¹ Moisés ma pajumenü na jume kopata dajjita Isrrael nejja a ta bebeliayo matatojjenetsia Jordan mene pünüyabelia a ta woyofuabelia, itsabelia baja woyofo tusato namatajüpa Jordan mene itapayabelia Suf irratalia, baja imojjoyo jawatalia parán, Tofel, Labán, Hazerot baja a ta Dizahab. ² Bajarra belia baja kajena once pa matabi beje namutualia pe patsi nejja Horeb unubelia Seir jawabelia pa namuto ruka Cades Barnea jjua rruka. ³ Bajarra jjua kujinae kuarenta pa wai beje kujinae once juametota penata jjainai matakabita pa juametota pitsapa Egipto werrena, Pakuenia baja Moisés jumaitsi piaja nakua pijiwi Israel pijiwita, pakuenia jumaitsi je dajjita jjua dajjita Dioso jumaitsi pakuenia baja itorroba bajarra ponü bajarra pamonae nejja. ⁴ Bajarra itsi pe pua amoneyabi kujinae Sehón amoreo piji rreinü, ponü ponapona Hesbón jawata, Og ata Basan piji rreinü, ponü ponapona Astarot jawata Edrei nakuata. ⁵ Jordán pepünüyabelia, Moab irratalia, bajarra jotalia Moisés tajjujjuaba pe kujarrubi jawa, jumaitsi pakueniaje: ⁶ Waja tujjanenü Dioso naka tsipaeba Hoerb ünüta na tsipaeba pakuenia je: ' Pajjamü kajena bajaya jebi pa jinawonopa pa unuta je. ⁷ Pa ponarre baja Amorreowi piaja unuabelia yajawa dajjita tajjunai jawa bajarra jjua imojjoyo jawanü jawa woyofo tusato jawa ata Jordán mene jawa bereka, a ta baja kajena dajjita büjju fotuaberreka a ta, imojjoyo jawaberreka neguev wünü jawatarreka, yajawa dajjita itapa yaberreka Cananeowi piaja ira berreka, baja a ta libano jawa berreka, tajü pakuenia baja ba mene. '' be Eufrate kuenia. ⁸ Kajena baja paka tsiwajunai ruta najetarüka iranü pajjamü nejja, dajjita pa jonema pa jjainare pane kobe kowü bajara pa irata jjua baja waja tujjanenü rrajutsia paeba panija monaimi wajja jiwimi- Abrahan ata, Isaac ata, Jacob ata baja kajena, bajara pamonae nejja a ta baja kajena pijamonae nejja.' ⁹ JJanü baja kajena paka jumaitsitsi bajarra pa matabi paka jumaitsi, jjanü rraja apo pa ne kuene kaüjüpai kai nünü pa taka ewetsi nejja. ¹⁰ waja tujjanenü Dioso rraja paka nawitsi ejjana, baja kajena pana taima, ajena, bitso baja pa ayai bitsaütomü bepa tulupu bitsaütomü. Baja waja tujjanenü, ¹¹ ¡Dioso panija ajja jiwi ata piaja Diosonü, baja kajena bitso paka nawitsi ejjana ayai kuenia mata tojjenetsia ajena konojjae, yajawa baja paka tai pejjania kuenia, pakuenia baja najume kapanepaya jaitsi bajara ponü! ¹² Baitsi, jane, ¿Depakuenia jjanü kaenünü be paka kobe kowü kaponai jitsipatsi, baja pakuenia pakuenia pana jamatabü jjainame, pakuenia ata itsa apo oa jitsipaimü? ¹³ Baja nejjata pa kaituarre ü pebi jiwi pe yapütaiwi, ü pe je jaiwi pejjania kuene pe itsiwi tomarrata, kai wiria kanakujitsia, bajarra pamonai paka mata kaponaina pajjamü.' ¹⁴ Pajjamü pane jume pitame pane jumairsimü: ' jjua baja pane jumaitsimü baja kajena jjanepana jjua pane itorrobame pata itsi nejja.' ¹⁵ Nejjata baja, junatAjü ü peta kanübeniwi panija wirriawi, pebi jiwi ü peyapütaiwi, ü peya wünü janepanaiwi, bajarra ponüanü nubajü pa peka ya ewetsi nejja pajjamü, bajarra ponüanü mil ponü beje piaja jefe nüanü, cien pa kapitananü beje piaja jefe wi ata, cincuenta ponü beje ata piaja jefenüanü, Diez pa peitorrobinüanü