¹ PakujinaI PETUJJANENÜ NIJA DIOSOS ka Kapatsiano pairraberrena neponaponaene nejja, jukaena nitabü nejewa dajjita nakua pijiwi: hititawi, gergeseowi, amorreowi, cananeowi, ferezeowi, heveowi, jabuseowi ata; siete (7) pa nakua pijiwi piniji tomarra jjanetonü jjamü matatojjenetsia. ² Pakujinai PETUJJANENÜ NIJA TUJJANENÜ ne amonayabi nejja bajarrapamonai, pakujinai pa nenawajabitsaütsi jawata pa taneme bajarra pamonai, pa bename, bajarra jjua kujinai pa werrebibianame dajjita. JJamü apo barrü jamatabü jüpainame tsane bajarra pamonai, apo bejiobitaimü tsane ata bajarra pamonai yabarra. ³ Apo barru nakojiobimü tsane ata bajarra pamonai; apo rajutsimü tsane ata nejji petirriawi bajarra pakuenia ata nejji pebijiwi bajarra pakueni ata pejji bajarra pamonai apo to notsimü tsane. ⁴ Tsipaji bajarra pamonai nejji newekua natsatsi ejjananaina pe jitsipai ejjanai nejja itsa diosowi. Bajarra pakuenia PETUJJANENÜ anaipanaina jawata pakasiwa ayaitsane pekotia pajjamü yabarra nejjata baja bajarra PONÜ bepijayo paka werre bibiana. ⁵ Nejjata naja ma pakueniaje itsimü tsane bajarra pamonai: jjamü to tsikababename bajarra pamonai piaja altar jawanü, to tojjobabename piaja petjijai iboto jawanü, to bijianainame piaja pejumape katai jawanü paiaja dioswa Aserawa to tajuitsianame dajjita mujjunene yajawa piaja idolowi. ⁶ Tsiapaji jjamü nija nakua wekua natsata PETUJJANENÜ NIJA DIOSO. Bajarra ponü ka itapeta neto nakuenebi nejja bajarranponü, matatojjenetsia itsa monai ma pa irra pijiwije. ⁷ PETUJJANENÜ apo ka jitsipai jjamü, Aapo ka itapetsi tsipaji bitso ayabitsaüto matatojjenetsia itsa tomarranü, tsipaji pajjamü bitso pa tsikirri tomarrajjimü, ⁸ baitsi jane pa jiwi ka jitsipa, kato najume kopata pajja pitabü nejewa. Bajarra jjuata PETUJJANENÜ ka juta pekobesaüta ka jjania jjania waita pe pünü jawaberrena pe nakuenebibo amoneya, Faraón wekua, bajarra pakuenia ata Egipto piji reinü. ⁹ Bajarra jjua yabarr, yapütaima waja TUJJANENÜ DIOSO, PONÜ PA DIOSONÜ, APO PEKA NOKOFÜNÜTSAINÜ, ponü jamatabüna ponapona dajjita mil pa wirria beje pamonai jitsipatsi apo pe nokofütsiwi pwnajume kopatsiwi jjua majume itorroba, ¹⁰ baitsi jane pamoanai bajarra pakuenia apo itsi pitoyawitsi bajarra ponü itabarra taya matamotsi ejjana, pe werrebiabi nejja; Bajarra PONÜ apo tai jjanepanai tsane pajiwiyo itoyatsi; Bajarra PONÜ to kanawiatsiana pitabarrata. ¹¹ JJamü bajarra jjuata, jjania waitsianame penajume kopatsi jume liwaisi, jjua pakuenia waja itsi nejja pakuenia ata waja jinawonopai nejja jjua JJANÜ ka itsi ejjanatsi ajena. ¹² Itsa jjamü jumetaneme pa liwaisi jawanüje, jjania waitsianame nejjata bajarra pakuenia ata itsimü tsane; nejjata baja PETUJJANENÜ nija DIOSO bajarra jjua itsi tsane penajume koptsi kuenia jjamü jawabelia jjua ata to najume kopata apo pe nokofünütsi jawa ajja. ¹³ Bajarra PONÜ ka jitsipaina, pejjania kuenia ka kojji taina kato ayai bitsaüto ejjanaina; bajarra