¹ Eai omi keng febe, kengkrea yone jemaatne kalia mokoye kiyeare hakongebombe neaite yerea riyamale. ² Yesus neai eleuboke wekeumi holona miyea yea ei hawennele hambung de hakonnembombere rinyembena hakonnembombe, haubihine bang neyea romiyea heleng hakowoumi nawaneng rare hakowouke. ³ Friskila namolo Akwilare Yesus wali ondofolo re kalia mbainye mokonde yore, reainye ro meleyemmibombe. ⁴ Rare holere molonaitebondere neai uw haubihi bang mea hubawainye pele yo hakaitebokere heleng foi weite reyea mom bang, eai aka beake wa Yahudi bang romiyea nanemene waimi. ⁵ Rake yo Prikila Akwilare imene eyarileisiate jemaatre reainya ro melea yemmibonde aka beake Apenetus reyea buheare heanale kiyea, reainya ro maleayen- nebombe, Asia kanina wali ondofolore hila rabo haleainye holona na bemena ro, Epenetus niyea. ⁶ Maria mai aneaite kalia eleakeai sele relewounge kiyea yeale reainya ro meleayennebombe. ⁷ Pelera reai yoho mbainye kahili wabeu Andronikusre Yuniasre nanembainye kawane hebewande yea yeale reainyo ro malea yemmibombe hokolo bee wali ondofolore abu ako nolone wro re roibaimi yo naweng reyea nammam bea hokolo bee wali ondofolore hila rabo halewoinye. ⁸ Apliatus reyea Tuhan eita buhea heanale kiyea reainya ro meleayennbombe. ⁹ Urbanus wali ondofolore walia mbainye mokonde kahilare nawaneng Stakhis buheare heanale kiyeare reainyo ro meleayennebombe. ¹⁰ Nebang hubawounge horo namman wali ondofolo neai ea eleye kiyea Apelea re yeale reainya ro meleayennebombe Aristobulusre imea einye me beaibeko yore reainya ro meleayennebombe. ¹¹ Herodion reai yoho mbai kahili kiyeare reainyo ro wmeleayennemombe Narkisusre imea obe einya eai Tuhande hakainye yo yeale reainya ro meleayennembombe. ¹² Trifena re Trifosare eai Tuhande kalia elea releinye miyea bee re reainya ro meleayennebombe eai Tuhan de kalia elea meumokoukoke miyea ehi Persis buheare heanale kiyeare reainya ro meleayennebombe. ¹³ Rufus, Tuhande einye rore rainyeboke ro mbai, nawaneng neake reai nake miyea waneng ma na bee ne reainya ro meleayennebombe. ¹⁴ Asinkritus, Flegon, Hermes Patrobas, Hermas, nawaneng hila rabo mbaite haleate aka beake nanemene mbainye nekaube, yo yeale reainya ro meleayemmibombe. ¹⁵ Filologusre - Yuliare, Nereus nemeam be, olompas namekai Yesus neai wekeumi holonayo nanemene nambele nekate yore reainya ro meleayemmibombe. ¹⁶ Yesus neai eleuboke wekeumi holina waneng yo yea eaite neaite ro foi jea meleayemande - wali ondofolo jemaat jemaat nanemene mare ro meleayayembe. ¹⁷ Aka neai beake neai reyea moi whurerembe jemaat einye maite neaite a horonatere mokaimi romiyeare namekai mare keleayenggokombe wali ondofolore nahele a neneai mekai keleaimi romiyeare, ijoko robommile neai nolora uw wemembe. ¹⁸ Haubihine bang pele uw mekai waneng romiyea mbea eai Tuhan wali ondofolore kaliare mokate bang peleyeare nanebangde kena heahea kate remo ei molainye, iteai heaban iteaiyeboi romiyea holonare a yukeai jeale a moi moi mokaimi randa ame karebai wabaimi. ¹⁹ Romiyea nanemene meyea wa wali ondfolo neai a eleyere hakaunge a boraikokene, reai kena roweisiyeuke peleyeare reyea kena kale foi mokombe neaite iteai heaban yeale waneng bea uw haranembombe peleyeare me nebang uw nebang mokombe neaita kobu yeale yea nekembe. ²⁰ Allah reimai yeumi kiyea naheki bang walora yun kiyeare pohenennebondera mai oro keleene meneruleisinde. ²¹ Timotius kalia mbainye mokonde kahili namekai reai yoho mbainye kahili wa Lukius rera, Yason de ra, Sosipater re ra mare meleayamembe. ²² Reyea Tertius, Paulus neaite rake homo moloukokale kiyea, eai Tuhan de eita mare meleayamale. ²³ Gayus rare neai imeane ukeuke nekale kiyea nawaneng pele imeane arileisiyate jemaat na romiyea nemene mare ro meleayayembe Erastus rake yona roi mere ikileuboke kiyeare eai aka beake Kwartusre mare ro meleayayembe. ²⁴ Peyea ebeli banale Tuhan Yesus wali ondofolore na kena buhea eare bang mea meyea nanemene ei haungembe. ²⁵ Aka neai beake neai, reyea wali ondofolore na a foi feau foi huwenggokamale, pele a heki hele nunne honowate, peleyeare rake yoho nemene wali ondofolore hila rabo halenainyele neaite namekai hakonainyele neaite, ²⁶ Allah hubalo mando yea neai yenjo kayayo neai homo feane ukeumi molaikoke, na meakai rake hee ne wali ondofolore neaite yakalaumeboke. Pele Allah nahului mokonembombe wali ondofolo neai a eleyere hila rabo elea yea halemembe, hakomembe. ²⁷ Allah nembai sele itea no hebean no ehi yeale bang, Yesus wali ondofolore walora Allahre huba bang heai bang hili hebenainyende! Amin.