¹ Yesus, bapo Feng Tu menefu kemupuna Yordan. Kaimpa, Ke bapo Feng Tu kekaka kekana tahou belantara. ² Wakotu bang mambire nopong kebate ke kekati kelelu. Kejara kekangka bang-bang ing-ang. Wakotu kafa, Ke huki. ³ Pa kebatefa kelengte Ke, ''Anara Me Tata Oke, mepengko wung ing lewang-wang hang ong.'' ⁴ Yesus kewe lote, ''Kapotu kotu, 'Keba kemule kehula hang ongpa.'" Ulangan 8.3 Lukas 4.12 ⁵ Kaimpa keba tefa ke Yesus kekana jeng ete kotu pa lelepa motu fitongwe meka pengte funa ing-angte. ⁶ Pa, Keba tefa kelengte Ke, ''Niwe jaung niwe leng-leng Me hefeng pa ja ete motu jeng fua, peing lelepa keleleng fata motu ni. Pa, ni weleng-leng teba peing ba nipungle. ⁷ Ana ing-angra, Me ni mepa, lele pafu nileleng fata tete Me. ⁸ Pa, Yesus lengte, '' Ka potu kotu, 'Ne kenepa Tata Tata nene, pa newe Kewofa nela kotu.''' Ulangan 6.13 ⁹ Kaimpa, Keba tefa Yesus kekana Yerusalem Ke kati teme Tata Paake ete hofu. Bate lengte Yesus, ''Ana Me Tata Oke,ne Meme mekoko kewea hememe kongfu, ¹⁰ Peana po tukotu, 'Tewe Me, Tata pi kewelengte teba fangpa-fangpa Keke Me totang tete te te, 'Mazmur 91:11 ¹¹ Pa, 'Wa no tete, te Me teja jijite ung tang e Meme wung fifika.''' Mazmur 91:12 ¹² Yesus lengte Keba tefa, ''Po tuktu, 'Tata TataMeme. mepe pupuka. Ulangan 6.16 ¹³ Keba tefa Yesus kelelu kokafa, keka Ke keliti kemu pa kekeng banghing. ¹⁴ Yesus kemu puna Galilea bapo Feng hefeng kemu ne pa pifeng Keke kekupa teri e jeng tupa. ¹⁵ Pa Ke jano kengkeka pa teba nawo te Ke pite tee. ¹⁶ Kaimpa Yesus keti Yerusalem, kota jeng Ke huko bapale, Yesus keti sinagoge bang ing sabat pa keru jaung kefoi. ¹⁷ Hoho ropu Nabi Yesaya tewe nite Kea, pa Ke ropu be keju pa laung kefi pe potu kotu, ¹⁸ ''Feng Tatake kemule Ni, Ke Niwe makele ko Pifeng Hefeng niware teba-teba ja paka. Kewo Ni keke lengtu piwe nilengpa teba mete apa teni lefefe, pa teba-teba lutofo nileko te lutoa, ana teba-teba jafeng-fengfa tete ete teba te niho fafale, ¹⁹ Pa petu pina pepu wawa felangro hefeng Tata pe tutu tu. '' Yesaya 61. 1-2 ²⁰ Yesus ropu ing kepo pa kewelengna keba lupompong paa wekotu, pa kaimpa Ke takung. Luto teba nawo teme i sinagoge ing tepinaka tene Keke. ²¹ Pa Yesus pikele pate tea, ''Ung-angwe, tehitepa jaing pepotu motu Ropu Tu ung-angwe elulu. ²² Pa teba nawo teni pate bamuang Kepileile te engtape piti feengraka kengpate wa lang u Keke. Te pite e,''Keweka Ke we Yusuf koke. ²³ Kaimpa, Yesus pikelete tea, ''E pitiung elala peribahasa eleng tete Ni, 'Koru, ne Meme woka mepeko hae. Ne lelate jano lelepa Mepe Kapernaum, jaing-angra mepepe kewea, Kota Memewo.''' ²⁴ Kaimpa Ke lengte,'' Ni lengte tete ea, pe bamuang pepe ing keba nabi ke tete kate keka kota kekewo. ²⁵ Ilo bamuangwo, Ni leng tete ea,teume roro nawo temete Israel poing Elia, anara petang pepo jo felangro hengtong pa ke napanghing, ana ing-angra teheki hutefo pelewang bame tupa. ²⁶ Peanya, Elia baung kekelengti kale pa kekeleng titi pebaro pemotu Sarfat, jeng kaung Sidon. ²⁷ Pa teba nawo ne piu kusta teme Israel poing Nabi Elisa,baungka keka tea keungka haeka pea Naaman, keba Siria.'' ²⁸ Kaingpa lelepafu kelufata,teba nawo teme sinagoge ifu tehefeng fata. ²⁹ Kaimpa tejalung fata pa Yesus teke turona pengti kota ing-ang, pa Ke teke tujana heng kafu kota tewe eteja pa Ke tekeriri jeng kupa. ³⁰ Peanya, Yesus kele te hou-hou tete pa keka. ³¹ Yesus keti Kapernaum,kota tu jeng ing Galilea, pa ja kenalung teba nawo poing bang Sabat. ³² Te punghi ja Kenalung anara piti Ke lai hefengwo. ³³ Sinagoge fu kebaung kebaleng bate fengwo hetime ne. Kebaing kekapa kehiwai pina nafeng, ³⁴ ''Kewe ne wofa. Jaha Mepe pepe newe, he Yesus meba Nazaret ? Jaungkatu mepe ne metakukupe. Nilu Meing ba, me Tuwo mema Tata pe!'' ³⁵ Peanya, Yesus heng keku feng bate ing, kelengte,''Mepeng. Manapengme keba wea!'' Kaimpa bate ing kebaing kekehitika hangtu, teba nawoho, kemena pengti ne kebaing pa kekehufengka. ³⁶ Ana hupalang tewe e, teba nawo teko ing-ang pitetetu keba aling tewe tekaung,''Pitiha jawe? Peana nepara pa mapa, Ke lengpa feng-feng bate ing temena pengkengte.'' ³⁷ Pa pifeng Yesus kekapaku jeng ing nalungpa. Petrus Eke Mape pa Teba Nawo Tehae ³⁸ Kaimpa, Yesus lupom-pong paa kewelite pa keti Simon paa. Poing, Simon eke mape pene eti maki, peanya tetewa Yesus keleko pehae e. ³⁹ Peanya, Yesus kekaleng ketilatu eke mape pa hengkeku ne eti ing pa pene hae. Poing-angra, Simon eke mape pewalung pa ja petuko te. ⁴⁰ Wakote rang uheti, teba nawo tejala paipa teba ne nolelepa tetupa fie tetute Yesus. Kaimpa Yesus noKe leetefe tebawo-wo pa kele pate tehae. ⁴¹ Bate-bate ing temena pengkengtu tejapa hiwae tebapa langhou,''Meing, Tata Oke,'' Yesus te hengkeku,Ke te keleko kaka long kewelengka pitete teri Keing Kristus. Yesus Pi kekapale Kota-Kota hing ⁴² Febang fetanghapa pepe Yesus keti jengteung pinaka kewofa. Teba nawo Keteju,pa kewe Ke tefi, te Ke teena lengtepe e te kelufafaka. ⁴³ Peanya, Ke lengpate te, ''Niwe Tata Ropuke Jeng tete keke pea niwaha lele kota-kota jenghing peanya Niwe kekefu nile. ⁴⁴ Peanya, Yesus pifeng kekapale sinagoge-sinagoge Yudea fu.