(Petrus Pelre Kornelius Pelre) ¹ Su mbei ne, Kaisarea ne, detelro simbei nena eudo Kornelius, Italia kena pelrayo nena belrengkawai mena ² telrepelre na detelro Mang te dekowena, nemandelraiti nenei na detelro mukunamane, nepelre nenei mepoi te detelro dopelre te yateyoumeng nepelre Mang te mendokai ne nemenambei te. ³ Suwe selrei yembei ne, su mesi kilrimbei tena te ne ya ne, kiya ter te nenei done tiyowe, Mang nenei a detelro miyowe nepelre a te nete sane youmeng, "Kornelius!" ⁴ Nekaye, endiki nene pelre nane ne a detelro ko te teyowe nepelre elriyowe, "Tuhan, da beya?" Nepelre, ne a detelro a te nete saneyoumeng, "Wena a mendo- a mendo nepelre wena me poi nepete a yeko te dupuka bulra te Mang nenei bekoute. ⁵ De su selrei ne, detelro te sanumbone Yope te naye nepelre detelro mbei nena eudo Simon te siminaimbone, netena Petrus delraiti te simaina, ⁶ ne nekewena nou pe detelro simbei neya malrisa kena yu elre te baite yetewe na nenei eu Simon, nena mie nau tu ne." ⁷ Ne a detelro netena a te elrupuko dite yowe, Kornelius nenei kembalri detelro beselrei te simimbuko pelre pelrayo detelro simbei telpelre na detelro nenei euna kembalri te mekaina detelrode rona, ⁸ nepelre a mukunamane kya telre nepete nete sanumbuko, sane youmeng Yope te naye. ⁹ Ya si tena kaye, nipi nelrone neme walriyaina selreine nepelre ne yo nopie pukona ne, Petrus mie yang bulra tewoyo, su mesimbei tenate, a mendo tenate. ¹⁰ Nekaye, moning te tuwaiyouwe nepelre sa te anendena kena mane, detelro sa te nemeye pendalri yaina selreine, Petrus nenei dou ne tiyowe, ¹¹ nepelre ma baite tuwusuku na te tiyowe nepelre sasiyasi mayong belra mena kulra dopelre nepelre nena tulre-tulre ate-ate meyowe kani bulrate. ¹² Ne ei na, malrisa seka kilrimbeina mukunamane, nepelre dayo bulrana malria a ne delraina, nepelre bulrana awe. ¹³ Nekaye, a nekote meyowe saneyoumeng, " Esuyemi me, Petrus, baite keteupone nepelre anewe!" ¹⁴ Petrus a te elriyowe, "Ambai, Tuhan. Niki pelrena 'mbai peko pelrena sa bete pelre de anipai." ¹⁵ Nepelre, ne a nekenoute da beselrei te nete saneyoumeng, "Mang nepe, sukumupuko na sa tena, niki pelrena sa tena elripanya." ¹⁶ Ne tu da naming selrei keyapuko, nepelre nedambei ma note kesuku yaye. ¹⁷ Ne su selrei ne, Petrus nemeya mendote betemo mekoyome beyamena a bete te tembuko, Kornelius kena kembalri detelro miyaina kaye Simon kena mie te simiyaye, mau delre ne tipiyaye, ¹⁸ nepelre a te simiyaye, tena a te simiyaye, nena eudo si Petus, dipine nekewe. ¹⁹ Petrus, ne dou tiyoumena mendo te nemeye mekongbumeng, yambu nete a te saneyoumen, "Timeboime, do naming selrei were di duweiye. ²⁰ Esuyemime nepelre ate osune, de nete sanmbukalre netenaye medotena mekoipanya nembelre-nembelre dite embe?" ²¹ Nemenakaye, Petrus ne detelro ko te asuku nepelre saneyoumeng, " Tembe, duweiyauna detelro de nepe. Beyamena potena te miyauwe?" ²² A te saniyaimeng, "Kornelius, perwira detelro, telrepelrena detelro nepelre Mang te endikiti te dekowena, Yahudi selrai tenoweya poi telre te nekewena, Mang nenei a detelro melro-melro a mendo kilriyouwe were senenaimbone nene miye te mewe nepelre wena a te betondena tena." ²³ Petrus nete saneimbuko esu te miyai nepelre nekenaina nou te kimelre. Wambe yatena kaye, esu yemi ke nepelre nembei telre dite yaye, nepelre Yope irena telrepelrena yau-yauna meselreimbei nembei yaye. ²⁴ Ya si tena kaye, Kaisarea te yaye. Kornelius ne te teyoumeng nepelrei nenei do keka milre keka pelre nenei yau-yauna te koplrim buko. ²⁵ Petrus esu te miyouwe na ne, Kornelius nekote miyouwe, Petrus kena ototoune yengkong te dusungkuko nepelre eu-eur pelre. ²⁶ Nemane ye, Petrus ne termeye bulra te kensuku wande nete a te