¹ Wa' ano da kataru, ani gawe bainyha' wa' Kana, ge' sino' Yesus ani wa' teetn. ² Yesus ge' ayo murid-A uga' gatn ngundang ka gawe bainyha' dakoh. ³ Jangkah paitn anggur abas, sino' Yesus nyansana ka-Ini', "Paitn anggur ayoa' takor." ⁴ Yesus naham, "Mahu, jai kaitana' nige' -Iko'? Ano-Ko katinga utukng." ⁵ Sino' Yesus nyansana ka ayo palayan, "Jaipun da Ini' muji' kaimu' bulahta dakoh." ⁶ Wa' teetn , ani inum atong umpatn batu, da biasa gatn sok Yahudi ngiak ka acara pangume'. Masing-masing atong dakoh muat kira-kira dua ato taru pansaok. ⁷ Yesus muji' ka ayo palayan, "Madiatn atong-atong dakoh nige' paitn." Ge', ayoa' madiatn atong-atong dakoh nige' paitn sampe panhu'. ⁸ Lakadakoh, Yesus nyansana ka ayoa', " Mati', naap mih iget ge' minsakngta ka pamimpin gawe." Lalu, ayoa' minsakng a' ka pamimpin gawe. ⁹ Jangkah pamimpin gawe nyacap paitn da nga gatn ngubah jadi anggur dakoh, ge' ini' kati' panea umpatn dume dakoh baasal (tapi ayo palayan da naap paitn dakoh pane), maka pamimpin gawe dakoh maba' pihak are, ¹⁰ ge' nyansana ka ini', "Satiap sok nyato paitn anggur da bait tarlabih uru ge' sak smaan sok nga sau' nyucur, bahu ta gatn nyato anggur da kurang bait. Tapi, akupm ngumos paitn anggur da bait sampe mati'." ¹¹ Tande ajaib pamule diah Yesus bulah ka Kana, Galilea, ge' nganyata kamuliaan-A, ge' ayo murid-A pacaya wa-Ini'. ¹² Ngalaka dakoh, Yesus disah ka Kapernaum samahu sino', age-age, ge' ayo murid-A. Ayoa' madi' ka teetn mani ano tuhia'. Yesus ka Bait Jabata ¹³ Ari raya Paskah sok Yahudi nga jiket, ge' Yesus pun makka ka Yerusalem. ¹⁴ Ka Bait Jabata, Ini' mile' ayo sok nyual lembu, domba, ge' acang, ge' uga ayo' panukar uang unyung ka teetn. ¹⁵ Yesus umas palintatn umpatn tari ge' nguser ayoa' smaan boho umpatn Bait Jabata, tarmasuk smaan domba ge' lembu ayoa'. Ini' uga matatn uang-uang karinceng umpatn ayo panukar uang ge' mambalik mija-mija ayoa'. ¹⁶ Wa' ayo padagakng acang, Yesus nyansana, "Minsakng smaana' mungkas umpatn diah! Iya' umas ramin Sama'-Ko ya' tampat bajual!" ¹⁷ Ayo murid-A sanuut bahwa ani gatn nulis: "Cinta wa' ramin-Mu, ngangkabokng Iko'." ¹⁸ Lakadakoh, ayo sok Yahudi naham ge' nyansana ka-Ini'," Tande ajaib jai da Akupm nyuak ka kai singge Akupm ani hak umas hal-hal diah?" ¹⁹ Yesus naham ayoa', "Ngancur Bait Jabata diah ge' sadatn taru ano Iko' ao' mantagutna' agi'." ²⁰ Ayoa' naham, "Palalu 46 sawa ya' mantagutn Bait Jabata diah, ge' Akupm ao' mantagutna' sadatn taru ano?" ²¹ Tapi, da Yesus maksud Bait Jabata anilah ungan Adup-A. ²² Karna dakoh, Jangkah Yesus gatn ngalumpat idup umpatn antara sok kabis, ayo murid-A sanuut wa saratn diah; ge' ayoa' pacaya wa Kitab Suci ge' saratn da Yesus nyaratn. ²³ Jangkah Yesus madi' wa' Yerusalem salama Parayaan Paskah, karah sok pacaya sadatn gaatn-A karna mile' tande-tande ajaib da gatn-Na' umas. ²⁴ Tapi ao'a, Adup Yesus kati' macaya adup-A wa' ayoa' karna Ini' nganal smaan sok, ²⁵ ge' kati' palalu asi pun ya' mangkatn kesaksian manganai talino sabab Ini' pane jai da ani sadatn ate talino.