¹ Kaimpa, teba meing tejafata leng tere pa Yesus teketute Pilatus ho. ² Pa, tewe Yesus pi tete e tenie, ''Newe-Kebawe bapa nenewe kelepei pa keleng Kaisar taimbe nefu-fuka, keleng pate Ke weing Kristus keba Bari.'' ³ Pilatus kengte Yesus ''Mewe Bari teba Yahudi?'' Yesus lengte, ''Peing meang peng.'' ⁴ Kaimpa, Pilatus kengte imam-imam rube pa teba nawo, ''Niwe jaungra kelete fengra nifika-Ke baweing.'' ⁵ Anaing-angra, tewe tewae tenie pina nafeng, ''Ke teba-teba keka kapa kepei ja-Ke nalung pepawo tupa jeng Yudea wa Galilea wakotu kewea.'' Yesus Teketute te Herodes ⁶ Peanya Pilatus le kela jaing, ke kengte Yesus mewe meba Galilea. ⁷ Pa, kelu Yesus keka bapa jeng Herodes kewekotu, Pilatus kera Yesus kekelengna Herodes poing kemele kota Yerusalem. ⁸ Kaimpa Herodes Yesus kefu, ke pungle tafa. Ke jo tafa-Ke kefi-file kewe le kelate janawo Yesus kele kewe ana pungle jaungkefofo jalopa ung Yesus kelele. ⁹ Pea, Herodes janawo kekeng i Yesus,peapa Yesus piungra keleka jaleungra ke kelengka. ¹⁰ Imam-imam rube pa teba-teba ropo Taurat fojang tere fua Yesus tehenja pina nafeng. ¹¹ Pea, Herodes pa tebafa taba keke tejape kongti pa Yesus tenajie. Poing, tewe jubah teweni kefa juwo tera tekenina ti Pilatus. ¹² Potefu, Pilatus pa Herodestenake ping teme, peanya bang ingtenake bato tete. Pilatus Keletape Yesus Ke kofafa ¹³ Kaimpa, Pilatus imam- imam rube, tebafa rube Yahudi, pa tebanawo, ¹⁴ pea keleng te tewe, ''Ewe Kebawe eke aluni ana keba teba nawo kelekapa peile. Anaing-angra, poing niwe Ke nilafu ho e e, niwe jaungka nifika jafeng ung keleka ana ewe eheng haele-Ke. ¹⁵ Herodes kera jafeng ung-Ke kefika kera Kebawe kekeleng ti te. Ekalengte, Ke jaung feng keleka ehueng eleng bamuang ari nilohihi ekako kewawa. ¹⁶ Anateing, niwe-Ke, nikaka, ni-Ke nino hangfa.'' ¹⁷ [Poing wapatu bang raya Paskah, Pilatus teba nawo temete a paa kele feile.] ¹⁸ Anaing-angra, teba nawoing telupa-lupa teepate, Ekepena futi Keba wea. Barabas ekefu te newe.'' ¹⁹ [Barabas keing keba kemu apaa kewe ketihe teba jafeng-feng teete kota pa teba tejipa tebing ete.] ²⁰ Poing Pilatus pungle Yesus kekefufu, peapa fang-fangra ke pikele te teba nawo. ²¹ Anaing-angra, tewe hiwafake, ''Ke Eke etile Ke Eke etile!'' ²² Wakote la hengtong Pilatus ke kekengte tewe, ''Jaungka? keletefeng-Kebawe? Ke jafeng keleka. Ni weka jaungfeng-Ke lenifika ung bamuang ari nilohihi ekare ekako kewawa. Noingpa, ni-Ke nikaka Ke no nihangfang.'' ²³ Pea, tewe nafeng tafa pa tewa pina letapa ung Yesus tekelele. pa, pina tete tewe. ²⁴ Pepape, Pilatus pi kelu kela ja tewaete. ²⁵ Ke keba teba nawo tewaete, keba me apaa tejapa jaetakiete pa teba tejipate tebing Anaing-angra Yesus kekeleng tepung tete tu. Yesus Tekelelete ²⁶ Kaimpa tabafa ing Yesus teke tuja, tera kebaung tejape, Simon kebaka Kirene ka ung-ang ka bame te. Tebafa taba salib tewefe pawu keke pa teniko ke salib keweku ke kue ing Yesus. ²⁷ Teba nawo ing tela Yesus, pa tebafaing tekaungka teume-teume tefu-Keke tete e pa-Ke te fupafa. ²⁸ Anaing-angra, Yesus kepuna tewe pa keleng, ''He ang u-ang u Yerusalem, fu-Niwe eleleka. Ne e ewonya fu elele pa