saneyoumeng, "Esuyemime! De peda nemenya detelro jei mo be." ²⁷ Petrus a te Kornelius pelre nemeye elriyoye, Petrus e sute yowe nepelre detelro dopelre nembeite nikiyaina te tupeye kenelre. ²⁸ Nekaye, Petrus nete a te seneyoumeng, "Nimeyaupuko da Yahudi kena netrona peko telrena tu telrena detelro si ko te ande, nemaneye, Mang de te kilriyouteng de detelro si tena peko tena elripanya. ²⁹ Netante sate, dete saniyauture metelrena te de se tuwaipai. Nemena potena te, de we te simawalre beyemena potena te we de te simautung?" ³⁰ Nepelre, Kornelius a te elriyouwe, " Ya kilrimbei aina ya poselrei Irena da suselrei te miyowe, su mesi kilrimbei delrei mie ne mendo te mokoyalre, nepelre tenembe, setelro simbei mayong kulru-kulru telre pelre titipuko dena bekou ne tepeyouwe. ³¹ Nekaye, a te elriyouwe, Kornelius a mendo mekoyena nepete betaipuko nepelre wena mepoi Mang kena bukou ne mendo te ke mekaye. ³² Netante sate, Yope te sanembuno naye nepelre Simon ne te Petrus te simaina te diyenembe date mende. Simon kena miye ne nekewe, malrisa kena eu elre te baite yatewena, nau tu ne nekewena. ³³ Netante sate, wekote detelro te selraimbei te sanumbukalre, nepelre wena kena poilre nepemiye. Da su selrei ne, e mukuna mane da yene, Mang kena bekoune, Mang nenei a we te sanembukona te betomalre." (Petrus Kornelius Kena Miye Ne A Klalri Te Saneyoumeng) ³⁴ Nekaye, Petrus emblru te tuwusuku nepelre a te elriyowe, "Deselreine, de telrepelre telre te nimeyalre Mang dou yena elripai. ³⁵ Nemaneye, metelrena selrai, Ne tena endiki te dekaina detelro nepelre poi te mekaina, Nena ne yumbuyai. ³⁶ Yesus Kristus kena ire Mang walri te Israel selrai te a kulrung wanimbana poi telrena te saneyoumeng, Ne ye Tuhan metelrena bulrane. ³⁷ Yudea mukuna mane nena tu keya puko nepete nimeyaupuko, Galilea irena, Yohanis bu kelrompuko a elri yaiyena, ³⁸ Yesus we nimeyeaupuko, Nazaret detelro, Mang nena yambu melro-melri ne nete dulrusuku nepelre delre nenepelre. Ne noulre-noulre youwe walri poi tu te mekoyowe nepelre alru peko-peko dusaimana detelro te poi te mekombiyowe Mang nembelrena tena. ³⁹ E ye dou ne tiyande Yesus nena tu metelrena mane mekoyouwena, Yahudi selrai nena yo ne 'mbai Yerusalem ne. Ne ye Yesus te tutai puko nepelrena kaye nete onone sadikaye. ⁴⁰ Nemaneye, ya naming ne Mang ne te deyembuko nepelre eute keyandena kalro te ne te ikimelre, ⁴¹ detelro matelre ambai, e tena, dou ne tiyandena Mang kuko, tete nelrolre deyepuko nembelre nembei telre bu te nepelre sa te aniyande. ⁴² Nepelre, ne e te setelre tayoumeng da a te detelro metelrena mane sanemamelre nepelre a tena kena-kena pelre eu-eu pelre na a te elre malre Mang nengbulra ne delre te kelrombuko da yelrei selrei ne nepelre tete selrei te. ⁴³ Ne tante ne, a walri detelro a te elriyaye detelro mbei-mbei ne te telrelpelre telre elrenaye na nena eudane niki bulrulre yelreu poite dounaye." (Mang Kilriyoumeng Ne Detelro Metelrena Manete Yatekemelre) ⁴⁴ Petrus nena a te nemeye elriyowe na selrei ne, a walri te betoyaye na detelro metelrena mane Yambu melro-melro nena bulrate osuku. ⁴⁵ Nepelre, sunat pelre mekoyaye na detelro, Petrus pelre nembei miyaye na, yambu melro-melro nena bulrana te sesa yute tuwuyaye, selrai si-si pelre. ⁴⁶ Ne a tena, bumtekei te betoyaye ne detelro metelrena mane peu si-si ne a te elriyaye nepelre Mang te kapiyanye. Nekaya, Petrus a te elriyowe, ⁴⁷ Dabu nekewena detelro simenete titawe pukone tenaye da detelro yambu melro-melro te doukaina te e tena mane bu te kelrounaye? ⁴⁸ Netenate, Petrus netena a te kelroyoumeng bu te Yesus Kristus kena eu do ne kelroyoumeng. Nemenakaye, ne detelro Petrus te a te di yaimeng ya meselrei mbei nembelre nekenaye.