¹ Bajarra jjua kujinae panapünü yorrobajü nejjata baja pa ponajü petusatua namutualia petsobia manua mene jawabelia, pakuenia waja TUJJANENÜ ne jumatsi; wajjaitsi ponatsi Saeir unu pünü nenia bajaya jebi. ² Waja TUJJANENÜ ne jumaitsi jjanüta, jumaitsi pakuenia: ³ ''Pajjamü pa poname ma unu pe pünüyaje bajaya jebi; pa matawakerre pe tamó yabereka. ⁴ JJania waerre baja nija jiwi, jumaitsimürre: ''Pajjamü pa epa nikabianame pa nijamonae jawa, Esaú wirriawi, Seir jawata pe jinawanapaiwi; bajarra pamonae ka kujunawiana. Bajarra jjua yabarra, Yapütaya najerrukainame. ⁵ Ne barrü nabe yaniwa bajarra pamonae, tsipajji JJANÜ apo karrajutsi tsanetsi bajarra pamonae piaja irra, ajibi, kajena tsikirri jawayo ata apo peka tajju japa kaüjüpai kuenia netajju na nonotsi jawa, tsipaji JJANÜ rajutajü Esaú Seir unu pena jjainayabi nejja. ⁶ Pajjamü pa komuakainame panija platanüta pejjai jawa bajarra pamonai jawabelia pane jjainejja; bajarra pakuenia pa komuakainame panija palatanüta bajarra pamonae jawabelia merranü pane apai nejja. ⁷ Tsipaji panija TUJJANENÜ DIOSO pejjania kuenia paka tane pane nakuenebi jawa; Bajarra ponü yapütane pakuenia petusato jawa najetarrükame. pa kuarenta pa way beje jjenetame waja TUJJANENÜ DIOSO ka yajawa, bajarra jjuata apo kato sajinai itsa kuene jawa ata. ⁸ Nejjata baja epa nikabianatsi itsa irabelia waja monae jawabelia, Esaú wirria jawabelia pamonae jinawanapa Seir jawatalia, Tajü wekua Arabia namuto, tajü ata wekua Elat bajara pakuenia ata wekua Ezión Geber. Bajarra jjua kujinae pa mata wakebajü Moa namutua petusato jawa. ⁹ Waja TUJJANENÜ ne jumaitsi: ' Pütsa pa jamatabü itonotame Moab pijiwi, pütsa pa barrü nabiame bajarra pamonae wajabitsaü kuenia. Tsiapji raja jjanü apo paka rajutsi tsanetsi bajarra pa ira pajjamü nejja, tsipajin JJANÜ rajutajü Ar tomarra Lot pemomojji, bajarra pamonae pe najjainayabi nejja.' ¹⁰ (Emitawi jinawopa bajarra jota kopiyami, pejjania tomarrami, ayai bitsaüto jjanetonümi, bitso piapiawi be Anaceowi; ¹¹ Bajarra pamoae ata be Rafaítas, be Anaceowi; baitsi jane itsiata Moabitawi wünü ruba bajarra pamonaimi Emitawi. ¹² Horeowi ata baja kajena kopiaya jinawanapa Seir jawata bajarra pamonae pe wajünaya, baitsi jane Esaú pe momojji ma jjua itsije. Bajarra pamonae amoneyaba nejjata baja pekowüta jinawonopa, pakuenia Israel itsi pena jjainayabi irra jjua waja TUJJANENÜ rajuta bajarra pamonae.) ¹³ '''Ikatsia Nonotapunarre ponarre baja Zared pukabelia.' Nejjata baja pa ponajü Zared pukabelia. ¹⁴ Ikatsia baja, pa matakabi beje panepa najetarruka pata ponai kujinae Cades Barnea irra berrena pata epa nikabi nejja Zared puka berrena, kajena baja trainta y ocho pa pawai beje. Nejjata bajarra jjua kujinaitami kujinai ata ajena konojjaeta, dajjita bajarra pa pebijiwimi pejjane panaiwimi pe nabe nejja, baja nawerrebaba tüpa, pakuenia baja waja TUJJANENÜ to najume kopatatsi bajarra pamonaemi. ¹⁵ Baja kajena, waja TUJJANENÜ to nakobe buata bajarra pa wirriami, bajarra pakuenia pe werrebiabi nejja jiwi itabü nejewa, ata pe tüpai jawabelia. ¹⁶ Nejjata baja pakujinae dajjita pebi jiwi pe jjanepaniwi pe ajamatabü saüwi tüpa, nejjata baja pona jiwi wekua, ¹⁷ Baja waja TUJJANENÜ ne jumaitsi, pakuenia je: ¹⁸ ''Ajena baja najetarrukainame Ar tomarra jawa, Moab pena tsatsi jawa. ¹⁹ Itsa baja imojjoyota najetrrukainame Amón tomarra, pütsa jamatabü itonotame pütsa barrü nabiame bajarra pamonae; tsipaji JJANÜ apo ka rajutsi tsanetsi jjamü nejja Amón irra; tsipaji JJANÜ rajutajü Lot pejji bajarra pa irra penejjanayabi nejja. ²⁰ Bajarra pa irra ata baja yapütanetsi Rafaim irra kuene. tsipaji