¹ Ngoi tanu 'o lako-lako ma ngiioka to ma 'okode de to ma 'okode 'o cading ma dekuoka ma dekuoka ngoi to mau tamake to'una 'i sasano kiana ngoito ngosekau, de to da-danu 'o kia dua 'o ngose ma Jo'oungu ma Dutu ngoino (Ma Jo'oungu ma Dutu o' Habakuika 'o sango) ² Ma Jou 'o sango ngoino konee 'o Ngose, nalefoku 'o kianaga ge ma Jou 'oni si dumu-dumutu ngonaka de no si sonotuuku 'o teto 'i nou-nousoka, la o' nya ngaro yo oa-oaroko ma, 'i dadioka ya baca. ³ 'I goungu, 'o kianaga ma Jou 'O ni si dumu-dumutu ge ma 'orasi kaya adonuasi, duga-duga ke'ena madodogumikau 'i taari de g'ene koielukua. Nako la kai to'ingo, nio damaa, sababu, ge'ena dua magou-goungu 'i boa de kaya toto'orakua dua. ⁴ ma 'i goungu, 'o nya la manga alu mangununu yo dudukula ge'ena manga singina kai bootua, duga 'o nya yo titiei yo ahu de to'ona mang ngongaku. ⁵ 'O nya yo maieie de manga singina 'i totorou ona ge'ena kayo singounua, duga-duag ona mita ge'enaka, manga 'uru ya pelenga yaamo amoika pongose kao songene ma 'uru, de koya kikiounua iso kao songene, ho marai 'o nya-nya 'o edete ya momoi yaki toomu deo nya iodumu mita yaki toomu. ⁶ Koi gounguaa dua ona iodumu kayo masi ka dola bololo mangale una, 'o sela madurou deo jojigi yosi nyanyi. Mabetongo 'i ngoseato: "ka nio torouoka nia roese nio si korago deo nya manga kiasonaa- 'ito 'ingo si kone'ena? De nio si paliara nia roesino de kiasonaa nio si taa tatoika ge!" ⁷ Koi gounguaa dua kaoako dadaioka ena ge ni laa laani, ge ni si totodokana yo momiki, marai ngini dua nio dadi to'ona manga batakoino? ⁸ Sababu, ngona kai kudeiou 'o nya 'oedete ya momoi naki tagoko, ho marai ge ka naki boo-bootua ngonali ni tagoko, sababu 'o nya manga aunu na supuokau de sababu ani dingkai 'o soananika, 'o bendarika, deo kaasa 'iodumika. ⁹ Kanio torouoka ngini niaoa madodaka nio degese 'o kiasonaa ge kai halalia. Ona dua manga ngii yo noa 'o ngii 'i kuru-kurutieka mangale manga roese yo si pidili 'o baulacoka! ¹⁰ 'Anioa ma dodaka 'o susa naki si dibangi, 'o edate ya moi-moi naki tobiki de naki sotumu, ma ngale ge'ena ngona no baradosakau 'ani roese ma sireteka. ¹¹ Ma 'i goungu 'o te-teto 'o bebenono doka dua yosi gaso-gasoko, deo balaki 'ooa ma ngasuku-ngasuku dua 'i sango. ¹² Ka nio torouoka 'o soana nio sigoko 'o 'aunu ma dateoka, de nia be-beno ma ba-bangini 'o dingkai ma dekuoka. ¹³ 'Igoungu, ge'ena ko to ma Jo'oungu ma Dutua 'o dunia 'osi da-dadi Ai autorangi, ge'enalah 'o nya-nyaa manga roese yosi kangela, de 'o kiasona 'o 'uku ya ae-aeme, deo nya 'o edete ya mo-moi yo ma susa mangale 'o kia sonaa ma guna koi 'iya-'iya! ¹⁴ 'Igoungu, 'o tonaka dua ya 'omanga de caaro mangale ma Jo'oungu ma Dutu 'Ai kuasa, koge'ena 'o 'akere 'ongootoko 'i matoomu. ¹⁵ Kanio torouoka, nio masi ngini-ngini deo gokere nia kikula, 'o singina ma dorou 'i maka-kaganuku, de nia ki kokuta la manga maeke nia uungini. ¹⁶ Ngona nosi bunusokau deo kokurangi 'o mara'ai ma dagali. Ngona mita na 'okere de kano kokitangonokau. 'O saoko ma Jo'oungu ma Dutu 'Ai giama ma guuidaoka dua 'i masingali ngonaka, de 'o mahe maamoko dua 'ani mara'ai ya tulu. ¹⁷ Sababu, 'o galani ma dumutu 'o Libanon ma gi-gieka dua ngonaku ni tamunu, deo hayaani 'i ku-kudei ma so-sotumu nisi todokana ngonaka, sababu 'o nya manga 'aunu 'i uisokau de sababu 'o galaani ma dumutu 'o sooana, 'o bendar, deo kaasa 'iodumu. 'O Besesongo ma ngale 'o puji-puji ma Dutu. ¹⁸ 'O kia ma guna 'o patongo 'i so-sonotoko 'o di-diei 'a sonottouku? 'O kia ma guna 'o patong yosi ka-kaduguisuku 'o ngeluku nisi dodotoko gee? 'O patong 'o didiei 'ongaku to 'una 'ai giama ma dulada ka momongo 'o kianaga gee 'a di dieiku ge duga-duga kao puji-puji ma dutu ma ilingi ma koiaka. ¹⁹ Kanio torouoka 'o nyaa la 'o gota ma dobi'ika de nio ngosr, "Nomomikie!" Deo teto 'o ngai moi 'i mou-mouka nio ngoseato, " Nomaelangie!" ge'ena tongini nia do-dotoko? 'I goungu, 'ena ge'ena 'o guraci deo saaka 'i masi saono, duga-duga 'ena ge'ena ka maeta ma kaiomasua. ²⁰ Duga-duga ma Jo'oungu ma Dutu, 'O manoa to 'Una 'Aioa 'i tebi-tebinoka. Nia roese nio siriidukou to 'Una 'Ai bionoka, 'iodumu ngini 'o tonaka ma dekuoka.