pakuenia ata ne ubi jawanü irrata, penakuitsi jawa, nija peéjana vinorra bajarra pakuenia ata nijaaceite, bajarra pakuenia ata nija baka bitsaüto nija peéjana bitsaüto jjaneto, jjua pa irra to najume kapata ajja jawabelia pe rajutsi nejja. ¹⁴ JJamü pejjania kuenia bitsio ponaponainame matatojjenetsia itsamoanai; kaibi ata apo ponaponai tsane pejji apo jjainai nejewa bajarra pakuenia ata apo ponaponai tsane petirriwa mawekowa pajjamü jawata bajarra pakuenia ata panija baka tutuju jawata. ¹⁵ PETUJJANENÜ ka wekua tajayotsiana itsa kuene witane; itsa kuene pabisia witane Egipto jawa jjua baja jjamü yapütaneme, baitsi jane bajarra PONÜ tsikopatsiana pamonai jjamü kaitoya. ¹⁶ JJamü amoneyabianame dajjita jiwi bitsaütonü pamonai PETUJJANENÜ nija DIOSO ka rajuta ne amoneyai nejja. Apo katsita bijiobi tsane. JJamü apo jitsipaimü tsane itsa jima diosowi, bajarra jjua raja nejopai nejja tsane jjamü. ¹⁷ Itsa jjamü jamatabü jumaitsimü: ''ma pa tomarra jjanü ne matatojjenetsia piniji bitsaüto; ¿depákuenia meta amoneyabianajü?'' ¹⁸ Pütsa kujunawame bajarra pamonai; najamatabüna pitsianame jjua PETUJJANENÜ DIOSO itsi Fraónü yajawa dajjita Egipto; ¹⁹ jjua pinijilueneta nabijiobitsi nejja jjua taneme nitajjutota, jjua pakuenia katsitajüba, pejjania kuene, piakobe saüjawakuene, jjua nakobe tsatsia. PETUJJANENÜ DIOSO ka juta bajarra pakuenia ata PETUJJANENÜ DIOSO ka jutsiana dajjita pamonai kujunawame bitso. ²⁰ Itsa jawa, PETUJJANENÜ DIOSO itorroba enemanüto bajarra pamonai tutuju jawata, bajarra pamonai kobejjai namatayabiana bajarra pakuenia ka kobejjai namatayabiana, ka kobejja ajibi tsane. ²¹ JJamü apo kujunawomü tsane bajarra pamonai, tsipaji PRTUJJANENÜ DUOSO pajjamü tutuju jawata ponapona, PIAYAI KUENIA WAJA KUJUNAWI DIOSONÜ. ²² PETUJJANENÜ DIOSO jukaina bajarra pa nakuanü ne wajunaya beajjayo kuenia. JJamü kaikuenia apo amoneyabimü tsane, penawitsi yaniwa piayawi jjamü kamata toyorrotsia. ²³ Baitsi jane PETUJJANENÜ DIOSO ka amoneyabi nejja pakujinai panataneme pane nawajabitsaütsi jawata; Bajarra ponü apo najamatabü tai ejjanai tae tsane bajarra pakuenia werrebiabiana. ²⁴ Bajarra PONÜ ka tsikobe rajutsiana ne itsi nejja jjua jjamü, ejjata jjamü wünü ikinainame bajarra pamonai bajarra jjua itsipame itabojjo büjjupanata. Itsa jiwi ata apo kuene kaüpai tsanetsi newajünaya jjamü, tsipaji baja jjamü werrebiabianame. ²⁵ JJamü tajuitsianame jjua pe tsarrutsi jawanü jima diosonü jawanü. Putsa pejjania kuenia naübame jjuanaü pa orojanü palatajawanü ata bajarra pakuenia putsa pitame jjamü nejja ata, tsiapaji itsa bajarra jjua itsimü, bajarra pamonai ka waitabiana, tsipaji bajarra tsita abejetsi PETUJJANENÜ DIOSO. ²⁶ JJamü bajarra jjua apo karrenamü tsane piabeje jawa nijabo jawaberrena nejjata bajarra pakuenia ne jitsipai yaniwa. JJamü itoyamü tsane dajjita jamatabü kueneta jjamü nawekua ikinainame, tsipaji bajarra jjua natsata pe werrebiabi nejja.