¹ Bang lopana minggu ing, poing fetang kupawo, teume-teume ing tete fulu Yesus ja tetupi rempah-rempah tetu tete. ² Pa tete tefi wung bapale pe tewepete wa fulu. ³ Anaing-angra, po tekengte, tewe teka fika Tata Yesus ripeke. ⁴ Kaimpa yewe te engtape-tape jaing, joka-jokapa teba hingtung ro tehemo jabebewa-jabebewa tena pere tewe laelo. ⁵ Teume-teume ing tewe tefe pa tangha tete kengtepa, peapa teba hingtung ing tenite, ''Jatu ewe juele keba mele keka teba-teba bing ete. ⁶ Yesus kewe keleika, Ke kelefute. E engkoko janya Ke lengkotu te ewe po Ke kemu Galilea. ⁷ Ke leng Keba Ko tekenititi no teba-teba nelengte ete, tekelele, pa kelefute te bang hengtong.'' ⁸ Pea teume-teume ing te engte piti Yesus kewola. ⁹ Peanya tewe me pute teme fulu Yesus, tewe hoho tete e jalewang ing tete pate tebafa hampa tekaung telake Yesus tekateba hing. ¹⁰ Teume-teume tewe hoho tete ing Maria Magdalena, Yohana, Yakobus make Maria, pa teume narang-rang hing. ¹¹ Anaing-angra, keleng teume-teume ing tehiengte keing pi ong tafa tebafa rasul pa tewe teriri ongte teume-teume ing. ¹² Anaing-angra, Petrus kekaleng pa kekatati fulu Yesus. Ke paheti eng epa pa kekalengte ifu, kefi ro linen ripe tepo. wana ingte, Petrus kemela ke engtape ja lewang ing. Yesus Ne Keang te Tebafa-Keke Lengma Tete Emaus ¹³ Bang ing-ang, teba hingtung telakete Yesus teja tete te bame ing bati Emaus hambang pepe aha-aha nete te 60 stadia wa kota Yerusalem. ¹⁴ Teba hingtung ing hoho tete jalelepa lewang. ¹⁵ Peanya tewe pi tete e pa keung pile no ing-ang, Yesus kewo kete kelatu leng kepatelupa tejae. ¹⁶ Anaing-angra, luto tena kete kepe kaimpa tenake Ke tefi jangka. ¹⁷ Yesus lengte tewe, ''Ja enake pile ele leng haele?'' Teba hingtung teju pa tangha tena kete ana fu tutu. ¹⁸ Keba aling ung ka tewe ing bati keke Kleopas lengte Kewe, ''Ja Me kealing-aling ung meba mapenglo Yerusalem mewe pukana ja lewang fua ung-ang wea.'' ¹⁹ Yesus lengte, ''Ja ha?'' tewera nite Kea, ''Jatu Yesus ka Nazaret. Ke ing keba nabi keba mapa pitipa jano-Keke ketipa ho Ai pa bapa nene. ²⁰ Anaing-angra, imam-imam rube pa tebafa rube nene tea Ke tekeni ko tejako kewa, pa tewe Ke tekele. ²¹ Bamuangwo newe ne engne Kefa bapa Israel keko fafale. Peanya, ung-angwe bang hengtong wa ja lewangnya. ²² Anaing-angra, yeume narang-rang wa netu teteko nelengho. Poing tete tea fulu fetangpa-fetangpawo. ²³ Tewe tete Yesus ripeke tefika. pea, tewe temepute pa teni tewe teba fangpa-fangpa, tene teang tenite te Ke kelefute. ²⁴ Anaing-angra, teba narang-rang tenewe tete fulu pa tera tefi anara ja teume-teume teni. Anaing-angra, tewera Yesus ke tefika.'' ²⁵ Anaing-angra Yesus kelengte tewe, ''Oh, kalalafa ewe topo pa hupalang a afa kojawe elulule janya tebafa nabi niwe. ²⁶ Anateing kana Kristus lelepa kewe kapa fi-i pa ke mukengti-ti i-fu Ke piteniete.'' ²⁷ Pea, Yesus lelepa potumotu Ropo Tuwo bekele leng tu ne Keke, wakotu Ropo Musa pera tewe tebafa nabi teing nalung pawo. ²⁸ Tewe teja kote watupa bame Emaus, Yesus kelelu kepeleng kai Ke titifu. ²⁹ Anaing-angra, tewe Kewe tejaju pa teni, ''Mepepa nelupa netene wea kewe rapangtu pa rangwe u heti tile. Pea, Yesus kenggti kepa telupa tete e keing. ³⁰ Kaimpa Ke late tewe telupa teme tangri jajong, Yesus hang ong kewe pa ke ma kele. Ke keje-keje lengpa keleleng te tewe. ³¹ Poing, luto tete be keju pa Yesus tefijang. Peate, joka-joka Yesus kelengti wa luto tete. ³² Poing-ang, pitete tewe kealing kelengte keung, Anara ing pung nene ana ranya e i Ke pi kelei newe po leng nenane pa Ke bekele fata Ropo Tu kelete newe.'' ³³ Poing-angra,tewe tejaleng pa teme puna Yerusalem. Tewe tete latete teangkufa hampa pa teba-teba tepa telupa lume tepa-tepa. ³⁴ Teangku-teangku ing tenite tewe teba hingtung, ''Tata bamuang-bamuang melefupe pa neka meang te Simon!'' ³⁵ Teba hingtung lake ing tera hoho tete ja lewang tewe leng jae. Tewe hoho tete tunaneko tewe Yesus tefijang poing Ke hang ongwe keje. Yesus Ne Keang te teba telake-telake Ke ³⁶ Peapa teba hingtung ing jalewang ing hoho tete, Yesus keru langhou-hou tewe pa kelengte tewe, ''Pepe efeng pewakotu ewe.'' ³⁷ Anaing-angra, tewe telengho pa tefe fata tewe hieng te jaufa tefo ete. ³⁸ Anaing-angra, Yesuslengte tewe, ''Jatuko elengho pa efupaele petehe pung e e? ³⁹ Ekalengtu we no-Nine pa lang-Nine. Kewe bamuang-bamuang Niang. Ne ewetefi Ni pa eka kaleng, jaufa peing na ka pa e raka ana ung-ang Ni-efuele.'' ⁴⁰ Poing Yesus lengte Ke no pa lang-Keke kenalung tewe. ⁴¹ Jopa joka tewe hupalang heka tewenaka pa te engpate-te engpate, Yesus kengte tewe, Jaungka ewe i etu ja nena nate.'' ⁴² Pea tewe me riung tewe nite-Ke ⁴³ Yesus me ing kewe pa kekang ho tete. ⁴⁴ Kaimpa, Yesus lengte tewe, ''Kawe piti nine nileng ewe po epa nelupa. Lelepa po tumotu tehe Ni motu Musa ropo Tauratke, ropo tebafa nabi, pa Mazmur pehe tepa.'' ⁴⁵ Kaimpa Yesus pung tete be kele fata ung tewe Ropo Tu we teri jang-jang ⁴⁶ Yesus fang-fangra keleng te tewe, ''Pe po tumotu Kristus kewe kapa fifile pa kelefute keka teba bing ete bang hengtong. ⁴⁷ Pa, keng nepapa ne ne kekofa-fale wa neleng nene pe ete uang-ang bati-Ke ke petewapa pawo bapa lelepa, keng teja wa Yerusalem. ⁴⁸ Eweing ewe hemule- hemule wa ja wea. ⁴⁹ Elu tata, Niwe niwelengte e le Ai ku' ke. Anaing-angra, ele e kota Yerusalem ko ewe lelepawe kelelako papa ma wa jeng tete.'' Yesus Kemueti Surga ⁵⁰ Kaimpa, Yesus lengko tebafa lakete-Ke tejana kota pengte teteju Betania. Kefu, Ke no kele ete pa tewe ma kele. ⁵¹ Poing Yesus tewe ma kele, Ke heke wa tewe kemueti surga. ⁵² Pea, tewe-Ke keng tepa pa temu puna Yerusalem te pung tete pina efeng tafa. ⁵³ Tewe bang-bang pate temepate te e Ai Paake pa Ai piteni.