ata kajena piaja jefe nüanü, kai wiria kana kujitsia baja kajena bajarra pakuenia nubajü. ¹⁶ JJanü itorrobajü bajarra pamonai peya wenonaiwi nejjatsi bajarra pa matakabianüta, jumatsinü: ''Pa jumetaima jjua apo pa jitsipaimü panija monai jawata, pa barra tsibaibarre jjua pepo kuene baja ba itsi pebi bajarra pakuenia ata baja pa itsimaürre panija monainü, ponü ata pena patsinü pena yajawa ponaponainü bajarra ponü jawata. ¹⁷ Pajjamü rraja apo pa itapetsimaü tsane itsa kueni jawa ata, pajume kowütsainame baja kajena tsikirri jiwiyo ata baja bajarra pakuenia ata piniji jiwiyo. Itsa kuene jawa ata pütsa pa kujunawame, tsipaji baja Dioso bajarra jjua itsi. JJua bitso apo pajitsipaimü pa peka tsita ayapübeje jawa pajjamü, jjanü jawaberena paka ponare, jjanü baja nejjata jumetainajü.' ¹⁸ JJanü baja kajena bajara pakujinae paka itorobatsi dajjita jjua pa jitsipame pane isti nejja. ¹⁹ Najetarrubenatsi tajü werena Horeb jawa werena najetarubenatsi piayai tutuju tusato jawa jjua baja pajjamü pa taneme, Amoreowi tsutone namutuarena, pakuenia baja waja tujjanenü Dioso naka itoroba; waja patsi nejja Cade Barnea jawata. ²⁰ Paka jumaitsitsi: 'Pa ponaremena raja Amoreowi tsutonü jawarena, pakuenia waja TUJJANENÜ Dioso naka rajuta nejetaruka. ²¹ Pa taima, panija TUJJANENÜ Dioso paka tsiwajünai buata ira; Pa ponare, pa nore pa na jjainaibare, pakuenia waja monaimi wajjami piaja TUJJANENÜ, Dioso jumaitsi pajjamü ata, putsa pa junawame, putsa pa jamatabü kueroname.' ²² Kai jiwi kanakujitsia pona jjanü jawaberena pan jumaitsimü: 'Paneto kopare pata natsi wajünai kopatsi nejja pebi jiwi, bajara pamonae peya enebi nejja iranü pata wajunaya pajjanú, nejjata paneto kanawiabijitsia pakuenia namuto najetaruka itsa jjoyo pata tsimajju ponai nejja pata namujjuanitsi nejja, pa tomara jawanü itsa jjoyo pa jone najetaeru benajitsianü. ²³ JJua baja pane jumaitsimü baja netsi jume jjanepana; baja pitajũ baja nejjata doce ponü beje pajjamü yajawünü, kai pebi kai wiria kana kutsia. ²⁴ Bajara pamonae rabaja pona piniji unuabelia, pata baja Escol jawabelia totsuabelia pe yapütai jawabelia. ²⁵ Bara pamonae nota penakuetsi jawa bajara pa irata pe kobeanüta paneto kaponarena. Yajawa pane jumaitsi: 'bajara pa ira bitso jjanepana pa ira waja TUJJANENÜ Dioso naka rajuta najetaruka,' ²⁶ Abajju kajena , pajjamü apo pa tsimajjü ponaimü pane matapitsinejja, saya baja apo pa jume kawünümü panija TUJJANENÜ Dioso. ²⁷ Saya baja pabara natsipaebame pajumaitsimu: 'tsipaji baja kajena waja TUJJANENÜ naka itoya bajara jjuata naka baru pona Egipto tomara pe pünüya, waja naka tsimajju otorobi Amoreowita waja bajra pakuenia naka werebiabi nejja. ²⁸ ¿Nejjata de belia be ponatsi? waja monae saya baja naka jamatabü junawiaka, tsaipaji naka jumaitsi: 'Bajara pamonae raja kajena bitso pinijiyo jjanetonü nakamatojjetsia wajjaetsi; piaja tomranü ata kajena piniji tomaranü ya karanaba piniji yenepananü piapia jaanüta ata athübü betsia pata; baitsi jane kajena dajjita pe matatsunüa, pataniji Anac pejji bajara jota.'' ²⁹ Nejjata bajara jjua kujinae paka jumaitsitsi: 'Putsa pana junawiakame putsa pa kujunawame ata bajara pamonae. ³⁰ Panija TUJJANENÜ Dioso, ponü