¹ Nejjata Israel, jumetane piaja liwaisi pena jume itorrobi jawa imojjoyo baja ü ta ka kujarrubi nejja, ne itsi nejja; ne ponaponai nejja, ne jone nejja bajarra pa irra belia jjua PETUJJANENÜ, ajja pijiwimi piaja DIOSO, ka rajuta najetarruka. ² JJamü yajawa rajutsianame pa liwaisi kajumaitsitsi neyajawa ne rajutsi nejja, apo yajawünü ukutsimü tsane, bajarra pakuenia ne jjaniawaitsi nejja tana najume itorrobi jawa JJANÜ PETUJJANENÜNÜ nija DIOSONÜ, jjua ü taka itorrobi nejja. ³ Nitajjuto taneme jjua PETUJJANENÜ itsi Baal pejamatabü kueneta; tsipaji pa pebijiwi püna pona Baal-Peor, PETUJJANENÜ nija DIOSO werrebiaba bajarra pamonai pajjamü wekua. ⁴ Baitsi jane pajjamü apo pane natijjibiwi waja TUJJANENÜ DIOSO ajena pajjamü pa asümü, kanakujitsia. ⁵ Taima, jjanü ka kujarrubatsi pejjania jai liwaisi pakuenia ne itsi nejja, pakuenia PETUJJANENÜ taja DIOSO ne itorroba ta itsi nejja irra tutujuta, bajarra jjua jawa pa jone najetarrubename pane jjainai nejja pane kobe kowü kuenia. ⁶ Nejjata baja jjania wairre bajarra jjua itsimurre; tsipaji bajarra jjua raja neyapütai nejja jjaniawaitsia ne tai nejja jiwi, pamonai jumetane jjua pajume yabarraje pakuenia itorrbIA jumaitsinü: ''Yapütai kuenia baja ma pa nakuaje yapütaya pe jumetai tomarranü''. ⁷ ¿De panakua meta jjaina pe imojjoyobi diosotsi bajarra pamonai, pakuenia waja TUJJANENÜ waja DIOSO naka yajawa pakujinai junatsi wajjaitsi? ⁸ ¿Depa nakua meta jjaina penajume kopatsi liwaisi jjaina pakuenia pejjania kuenia pe jinawanapai nejja dajjita pajume liwaisi pakatsi kopatsi pajja panitabü nejewa ajena? ⁹ Pajume taima jjania waitsia kueneta yapütaya pa jjaniawairre, pane nokofünütsi yaniwa jjua baja pa teneme panitajjutonüta, pa peka wekua ponai yaniwa pane jamatabü üthütonü wekua dajjita matakabi pane asaü matakabi. Pakujarrubarre panejji bajarra pakuenia ata panejji pejji. ¹⁰ Bajarra pamatakabi pakujinai nukame pewajunai werrena waja TUJJANENÜ nija DIOSO Horeb jawata, pakujinai PETUJJANENÜ ne jumaitsi: ''kaituarre dajjitajiwi, jjanü jumetai ejjanainajü taja jume liwaisi, bajarra pakuenia peyapütai nejja tane yeiyatai nejja dajjita pa matakabi beje jinawonopa pa irrataje, bajarra pakuenia pane kujarrubi nejja ata panejji''. ¹¹ JJamü na imojjoyotame nukame petsuto jawata. Bajarra pa tsuto tajua pekotiata junaya ata athubüabetsia, nakaituata petsaibia pajubo. ¹² PETUJJANENÜ paka jumaitsi pajjamü paka barru kuikui pekotia jawa werrena; pajjamü pajumetaneme pe jume liwaisi, itsiata baitsi jane itsa kuiene jumape apo taimü; saya baja jume taneme. ¹³ Bajarra ponü najume jume itorroba pa dajjitamü nejja pane jume kowünütsi nejja, Diez pa penajume liwaisi itorrobi jawa beje. Bajarra ponü najume yaquina najua ipata bejeta. ¹⁴ PETUJJANANÜ nitorroba bajarra pa kujinai pataka kujarrubi nejja pakuenia pene jinabonopai nejja pataka kujarrubi kuenia, nejjata pajjamü pane jume kowünütsi nejja pa irrata pane epa nikabi kujinai bajarra pa mene pane notsi nejja pajjamü. ¹⁵ Nejjata baja payapütaima tsipaji pajjamü apo pa taimü itsa kuene ata pakujinai waja TUJJANENÜ paka barru kuikui jai Horeb ünü jawata pekotia tutujuta-- ¹⁶ Putsa pabisia kuene pa itsimü panija kueneta pütsa baja saya pa kuene kataneme itsa kuene nuanü, be pebi kuenia bajarra pakuenia be petirriwa ata, ¹⁷ Be piayainü ata, irrata pe jinawanapaiwi, bajarra pakuenia ata itajjutejema pe korrofe rukainü pe