baja kajena kopiayami Rafaitawi bajarra jota, baitsi jane Amonitawi wünü ruba Zomzomeowi, pinijiwi pe jai jume. ²¹ Piniji tomarra ayai bitsaüto itsa jota jinawanapa, pinijiyo jjane tonü be Anaceowi. Baisi jane waja TUJJANENÜ amoneyaba Amonitawi pitabü nejewa, bajarra jjua kujinae pe kowüta jinawanapa. ²² Bajarra pakuenia ata to itsi waja TUJJANENÜ Esaúta piaja jiwita, pamonae jinawanapa Seir jawata, pakujinae bajarra ponü amoneyaba Hereowi bajarra pamonae pitabü nejewa, pakujinae Esaú pejji amoneyaba bajarra pamonae baja nejjata pekowüta jinawanapa ajena konojjai jebita. ²³ Aveowi nejja pamonae jinawanapa tajü bojjita be Gaza jawata, Caftoreowi, pamonae pona Caftor jawa werrena, amoneyabatsi bajarra pamonae rabaja juya jinawanapa bajarra pa tajjunai jawata. ²⁴ ''Nejjata baja pa nonobapünarre, pa ponarre bajarra pamonae pe tajju namutua pa ponainame Arnón tojjoto jawa; pa tainame, tsikobe rajutajü raja Sehón Amorreonü, Hesbón piji reinü, yajawa piaja irra. Pa tajju jjuabarre baja pane najjayabi jawa, bajarra ponü baja pa barrü nabema wajabütsaü kuenia. ²⁵ Ajena baja tajjujjuabianajü pa peka kujunawi nejja dajjita tomarranü pe enai jawanü itabojjo büjjupanata, bajarra pamonae nekoneko jai tsane pa peka yabarra jumetai jawata, paka kujunawiana pajjamü ²⁶ JJANÜ itorrobajü tane jume kaponaiwi Cademot tusato jawa berrena kujinae ata Sehón jawa berrena, Hesbón piji reinü pejjania kuenia jumaitsinü, pakuenia je: ²⁷ ''Neto koparre itsiata nija irra jawa ta ponai nejja; namutua raja najetarrukainajü, apo epa tokebi raja tsane ta tsawenonenia takuja nenia ata. ²⁸ Ka komukainatsi nija pejjai jawa taja kobe palata ta, bajarra pakuenia ta jjae nejja; bajarra pakuenia ka komuatsianatsi merra, ta apai nejja; saya baja neto koparre ta ponai nejja bajarra jjoyo ta tajjuta; ²⁹ Pakuenia Esaú pejji pe jinawanapaiwi Seir jawata, pakuenia baja moabitawi pe jinawanapaiwi Ar tomarra jawata, neto itsi jjanü; ata ta jone nejja Jordan irrabelia itsabelia baja taja TUJJANENÜ Dioso ne rajuta''. ³⁰ Baitsi jane Sehón, Hesbón piji reinü, apo pa neto kopatsi pata ponai nejja piaja irra jawa; tsipaji waja TUJJANENÜ DIOSO jamatabü tjijai ejjana, ajamatabü kowübi ejjana, bajarra pakuenia Bajarra Ponü pe amoneyabi pekatsi kobe kopatsi nejja, pakuenia baja itsi ajena pa matakabianüta. ³¹ Waja TUJJANENÜ ne jumaitsi: ''taima, tajjujjuabajü ta rajutsi jawa Sehón yajawa dajjita irra pajjamü panitabü nejewa; pa tajjujjuabarre baja pane notsi jawa, pane jjainai nejja panija irranü pane jjainai nejja panija kobe kowünü,'' ³² Nejjata baja Sehón pane tsimajju rena, bajarra ponü yajawa piaja jiwi, pa tane be nejja Jahaza jawata. ³³ Waja TUJJANENÜ DIOSO paneto kopata pajjanü nejja bajarra jjuata pa amoneyabajü, pa werrebabajü, yajawa dajjita pejji, piaja jiwi ata yajawa. ³⁴ Bajarra pa epatota kai kuenia pa tajuitajü dajjita tomarranü kai tomarra kanakujitsia; yajawa dajjita pebi jiwi, yajawa petirriawi, ata pejewajji apo pa kopatsinü kai jiwiyo ata. ³⁵ Saya baja kai jawa pa notajü piaja bakanü pata jjai nejja, yajawa pata patsi tomarra jawata ata. ³⁶ Aroer jawa werrena kujinae, Arnón totsoto itapaya berrena, yajawa pa tomarra eka bajarrajota pa totsoto jawata, ata Galaad, ajibi kai tomarra pata namatajjunai jawa pajjanü nejja. waja TUJJANENÜ DIOSO pane rajuta bajarra jjua pata amoneyabi nejja pata kueyawi pamonae pa jjainajjü pata wajunaya. ³⁷ Saya baja ü Amón piaja wirria irrabelia apo ponaimü, pakuenia poname dajjita Jaboc mene jawa, pakuenia unü tomarranü jawa, dajjita jawa itsa jjoyo baja waja TUJJANENÜ naka itaweta waja ponai nejja.