¹ Ma jjua je penajume otorrobi jawa, pakuenia jawa itsi nejja, penajume kopatsi jawa TUJJANENÜ DIOSO ne otorroba pata tsitajübi nejja, pena jjania waitsi nejja pa irrataje itsa jjoyo pajjamü pa poname Jordán jawa pane najjainaibi nejja; ² Pane iya ejjanai nejja waja TUJJANENÜ DIOSO, pane jamatabüna jina wonopai nejja jjua baja naka itorroba yajawa jjua nakato najume itorroba jjua baja ajena paka itorrobatsi, pajjamü, panejji, panejji ata pejji, dajjita matakabi pena asaü epatota, pa pekato apianejja panija matakabi. ³ Bajarra jjuata Israel jumetaima, nakoparre bajarra pamonai jawata, jjania waitsia ne ponaponai nejja dajjita pejjania kuene pekato ayai jawa nejja itajjutejema jawata, pa irra jawata pitsapa pemi upirra lecherra yajawa jabürra, pakuenia waja TUJJANENÜ DIOSO, PEPO WAJA DIOSO pane ajja jiwimi, jjua rajuta. ^{4 5} Jumetaima Israel: PETUJJANENÜ WAJA TUJJANENÜ KAINÜ BAJA KAJENA. JJamü jitsiapainame PETUJJANENÜ njianDIOSO dajjita ne jamatabütota yajawa dajjita ne saüta. ⁶ Ma pa liwaisi jjua paka kujarrubatsi ajena, paka tsi jamatabü rukaina, ⁷ JJamü baja najjatsiayo kuenia kujarrubianame nija pejewajji, bajarra jjua tsipaibianame nija bo jwata, itsa barru najetarrukame namutua, pane majitsi jawata baya pane naükobi jawata ata. ⁸ JJamü baja Kütsianame penayapütai nejja nekobe jawata kato jjanepanaina tsipaji kaponaponainame nija matamo ntajjuto tutujü jawata. ⁹ JJamü bajayakinainame baupa mujjunene jawa nijabo jawata bajarra pakuenia nija tomarra baupa jawata ata ¹⁰ Pakujinai waja TUJJANENÜ DIOSO ka patsi ejjana pa irra berrena itsa jota to najume kopata panija ajja, Abrahan, Isaac Jacob ata; karrajutsiana pina, piniji kuenia pejjania tomarranü jjuanü jjamü apo nakuenebimü, ¹¹ Nijabo wünükaina pejjania kuene jjua jjamü apo itsimü, merra müthu apo nekue jawa, ne ubi pabianü olivo jjua jjamü apo ubimü. Bajarra jjua jjainame jjamü pejjania jjamü penename, ¹² Nejjata yapütainame ne nakofünütsi yaniwa waja TUJJANENÜ, ponü ka juta Egipto irra wekua, nena konotsi jawami. ¹³ Pajjamü pinijiyo ejjanainame waja TUJJANENÜ DIOSO, bajarra ponü pa jitsapainame pe wünüta pa jjaniajamü tsane. ¹⁴ Apo pa pünaimü tsane itsa diosowi, piaja diosowi pamianai jinawonopa ne pünüya jjamü; ¹⁵ Tsipaji waja TUJJANENÜ DIOSO ponü ponapona pajjamü tutujuta DIOSONÜ pe üwinü. Itsa pa itsimü, pa anaipanai ejjanainame waja TUJJANENÜ pe kotia paka tajuena pajjamü bajarra ponü paka ajibi ejjanaina pa irrataje. ¹⁶ Apo aibimü tsane waja TUJJANENÜ DIOSO pakuenia jume aibame Masah jawata. ¹⁷ JJania waitsi aname penajume itorrobi jume waja TUJJANENÜ DIOSO, pe itorrobi jume pejjania kuenia, bajarra pakuenia jawa itsinejja, jjua baja bajarra ponü paka itorroba pajjamü nejja. ¹⁸ Pa itsimü tsane jjua paka tsita jjanenpana pitabü nejewa waja TUJJANENÜ, jjania waitsia pane jinawonopai nejja pajjamü, bajarra pakuenia pane ponai nejja pane najjainayabi nejja pejjania irra jjua baja to najume kopata waja TUJJANENÜ panija ajja pijiwi jawabelia. ¹⁹ Pe jukai nejja dajjita pane kueyawi pane wajunaya pajjamü, pakuenia waja TUJJANENÜ jumaitsi. ²⁰ Nejjunato itsa kayanijoba pa matakabita kajumaitsi tsane: ''¿Detsa jjua to jume jjanepanatsi jjua pajume nakato najume ruta, jjua waja itsinejja, jjua ata nakato najume kopata waja TUJJANENÜ paka itorroba pane itsi nejja?'' ²¹ Nejjunati nejjata jumaitsimü tsane: ''Wajjaitsi raja kopiaya waja nanekotsiwimi Faraónü piaja piani wimitsi Egipto jawata; waja TUJJANENÜ naka juta Egipto wekua pekobe saüta, ²² Bajarra ponü itajüba pejjania kuene, pijijawa kuenia Egito jawata, Faraón piaja bo jawata, pajjanü pata itabü nejewa; ²³ bajarra ponü pane barrurrena woyofuaberrena bajarra jota kujinai, bajarra pakuenia patane barru rena nejja pa irra berrena pakuenia bajarra ponü naka jumaitsi waja ajja pijiwi jawabelia. ²⁴ PETUJJANENÜ naka itorroba waja jamatabüna jinawonopai nejja dajjita jjua naka itorroba waja itsi nejja, jjua jjainatsi waja TUJJANENÜ waja DIOSO waja nakato jjanepani nejja, bajarra pijinia pakuenia bajarra ponü naka asaü ejjana ponapona, pakuenia ajena jinawonopatsi ajena. ²⁵ Itsa baja jjaniawaitatsi dajjita jjua nakato najume itorroba pitabü nejewa waja TUJJANENÜ waja DIOSO, pakuena bajarra ponü naka itorroba wajjaitsi nakato pejjania kuene tsane''.