¹ Kaimpa, Yesus lengte teangkufa keke,''Wung ehitafifile peing etu, pe fengtafa meba meang lepangnya. ² Efengwo wung kilangan eweko a ele ketikeke pa ke eko elohetiti jafu kemeko ke ana wung tepa fie ko teangku-teangku hapawe kelehipupule. ³ Ehape takoko! ana jome meme neleng kelekote me, ke hemepupu; ana keengte neleng ing jafeng, neleng keke memapung-pung. ⁴ Pera,ana ke neleng kele me nawo la napang hengtong tehe bang aling, pa kerapuna meti la napanghengtong mepeng-peng 'Niwe me nieng, kewe neleng mapung fata.'' Ma we Pung keke ⁵ Rasul-rasul yenite Tata, Neweka pung fang-fangka mepehe!'' ⁶ Tata lengpate tewe, ''Ana ewe pung e ewe bapale ana sawi toing, ewe lengtete ritu murbei, 'Mejula ma hangtu we pa tewawa jaloefu,' pa rituing kelala me.'' Bapo ing keba Rube Pike Keluile ⁷ ''Mebaung ba ka ewe ke bapo keke, ke lehe jano keleilena na jako kekakailena, ke lengtete bapo keke po keme lehete, 'Mepe, metamu pa jamema? ⁸ Peka kera lengko bapo kekeing, 'Jajongka metupiko ni pa rora ana efeng mefafa ko ni jano huhufa mepepe ni ja nikang-kang pa panihung-hung. Kafa tete, mpa me jame memama pa pamemumu. ⁹ Jaungka kelengna janawo mepepeng bapo peanya jakelengnya jano mepepe? ¹⁰ Anaing-angra ewe, ana ewe jano nawo ele ana keleng kotu ewe, peanara elengtete newe bapo jalelepaka. Newe jano nerenete we peana jano kelengkotu pea jano nererete.''' Teba Kusta Nahipang pang hingtung Keleko Hae ¹¹ Po Ke pate lengjae ing te tete Yerusalem, Yesus kepate leng jaeing leng eteing wa keho Samaria pa Galilea. ¹² Poing tekengte bametu ung, Kewe teba kusta nahipang pang hingtung kepate latete tere hambangwo te Ke, ¹³ pa tewake pina letapa, ''Yesus, Koru newe pipateka mepe ¹⁴ Poing Yesus kalengte tewe kefe, Kelengte tewe, ''Erefu pa ne e e enalung-lung imam-imam.'' Pa po tejae lengma, tewe nete tupi. ¹⁵ Poing tewowo keba aling ung kalengte ne keke hae, kera pute pa Ai kekepa pikeleng pina kakapa letapa, ¹⁶ ketakung heti kepa tang e Yesus pa kewapate niwe janawo Me pepeng. Kebaing keba Samaria. ¹⁷ Kaimpa, Yesus kelengte kebaing, ''Mepewe mema teba ne haenya? Tewene teba nahipang pang aling? ¹⁸ Tewe kana tebafa tete tepute Ai kekepa pini kebawe keba kapenglo te? ¹⁹ Pa Yesus lengteke, ''Memaleng pa memu pung memewo me efeng keweleng.'' Ai Jeng Teteke Petete tu ²⁰ Poing teba Farisi ke tejeng raneung Ai Jeng Teteke tete tu, ''Ai Jeng Tete petete tu pejari-pejarira nefofo kate, ²¹ Baungra mepeng-peng kape, 'Ekaleng, Ai Jeng Teteke karawe paetuwe.' Ai Jeng Teteke para etufu.' pebamuang pepe Ai Jeng Teteke pe etu langhou-langhou epa nene.'' ²² Kaimpa, Yesus kelengte teangku-teangku keke, ''Bang pepe tete tu ewe e pungtu bang aling ewe fofole wa bang-bangte Keba Ko, ewe e fofokale. ²³ Teba-teba tenini ete, 'Ekaleng, kefua!' na 'Ekaleng, kewea!' Anaing-angra, ewe kefu erereka pa elalaka teba-teba ing.'' Keba Ko Ke tetele ²⁴ ''Ke ana heng-heng fefe keke keja wa fitong hope aling te fitong hope hing, anaing-angra Keba Ko kera bang Ke kepa. ²⁵ Anaing-angra, Keba Ko kera teketupa nolelepa tete te pekewe kukuto pa teba mo ung-angwe ke tekerina peng. ²⁶ Pa, peana po lewang bang-bang felangro la Nuhkefu, anateing pera lewang-lewang bang-bang Keba Ko keraing. ²⁷ Teba-teba ja tetang pa patejung, teka upong tete pa teka tefaja upong tete wakote bang Nuh kemukengtiti bahtera/ tu pa pabapale ko ko teba tebing fata. ²⁸ Pera lewang ana po felangro Lot kefu, poing teba-teba ja tetang-tang, tejung-jung, jata tete, tupate reni jata tete, tewawa pa jano tere e. ²⁹ Peanya poing Lot kewalite kota Sodom, ra pa belerang wa petang hepate ana fo pa pejipa tebingko raka teba nawo. ³⁰ Petunaing-ingtu bang Keba Ko kera weeteka. ³¹ Wakotu bang ing, mebaung me ememupe paa hora, pa ja-ja meme motu paa i merapu hepe ja meme mepepeka; pa mebaung mepe-mepe lehe, me mepepeka. ³² Me engtakoko ja ana lewang Lot eke! ³³ Mebaung me ena lengtung meme mawape lengtung meme lengtitile. Pa mebaing ba lengtung meme lengti me efeng mepepe pe. ³⁴ Niwe lengtete ewe, wana rapang ing teba hingtung tena ke e jeng teleweng ete aling. Anaing- angra kebaung ke teketute, kebaung kelei. ³⁵ Teume hingtung tena pelupa gandum tejalue. Peung tewetute, pebaung petue. ³⁶ [Anaing-angra teba hingtung jano reete lehe kebaung teketute kebaung kelei.''] ³⁷ Kaimpa teangku-teangku tejengte Yesus ''Kewene, Tata Yesuskelengte tewe, ''Kewene jao etu, keing-ang tanglo teluete.''