¹ Farisi domyea meune audireusike Yesus re te mekhaije Taurat yunjung Yerusalem yea mekhaije yo bere. ² Mekhaije bea Yesus nea u na tomona yo neang ouwnge neame neaniki bere yea angwaje. ³ Tanyebang, Farisi domyea, Yahudi domyea bere etamang te neame nea niki bere yea neasinoibang anei, neame aije bu ne kiyeikoyaije yere neame noro seikoyore mo wa etamang angnaje, nea yobe neai khamese neai akekerei neaima kerwaimi ne. ⁴ Neang Yahudi domyea domyea tereng yowa yea maije bea, etamang neanemang anei, neamee kiyeikoyaije mo amang angnaje. Neai yobe neai khamese neainya a meyerea kerwaimi, imea na obe na etamung neaima neanembase kiynaije. ⁵ Neang Farisi domyea bere Taurat yunjung bere Yesus te Sinanye, "tainye Wea u na tomona yo yobe neai a kerwaimi te ne etakhoi, etamang nea mee nea niki bere yea anaije?" ⁶ Yesus yea Weumi, "Yesaya yea mai a neatere be erukoke munafik domyea, neaima mongkhoke: "Nda yoo yang Deate neuga bonei jea mo moraise, nea kena bea aatau butau. ⁷ Deate neantong bang dea moraisee domyea neai a kekereinye." (Yesaya 29: 13) ⁸ Allah re akho peuko te moijea bureangebokhaige, mai yobe neai abubu mo ikereukokhauge. ⁹ Neangkhaijea Yesus yea neande yo te weumi, "Allah re wari a te bea moijea bureneubokhaige, mai iseai dang ne. ¹⁰ Tainyebang, Musa yea a erekoke, 'Sinde meaning neakho neanangke te mee beai-beai beangminde, sinde neakho neanangke te a pekho engmiwende, neang kiya tetende. ¹¹ Neande be, meeyea erauge, sinde meaning neanangke neakho te wengminde, 'thaita deainya terengeng yatoumekhauge, neande bea deai kena busea, yeiwasei. ¹² Nangkhaije, meeyea neang domyea aseungekhokhauge neakho nenangke te mee u emokhoi mo, ¹³ neande umangkhai Allah re akho peuko aseumikhokhauge mai isea aye neai abu neai jea kerwayempe. ¹⁴ Yesus neangkena domyea nembase Keaneumikoke mo weumi, "mana Deate botontebo, meeyea nembase iseayembompe. ¹⁵ Etamung tai-tai yakhayea uburu eise eyeisiyere kaye neande neuga te nikikhombu te eyeiboi. ¹⁶ Sinde weai engkeai bere kiyea, nenda a erande botoibore. ¹⁷ Neangkhaijea Yesus neang domye nukeumiboke mo imea eise Eyeisike, Nea u na tomona yo beibokhaije neang a atumboke a be beneng singwanye. ¹⁸ Yesus yea weumi, "meeyea neaima iseayeiboi etea? Mee meseaibang ne, etamung embai yakhayea ubure eise meyeisiyere neang uburu te pekho emokhoi? ¹⁹ Tanyebang, eise meyeisiyere khaye wa ne yatere eise meyeisiyere, nea kena eise bang, neangkhaijea beneng eisaneyere." (Nengkene Yesus nenda bu khanina etamang nembase iritaa bang.) ²⁰ Beneng Weumi, "Domyea neai ubure eijea bareyaije etamung neande niyea etamung pekho. ²¹ Tainyebang, neang etamung nea kena eijea, nea pekho ubene eijea, nikikhombu, yokho etamung neai, domyea toisoi neai nikikhombu, ²² pekho nibi, ukeai, wari pekho, a sinimbu, kena senseng, a ukeai, khobu noropo. ²³ Neang pekho etamung nea nemene domyea neai uburu eijea baremiyaije, nande nembase neuga te nikikhombu mo. ²⁴ Neang yowa yea, Yesus anyuke mo Tiberias bere Sidon bere te powere. Angkhai imea embai see nemareuge Eyeiseike, domyea suwa etenanyende bere ne, neandebe, Neyea domyea neai ijoko yea e peaiboi. ²⁵ Neangkhaije, Yesus re a botokhaije, miyea embai ne meangke pa upekho neai warbo ainyeboke, meke Yesus re otowe ne ototereng dea iseukoke. ²⁶ Neang miyea Yunani na miyea, Siro - Fenisia ne tongkhaije. Yesus te diyweunge ne meangke re uburu einya warba te Tukengesinte. ²⁷ Neangkene Yesus yea neang miyea te Weunge, "Neang meangke etamang aneuko u deubo. Tanyebang, pa-pa neainya etamang yoku te eyeijea. ²⁸ Neang miyea yea Yesus te weunge, "Na tere Tuhan. Neandebe, neang yoku pa-pa nenya amang mosi-mosi meja kere na eyanewaije." ²⁹ Yesus yea neang miyea te weunge, "neangkene weyea nda a ereikoke, mana dere. Neang warbo we meangke re uburu eijea eisangke." ³⁰ Neangkhaije, neang miyea ne imea te beisoke ewere, eke bea ne meangke a ne tongwere, neang warbo neuga yea eisangke. ³¹ Yesus Tirus yea Eisangke mo Galilea te Dekapolis khani na Sidon noro yea powere. ³² Angkhai Yesus re te domyea embai kumba neandebe amung yawenyetokhaije mewaije. Mekhaije Yesus te diywainye Nea mee neang domye re u rang ne Tangesinde. ³³ Neangkene Yesus neang domyea yawenyetoke do miyea noro eibarekeje, yowa mong te ekeije. Yesus nea mee neang do neangkeai eise Neinyeke mo, eiki touboke mo Nea mee neang do re peunge ikereuboke. ³⁴ Yesus neajoko kungbuma te eiweke neangkhaije noo erea yomboke mo erere "Efata!", nea arti "Daweibo!" ³⁵ Neande see mo, neang do neangkeai nesbi daweuboke, ne peau bobongsikhaije nesbi daweuboke, nesbi a ne yakha tere erwere. ³⁶ Yesus nesbi aseinyekoke neang etamung yeuboke domyea te eweijea. Neande be, Yesus yea atung korweumi, a erea yea aseweumi, neang domyea a nesbi mo erwaije. ³⁷ Neang domyea pa we-we yea khowaije, eraije, "Nenda etamung nembase poi mo Mokhomiyere. Domyea kumba neajoko Mokhoweumi mana engkea botaje, amung domyea Mokhoweumi mana a eraije."