¹ Eyea makayea elemakonde, eai yobe Abraham nanekewoye mokoyere? ² Abraham na uw mekai foi mokowoye earene, Allah wali himaloingeboke ro yea me beauiboungene, niyea embei aikoite nahului koube, peleyeare Allahre ro be royoinye embei aikoite okoi? ³ Homo fea ne meahea molaikoke? "Allah neai a elewoyere, Abraham hira rabo halewoye, namekai Allah nare wali himalongeboke ro yea me beauboke. ⁴ Romiyea nibi kaua mokoikiyoyena roibu re yeanye naisong mea bang, inyanyele hele. ⁵ Peleyeare romiyea wali hole moloiboite uw wake yea erelei, peleyeare Allah - romiyea nebang beale yore na u himalainyeboke romiyea mokongmile kiyea neai are eleyere hilarabo halendena pele hila rabo haleye yea Allah yea wali himalainyeboke romiyea yea me beaunge ⁶ Ondofolo Daud namekai a eleukoke romiyea me uw bang mea Allahyea nare wali himalainyeboke ro yea me beaunge kiyea, onomi foka yea hubannende. ⁷ Romiyea na uw mekai nebang mokowatera Allah yea fanyemmibonde nawaneng na uw nebang wa nebangde aheungekoke beaufoke yo onomi fokayea hubanaiyende. ⁸ Romiyea na uw nebang wanebangde Allah me ebeai yo, nawaneng onomi foka yea hubanainyende. ⁹ Pele a onomi foka yea hubainanyende, Yahudi ro uw elere nainyehake yo neai mo bang namekai Yahudi bang romiyea ro uw elare eneisai yo neai - haubihibang, meyea nahele elande, Abraham Allah neai a elewoyere hila rabo halewounge ne Allah yea nare wali himaloungeboke ro yea me beauboke. ¹⁰ Embele hee yea Allah Abraham de wali himaloungeboke ro yea me beabounge? Abraham na ro uw ela nainyehake yea? Na hele namman mea. ¹¹ Me beaungebokera Allah Abraham de ukeunge ro uw ela nenainyehande. Pele ela nainyehake iwbauke yeuboke eneisai yane. Abraham Allah neaia elewoyere hila rabo halewoyene Allah nare wali himaloungeboke ro yea me beauboke. Pelemekainye romiyea na hului wali himalainyeboke ro miyea me beammile neaite ehi yo ro uw ela eneisai hee Allahre hila rabo halewainye yo neai yobere Abraham yeuboke. ¹² Abraham na ro uw ela eneisai hee yea Allahre a elewoyere hila rabo halewoye waneng, Yahudi yo ehi ro uw elare naimihake yea peleyeare Allahre a eleyere hila rabo haleate Abraham nameikai pele uw mekai waneng romiyea neai yobe niyea. ( Abraham Menerima Janji Allah Melalui Imannya) ¹³ Allah hetewounge, Abraham neai orona mena rake kani kela yeumikonde pele a hetewoungere tauratre walora walora wali heere folakoke Abraham hubara heaita yanewounge. pele nibi yeare Allah wali himalainyeboke ro yea me beaungeboke. ¹⁴ Tauratre waloda wali hee folakoke re hubara heaita yaneyainye ro miyeare Allah rake kani kela yemmikondena, Allah neai a eleyere hila rabo nakano haleanne, namekai Allah are heteungekoke a bangga yea honate. ¹⁵ Wali heere folakoke huluinye nekate romiyea pele are asasi konakondena, ehee pukulu hainyemikonde, peleyeare wali heere folakoke u bam mea, asasi okoi nekande. ¹⁶ Pelene Allah are heteungekoke hambung neai kena buhea eare bang mea hemmile romiyeare yemmile neaite, romiyea neai a ele yere hila rabo haleate yo yea yaronate. Pele nibiyea Yahudi ro miyea Tauratre walora wali heere foiaikokere hubara heaita yanainye yo re mo bang, peleyeare Yahudi bang romiyea Abraham waneng Allah neai a elewoyere hila rabo haleate yo yea pele are heteungekoke yeale romiyea nemene neai yobe. ¹⁷ Allahre homo feane rake a Abrahamde ukeunge, kani kela helengna romiyea neai yobe ware raneubokawale, Allah romiyea herewatere waleumi kiyea nawaneng eyeiboi hambung neai a eleye huwi beate yakalete kiyea, neyea a elewoyere Abraham hila rabo halewoye, neai robe ro yainye, Abraham eai yobere yeuboke. ¹⁸ Allahyea Abrahamde weunge, weai orona mena heleng enai yembonde meahea mekai horo fa honoite kabeuboke yeare, peleyeare na hibimo Allah neai a elewoyere hila rabo halewekene, Abraham kani kela heleng neai yobere yeuboke. ¹⁹ Abraham pele hee ne, benen neai orona menare elsoieisi huwi, haubihi bang neai uw rorele uw raungehke nawaneng naralo yakama roele uw meahea mbai 100 beiboye, namekai namiye kiho. ²⁰ Peleyeare Allah heteungekoke are Abraham kena wauwau okoinye, nahila rabo elea yarowoye, namekai Allahre nahibi ibi hili hebeungeke. ²¹ Abraham hila rabo halewoye, Allah yea neai a heteungekokere nahulu ennemokombonde. ²² Pele earene, Allah Abraham wali himaloungeboke ro yea beoboke. ²³ Rake a molakoke, Allah nare wali himaloungeboke ro yea me beaye, pele are Abraham na uw mbaite mo bang. ²⁴ Nawaneng aeita neaite pele molakoke, eyea eai Tuhan, herewate uw nolo uw ikaita aungunuke, Allahre hila rabo haleane yore, Allahre nawaneng wali himalainyeboke romiyea yea me beaumi . ²⁵ Allah yea eai nebang earene Yesus kinyeumiboke haiboke nare hila rabo halemande yea wali himalainyeboke yo yea mebeammele neaite Allah Yesusre herewate yo uw nolo uw ikaita aungunuke.