ko-ko e enya. ²⁹ Wakotu bang pepe teba-teba teninite, 'Ne ewo tafa eume-eume babeng, pa ampi e e ko eleleka, pa no e era eleng tejung-jung kate.' ³⁰ Wakotu poing tewe teni tete pe-pe, 'Tape fata etefefe newe!' pa te heng-heng, 'Newe mepo fata!' ³¹ Pea, wakotu tewe jaing-jaing tete ana ritu ing motu ja lewang-wangtu ana ri ing ang.'' ³² Teba feng hingtung ungra tera tere tute tejiko tebing-bingte kepa telupa Yesus. ³³ Kaimpa tewe tejako teju jeng ing ti ''Rube,'' tebafa taba Yesus tekelela telupa teba feng hingtung ing, kebaung ke nopalo- Yesus pa kebaungra nonalo-Ke. ³⁴ Kaimpa, Yesu lengte, ''Ea Ai, tewe memofa fata, tewe jaterika jawe tew tete.'' Pea tebafa taba undi teteko ro-Keke tete tewowo. ³⁵ Teba nawo tere fua jaing tefoleng, tebafa rube Yahudi Yesus tenajie rau tejae tenajie. Tewe teni pate, ''Kewe teba hing efeng keweleng ile, pea-Ke kerawo ne keke efeng keweleng-leng ana-Ke ing Kristus Ke ing Ai kewo Keki.'' ³⁶ Tebafa taba tera-Ke tenajie, pea tewe tetu anggur tilang tekeni-Ke ³⁷ pa tenite, ''Ana meba Ri teba Yahudi, ne-Me memewo memofa kara.'' ³⁸ Pa, anara japo ung tewefe kotuho-Ke; ''KEWE BARI TEBA YAHUDI.'' ³⁹ Keba aling ungka teba feng ke tekeleko kefua Yesus kenaki i, keleng pate, ''Meweka Me Kristus? Ne meme woka Me mofa pa newe!'' ⁴⁰ Anaing-angra, keba feng hing ung ke hekelu pa keleng, ''Mewe meka fuka Ai mera jamepe mepemu kotu pera aha aling. ⁴¹ Newe bamuang pepe ja amane wenunute aha ana ja amane nete, peapa Kebawe jafeng ungra keleka fata.'' ⁴² Pea, kelengte Yesus, ''Ea Yesus, niwe me eng koko Me kengme ifu Jeng Tete-Meme.'' ⁴³ Kaimpa Yesus lengte ke, ''Niwe leng-lengme bamuang tafawo,ung-ang bangwe me-Ni amane lupa mute Firdaus ifu.'' Yesus Kewa ⁴⁴ Bang ing ana rangku hampa rang, lopang tupa jeng ing pewe tupa kakotirangku hengtong rangleng ⁴⁵ rang kelopang pa tirai i Ai Paake jing kang hingtung. ⁴⁶ Pea Yesus keleng ete pina letapa, ''Ea Ai, no Meme Ni lengtung wenikeleng-Me.'' Wakotu pe keleng, Yesus pungpe Keke eti. ⁴⁷ Kaimpa taba rube ja lewang ing kefo, ke Ai pi keleng pa keleng ''Bamuangwo, Kebawe ja feng keleka.'' ⁴⁸ Peanya teba nawo tete jaing tefofote jaing lewang, tewe temepa tangrue tete terojie-terojie. ⁴⁹ Tewe nawo Yesus tefijang pa teume narang-rang ung tela-Ke tewe teja Galilea tere hambang-hambang pa jaing-jaing tefoe. Yesus I tete ⁵⁰ Kebaung kebaleng-kebaleng bati keke Yusuf, keing tebafa Dewan Penasehat,keba efeng pabamuang. ⁵¹ Kewo ing kepungleka pa jate-te . Yusuf kew keka kota Arimatea, peing kota teba Yahudi. Kera keba kemepa keng ile-ile Jeng Tete Aike. ⁵² Ketifi Pilatus pa kewa Yesus ripeke. ⁵³ Pea, ke Yesus ripeke kewehete wa ri salib pa ke kerapela ro linen. Kaimpa Ke tekefati keheti i fulu ing pahat tangja tete wungra. Kefu baungra teke fati raka. ⁵⁴ Bang ingpe Bang tetupi ete, pa bang Minggu pe tetewe jajate. ⁵⁵ Teume-teume tewe tete telupa Yesus teja Galilea tejajue Yusuf. Tera tete fulu tefofo-te pa tunane Yesus ripeke teke fati i ing. ⁵⁶ Anara teing, teme pa rempah-rempah tetupi papa wala minyak tejojo Yesus ripeke. Wakote Minggu bang tewe temefa meme peing Musa ropo Taurat penu.