pünainü athüyo, ¹⁸ Itsa jume pejumape jüpainü pena roobokainü irrata, itajjutejema ata pejumape jüpainü dujainü ponüanü jina wonopa mene irra bujjupana jinawonopa. ¹⁹ JJamü apo taimü tsane athubuabetsi ne jitsipai nejja matakabi biji juameto, merrawi piaja juameto tulupütonü ata dajjita wajabitsaü athubü piji wajabitsa, waja to najjuanainejja waja jitsipainejja, bajarra pamonai dajjita yabarra PETUJJANENÜ nija DIOSO yajawünü rajuta bajarra pamonai pe jinawonopaiwi itabojjo büjjupanata. ²⁰ Baitsi jane waja TUJJANENÜ pita kapona woyofuabelia piatajü jierro ünü jawa wekua, Egiptp pijijawami wekua, piaja tomarra piajawa nejja, pakuenia pajjamü ajena pakuenia. ²¹ PETUJJANENÜ ne barra anaipana pajjamü yabarra; Bajarra ponü neto najume kapanepai ejjana apo ta epa nikabi nejja Jordan mene, jjanü pina apo jonenü tsane pejjania irrabelia ata, pa irra waja TUJJANENÜ nija DIOSO ka rajuta. ²² Baja rajjuata pe tajjunai jawata, JJanü baja thupainajü pa irrtaje; apo ponainü tsane Jordán jawabelia; baitsi jane itsiata jjamü ponainame epa nikabianame ne jjainai nejja bajarra pa pejjania irra. ²³ JJania waitsia pa jumetaima, pane nokofünütsi yaniwa jjua najume liwaisi kopata waja TUJJANENÜ nija DIOSO pakato itsi pajjamü nejja, baja pijinia pa tsarrurre pajjamü nejja itajjutejema jumape katai jawanü jjua waja TUJJANENÜ nija DIOSO paka itaweta pane itsi nejja. ²⁴ Payapütaima waja TUJJANENÜ DIOSO raja pekotiata pe werrebiabinü, pe üwi DIOSONÜ. ²⁵ Pakujinai jjainainame nejji bajarra pakuenia ata nejji pejji, pakujinai bajaya jebi ponaponame pa irrata, itsa baja apo jume kowütsimü nijakueneta itsa baja tsarrutame itajjutejema pejumape katai kuenia jjua tsita abejetsi waja TUJJANENÜ nija DIOSO tsita abejetsi saya baja pa itsimü pe anaipanai nejja. ²⁶ JJANÜ ajena junatajü itabojjo bajarra pakuenia ata junatajü irra peyapütai nejja jjamü yabarra, ne ajibi jawa baja tsaponai tsane beajjayo kuenia ata ne werrewerrekai jawabelia pa irra wekua pajjamü pa epa nikabianame Jordán mene pane jjainai nejja, apo kato matakabi apia ejjanai tsaponai tsane bajarra jota, baitsi jane pepo kuene ka werrebibiana. ²⁷ PETUJJANENÜ paka yajawünü kaponaina tomarra wekua payajawünü nakopatsianame kaijiwi beje nakuata, itsa jita PETUJJANENÜ paka kaponaina tajü jawabelia. ²⁸ Bajarra jota pajjamü pato nakuenebianame itajjutejema diosowi, naijawa diosowi iboto piji diosowi ata, saya baja pe nakuenebi jawanü pebi jiwi, saya bajarra jjuata itajjutejema diosowi apo pe taiwi, apo be jumetaiwi, apo pe jjaiwi apo pe tujjuniwi ata. ²⁹ Bajarra jota kujinai, matapania pa jaitsianame waja TUJJANENANÜ nija DIOSO, itsiata baja namatjjunainame, itsa baja jaitame pepo nejamatabü üthutota yajawa dajjita nejamatabü kueneta. ³⁰ Pakujinai apo ka kuene kaüjüpai, itsa pakujinai katsi najetarruka dajjita bajarra jjua, bajarra pa matakabi nija perrujunü jawata, bajarra pa matakabita waja TUJJANENÜ nija DIOSO kajumetaina nija jume. ³¹ Tsipaji waja TUJJANENÜ waja naka itajjuto tsonia tainü; Bajarra PONÜ apo faifaina itsiata apo ka werrebiabi tsane, apo nokofünütsi jjua kato najume liwaisi jjamü bajarra pakuenia ata ajja. ³² Nejjata baja,nayanijobarre jjua yabarra itsi pa matakabianü itsi nitabü nejewa, depatsa jane witsata jjamü ne wajünaya: ¿Pa matakabi kujinai DIOSO itsi jiwitonü pa irrata dajjita mujjunene jawabetsia ata athüyo itsa jawa betsia ata, yanijobarre