najetaruka pane wajunaya, bajara ponü raja pajjamü paka yapijiwi nabena, pakuenia baja itsi pa dajjitayomü nejja Egipto jawata panitabü nejewa. ³¹ Pakuenia ata itsi petusato jawata, pakuenia paka tsita itsi panitabü nejewa waja TUJJANENÜ Dioso paka ya eweta ponapona , pakuenia pebi ba yajawa ponapona pejji, dajjita pa tajjunai jawa itsa jjoyo pajjamü pa poname ata pane patsi jawa ma patajjunai jawaberena,' ³² Baitsi jane pajjamü apo pa jume jjaniataimü panija TUJJANENÜ apo pajume kawünütsimü panija TUJJANENÜ DIOSO. ³³ Ponü najetaruka pane wajunaya penamatajjunai nejja tajjunai waja pata ithopai nejja, merawi pe kotiata, matakaita pajubota. ³⁴ Waja TUJJANENÜ paka kuibo jumetane bajara jjuata anaipana; Bajara ponü nejjata jumaitsa: ³⁵ Pepo kuene baja nejjata ma pa pebi jiwije kaenü ata pa pianai panai wiriawije apo tae tsane pa pejjania ira jjua najume kapanepaya rajutsia paibajü piaja salinaiwimita. ³⁶ Itsiata baitsi jane Caleb pejjunato Jefone; bajara ponü taina. Bajara ponü rajutsianajü pa ira tajjuna nonota, yajawa pejji, tsipaji bajara ponü jume pünapona Dioso pe jitsipai kuenia,' ³⁷ Bajara pakuenia, waja TUJJANENÜ jjanü ata ne bara anaipana pajjamü pane jamatabü kueneta, ne jumaitsi ma pakueniaje: 'JJamü ata kaje apo jonemü tsane bajara jota; ³⁸ Josué Nun pejjunato ponü nuka newajünaiwerena, bajara ponü jonena bajara belia; nasaütsi ejjanare, tsipaji bajara ponü mata kaponaina Israel pekana kopatsi nejja. ³⁹ Baja kajena, kajena itsiata nejji jiwijji, pajiwijji yabara jumaitsimü neto nakafetsiana, bajara pa jiwijji ajena konojjai saya apo yapütai jjua pejjania kuene apo yapütai ata pabisia jawa kuene, bajara pamoane ata jonena bajara jjoyo. Bajara pamonae rajutsianajü, bajara pamonae najjainaya biana. ⁴⁰ Baitsi jane jjamü, nawiatsianame ikatsia pee jana kuenia tajjujjubianame ne ponai jawa piniji tusato namutualia pe tsobia manua mene jawabelia.' ⁴¹ Bajara jjua kujinae pajjamü pane jumaitsimü: baja kajena waja TUJJANENÜ to nanekonitatsi; nejjata baja ponainatsi, barü nabenatsi, baja kajena jume kowünütsianatsi jjua dajjita waja TUJJANENÜ Dioso naka itoroba waja itsi nejja'.kai pebi kana kujitsia pana jjania waetsianame pane nabe nejja, baja pana jjania waire pane nabe nejja piniji unubelia. ⁴² Waja TUJJANENÜ ne jumaitsi: tsipaibare bajara pamonae: '' Pütsa bajara pamonae matapita pe nabe nejja, tsiapaji raja JJanü bajara jota apo apo yajawanü tsane, nejjata raja amoneya bijitsiparsi pe kueyawi.' ⁴³ JJanü bajara pakuenia paka jumaitsitsi, baijtsi jane pajjamü apo pane jumetaimü. Pajjamü saya pa bara anai paname apo pa jitsiapaimü pakueia itoroba waja TUJJANENÜ; pajjamü bitso pa anaipaname nejjata pa matapitame pane be jawa unu pijiwi jawabelia. ⁴⁴ Baitsi jane Amoreowi, pamonae jina wonopa bajara pa unuta, paka tsimaju pitsapa be enemenü kuenia paka barajina, paka amoneyaba Seir jawata, tajü jawa berena be Horma jawa berena. ⁴⁵ Pajjamü bajara pakuenia pana wiabame pa nuame pitabünejewa waja TUJJANENÜ, baitsi jane waja TUJJANENÜ apo paka jumetai panija jumejji, apo paka taijitsipai pajjamü. ⁴⁶ Bajara jjuata pa nubena othopame bajaya jebi Cade irata, dajjita matakabi pa jina wonopamwe bajara jota.