¹ 'Ma Jou 'I demo 'o Nabi Habakuk 'ai mamakeka. ² 'O kiasi ma doingoka, Jou, to masi gasoko, ma ngona ka no isenua, ngoi to masi gasoko ngonade, "Mikairohu!" Ma ngona ka noi lega? ³ 'Ido'oa ho 'o susa noisi dumutu ngoino siadono 'aniaya to mada make? Yoka-kairohu de de yo 'a 'aniaya 'ai bionoka, 'o karisi deo kalaani 'i madadi. ⁴ Sababu ge'ena, 'o hukumu ma guata koi 'iau, deo 'adili ma koi baoruau siado ne'ena. Sababu 'o yo 'ti-'tingkai yaki gooromo 'o nya yo ti-tieika, sababu ge'ena 'o 'adili ya kilioruku. (Ma Jou 'o sango 'o Habakuika) ⁵ Nia lega de nia ki tailako 'o nya-nya! De nia herangi sababu ngoi 'o manarama ta diei ma 'orasi ge'ena ka ngonasi de ngaro ni da caritakau ngonaka ma, duga ngona ka no ngakua. ⁶ 'Igoungu, Ngoi taki si momiki 'o Kasdim ma nya, 'o nya yo ta-taba ngamo deo yo ca-caaro, 'o koremie deo koresara 'oange maako deoange ma dumunu ka yo dagioka ma dumutu yo manoa 'o soana deo ngii ngaro ka to'ona ma. ⁷ 'Ona ge'ena yokuata de paki domodongo, ⁸ Manga kuda, deo macani ma 'ena 'ikuatika, nako 'oobi-obiri deo sirigala ma 'ena 'i tingkai. Manga soldado de manga kuda-kudaka yo boano yoma retenoka, 'o gurutoka de yaino, yo soso koge'ena 'o kodoba 'i 'utuku ⁹ 'o nya-nya go'ona yo boa ma dumutu 'ina sotumu, manga soldado ma bionoka, 'ina gooromo koge'ena 'o dadoko 'o ange masiarokoina, de yaki tago-tago kino yaki toomuno koge'ena 'o doongi manga gudeioka. ¹⁰ 'O koana-koana yaki ngose 'i torou, deo nya 'i la-laagomo ma, kayaki sela. 'O ngii de ma hisa-hisaka ma kaya sela, 'o tonaka yosi didumukosi 'o ngii ge'ena deika ya 'ora. ¹¹ 'Aha deika 'ona yooara kayo maogorua po ngose ka 'o dadoko ma riidi koi'ia, 'ona ya soono sababu ya masinganono de to'ona manga guata. ('O Habakuk 'ai ga-ga'asoko ma modidi) ¹² Ya Juo 'amia 'Abba no tebi-tebini kama sirasi 'ena la dede Ngonau to? Ngomi dua kamio songenua. Ya Jou, Ngona naki sitatapuokau 'ona yosi dagi 'o hukuman, ya 'o Gigie 'i te-Teto, ngona naki sitatapuokau, 'ona mi kula 'o sikisaa. ¹³ 'Ani biono ka 'i holoi 'i tebini 'o dingkai na tutumu, de Ngona kona 'akunua Na tutumu 'o singina ma dorou. 'Ido'oa ho 'o nya manga singina 'i totorou Nakimake kau de kano ma ri-riidoka, 'o nya yo ti-tingkai yo laani 'o nyaaka ge 'i holoi yotiei dede ona? ¹⁴ 'O nya Naki diei koge'ena 'o naoko 'o ngootoka, po ngose kao hayaani ma pokoro yosi tagi-tagi ma soana ma balusu ma koi 'ia? ¹⁵ 'Ona 'iodumu yaki situono dauie deo gumaa, yaki tagoko deo soma de yaki si toomu deo jaa, sababu ge'ena ho 'ona yo morene de manga singina 'i sanangi. ¹⁶ Sababu ge'ena, manga susuba yosi suba mangale manga soma de manga susuba yo tuuku mangale manga jaa, sababu deo pakakasi ge'ena, 'ona yo mada make 'o hasili maamoko deo 'inomo maoa. ¹⁷ Mangale ge'enau ho marai mangaase ma sarumoka ya 'aiki deo nya-nya yaki to'oma ka maeta ma ka yaki singinaa?