabita pe pitsapai kujinai Egipto irra wekua ata pe patsijawa itsa tajjunai jawabelia, pajjamü baja apo pa jume kowünütsimü waja TUJJANENÜ. ⁸ Horeb jawata ata pajja waja TUJJANENÜ pa jamatabü itonotame pe anaipanai nejja, nejjata baja waja TUJJANENÜ kaje bitso paka barra anaipana pajjamü peka ajibi ejjanai jawabelia. ⁹ Pakujina jjanü unuabelia junajü ta pitsi nejja ibopa, pa pa jane baja jawa nakayo koptsi liwaisi waja TUJJANENÜ itsi pajjamü yajawa, jjanü nakopatajü bajarra pa unuta cuarenta pa matakabi beje bajarra pakuenia cuarenta pa merrawi beje; apo jjainü perri merra ata apo apainü. ¹⁰ PETUJJANENÜ ne rajuta najua ibopa baje pe yakina jawa pekobesitota; bajarra jota yakinarruta dajjita pa liwaisi taja TUJJANENÜ DIOSO paka jumaitsi pajjamü bajarra pa unuta pekotia tutujuta pane nakaituatsi matakabita. ¹¹ Bajarra itsi apo tajja jawa cuarenta pa matabi beje apo ta jjai jawa cuarenta pa merrawi beje waja TUJJANENÜ ne rajuta najua ibopa beje, pacto ibopa beje. ¹² PETUJJANENÜ ne jumaitsi, ''nonotapunarre, najjatsiyo baja ponarre pa tajjunai wekua, tsiaoaji raja nija jiwi, pamonai jutame Egipto wekua, namatatsapata. Bajarra pamonai wekua pitsapa pa namuto jawa itorrobajü, Bajarra pamonae nato itsi pe kuene katai jumape petsakitsi jawa''. ¹³ ikatsia, PETUJJANENÜ ne jumaitsi: ''JJANÜ tanijü bajarra pamonai; bajarra pamonai kajena saya apo pe jume kowünütsiwi. ¹⁴ Neto koparre kainünü, ta ajibi ejjanai nejja bajarra pamonai pe wünüanü itabojjo büjjüpana je, jjamü ka pinijiyo ejjanainatsi bitso matatojjenetsia bajarra pamonaimü''. ¹⁵ Nejjata jjanü napüyorrotajü nawiatajü unuwerrena, bajarra jjua kujinai tajua bajarra pa unu. Bajarra pa najua ibopa beje pe najume kopatsi jawa baja kobena ponaponajü. ¹⁶ Taima, bajarra jota, pajjamü pana nekonitame waja TUJJANENÜ DIOSOTA. panatsibe itsimü peéjananü baka. Pajjamü bepijiayo pa pitsapame pa namuto jawa paka ponai ejjana waja TUJJANENÜ naka ponai ejjana. ¹⁷ JJANÜ nejjata pitajü bajarra pa pabeje nawekobe jjuabaliajü. JJANÜ tojjotajjuabajü nitabü nejewa. ¹⁸ Ikatsia bajarra jjua kujinai ta matabakabüta nukajü waja TUJJANENÜ pitabü nejewa cuarenta pa matakabi beje bajarra pakuenia cuarenta pa merrawi beje; apo jjai nejewanü bajarra pakuenia merra apo apai nejewanü, pajjamü pane nekoni yabarra, pa itsimü bajrra jjua pabisia kuene pitabü nejewa waja TUJJANENAÜ, saya baja pe anipanai nejja. ¹⁹ Tsiapaji jjanü kujunawajü pianai panai jawa bitso ayai kueneta pabisia kuenia waja TUJJANENÜ jjanepanaya pajjamü pakasiwa ajamatabü beje pa peka ajibi ejjanai jawabelia. Batsi jane PETUJJANENÜ itsiata baitsi jane ne jume tane bajarra pakujinai. ²⁰ PETUJJANENÜ baja kajena bitso Aarón siwa ajamatabütsi ata pe ajibi ejjanai nejjatsi; JJANÜ ata Aarón to wajütajü bajarra pakujinai. ²¹ JJANÜ wekua pitajü piaja nekonimi, pa peéjana baka jawa jjua pa itsimaü, bajarra jjua tajuitajü, tojjobabajü, kakiatajü tsikirri jawajji ejjanajü, ata taijjanai jawabelia pe paju. JJANÜ jjuarrekajü pe mene bitsojinai jawarreka unu tsuto jawata. ²² Tabera jawata, Masah jawata, Kibrot Hataava jawata ata, pajjamü pa anaipanai ejjaname waja TUJJANENÜ. Pakuinai waja TUJJANENÜ paka itorroba Cades Barnea jawabelia jumaitsi,: ²³ ''Pa ponarre pa norre irranü jjuanü paka rajutatsi','' nejjata pajjamü apo pa jume kowünütsimü pa peka itorrobi jawa waja TUJJANENAÜ DIOSO. pajjamü apo pa jume kowünütsimü apo pa ju tai atamü. ²⁴ Pajjamü kajena pa barra anaipana biabame PETUJJANENÜ pataka yapütai kujinai. ²⁵ Nejjata ta matabakabüta nükajü pitabü nejewa bajarra pa cuarenta pa matakabi beje bajarra pakuenia cuarenta oa merrawi beje, tsipaji baja paka ajibi ejjanai paiba. ²⁶ JJanü pakato wajütatsi PETUJJANENAÜ jawabelia jumaitsinü:'' oh TAJA TUJJANENÜ DIOSO, pütsa itsiata ajibin ejjaname nija jiwi nekobe kowü peka püna ponaiwi ne saüta, pamonai jukame Egipto jawa werrena nekobe saüta. ²⁷ Nejamatabü kueneta jumanarre pajja Abrahan, Isaac Jacob ata; Putsa taneme bajarrab pamoani pe itsi jawa pabisia kuene, bajarra pakuenia pabiasia jamatabaü kuene jawa, pena nekotsi jawami, ²⁸ Jumaitsi tsipai pa irra werrena jukame: ''Tsipaji PETUJJANENÜ apo ka panepai pe kaponai nejja pa irrabelia rajutsia paiba bajarra pamonai, tsipaji meta saya, itoya, bajarra jjuata saya juta pe beyejebi nejj petsewi tusatota.'' ²⁹ Bajarra pamonai Abajju nija jiwi nekobe kowü, pamonai kapitsapame nesaüta tsitajütsiaya ne saü''.