itsa kuene jawa meta mata tojjenetsia baja jumetaneme? ³³ ¿ itsa matakabi meta itsa jiwiyo jumetane DIOSO pejume pe kuikui jai jawa pekotia tutujuta, pakuenia baja pajumetaneme, pakuenia baja pa taneme? ³⁴ ¿Itsa matakabi DIOSO paka pitsia paibi bajarra ponü nejja itsa nakua wekua bajarra pa nakua tutuju wekua itsa nakua jawabelia, petsita jjanepanai jjaitsi, pe tai jjae, pejjania kuene jawa, penabe kobe jjae, piakobe saü jjae, tsipaji to nakoeyotatsi, tsiapaji piayai kuene tane; pakuenia nija TUJJANENÜ DIOSO itsi jjamü nejja Egipto nakuata nitabü nejewa? ³⁵ Bajarra jjua katsitajüta jjamü nejja, neyapütai nejja PETUJJANENÜ raja DIOSO, tsipaji baja kajena ajibi itsa kuene jawa ata matatojjenetsia bajarra ponü, ³⁶ Athubüyo jawatatsia Bajarra PONÜ ka jumetai ejjana pejume liwaisi, bajarra pakuenia bajarra ponü peka kujarrubi nejja; irrata bajarra ponü katai ejjana piasaü kotia; jjamü jumetaneme pejume pekotia tutujuta. ³⁷ Tsipaji bajarra ponü asiwa ajja, bajarra PONÜ itapeta pajja wirria bajarra pamonai kujinai ka kapitsapa Egipto wekua bajarra pona yajawa, pesaüta, ³⁸ Peka pitsapai nejja newajunaya piniji nakuanü matatojjenetsia jjamü piasü tomarranü, pakuenia ka barru rena ajena peka rajutsi nejja bajarra pa irra ne na jjainaibi nejja. ³⁹ Itsiata bja ejena yapütaima rurre nejamatabü üthutota, neyapüta nejja PETUJJANENÜ raja DIOSONÜ athubü pijinü irra büjjupana pijinü ata; ajibi be bajarra ponü kajena. ⁴⁰ JJamü itorrobianame pekuenia pejinawono pai nejja, pa liwaisi ata kato najume kopatatsi jjua ajena kato itorrobatsi, pejjania kuenia ne ponaponai nejja jjamü nejji ata jjamü yabarra, jjamü bajarra pakuenia kato apia ejjanainame matakabianü pa irrataje jjua waja TUJJANENÜ DIOSO karajuta dajjita matakabi jawabelia nejja. ⁴¹ Bajarra jjua kujinai, Moisé itapeta akueyabi tres (3) pa tomarra beje pa tomarranü ena Jordán tamó yene panata ena, ⁴² Baja bajarra jota pajiwiyo itsa jiwi peyajjuaba itsa kuene nejewa, apo na pekueya jiwi beje nejewa kopiayami; itsa namatayaba ponapona ma pa yajawünü tomarranü jawata, bajarra ponü pane paina. ⁴³ Ma bajarra jjua pa tomarranüje: Beser tusato tsewi jawa, woyofo nakua, Rubenitawi nejja; Ramot pijiia Galaad jawata, Basán jawata pijinia Gaditawi; Manasitawi yajawa. ⁴⁴ Ma pa liwaisi je Moisé rubi ejjana Israel tomarra pijiwi nejja; ⁴⁵ Ma jjuaje pane jinawonopaia nejja pakuenia najume liawaisi kopata, pajume liwaisi yajawa jjua itorroba pakuenia waja jinawono pai nejja pakuenia jumaitsi Israel tomarra jawabelia pakujinai pitsapa Egipto wekua, ⁴⁶ Pakujina bajarra pamonai jinawonopa Jordán yenepananenia Bet-Peor, büjjüfoto jawanenia, Sheón irrata, amorreowi piji reinü, Hebrón jawata pe jinawanapaiwimi, pamonai Moisé yajawa Israel piji tomarra pijiwi amoneyaba pakujinai pitsapa Egipto wekua. ⁴⁷ Bajarra pamonai nota bajarra pa irranü pena jjainayabi nejja, Og, Basán piji reinü ata piaja irra. Bajarra jjua yabarra, najuanü beje amorreowi piaja reinü, ponü beje ponapona Jordán matatojjenetsi pa yenepana werrena ba pitsapa matakabin piji juameto. ⁴⁸ Bajarra pa nakua Aroer jawa werrena kujinai kopia majetarruka, pe mujjunenia Arnón büjjufoto jawa, Sion unu jawa berrena(Hermón unu ata pewünü) ⁴⁹ Yajawa dajjita woyofo büjjufot Jordán mene jawa belia, mata tojjenetsia Jordán jawabelia itsa werrena pitsa matakabi piji juameto, pepo Arabá mene, Pisga unu yenepana jawabelia.