¹ Pelene, eyea eyea elea wake mo yeale wokoumi romiyea, nakena uw fomayea emale yambi male hubaijainele romiyeare rikemamile hakomomamile. ² Eyea mbemba mbemba eambele yaya wali nibi mbainye ohande yona kena foite mokomamile. Neai hila rabore amminunde neaite pele romiyea neai foite mokomamile. ³ Haubihine bang Yesus wali ondofolo neai uw foi neaite neyea bene enekei, bukainyehike Allahre homo feane wali ondofolo rake a ukeunge, rake yea haraiteboke waite waneng eisubanale. ⁴ Kenayea heraumayende yea wali ondofolore hila rabo hale ijande walora nawaneng Allahre homo fea iteai-iteai yande, eyea rabo elea halemande Allah nuleungekoke a hului mokonde . Pele wali mare kelewaime neaite Allahre homo fea ne a feau yoni yoni na bere yea molaikoke. ⁵ Allah yae elae yemmele aei kena heraumabonde na kaliyare no bam hee bam mokomale nawanem aei kena u Yesus Naei kenare koye mekai jae nekemale. ⁶ Meyea kena mbai u mbai yae nainggi bulau bae aei Tuhan Yesus wali ondofolo re aka Allahre hili hebennele neaite, beyae Allah riyanale walora kena mbai u mbaite mokonembe nekembe. ⁷ Allahre bumane enainyekende naite Yesus wali ondofolo yae mare ei ambokembe wanem maite-naite ehiyae-ehire ei hawaemembe. ⁸ Uw bene nekenayembe Allah neai a eleye huluinye mokoyere keleumile neaite wali ondofolo Yahudi yebeai bubeaite meke. Neyea mokoungeboke Yahudi yobe neai kamehe neaite Allah yea nukeumiboke are nahele yeuboke. ⁹ Namekai Yahudi bang romiyea Allah yanekoi yare yea ei hawewaimi earene Allahre hili hebenainyele neaite, wali ondofolo meke, pelere Allahre homo feane Yahudi ondofolo kabang Daud rake a Allahre ukeunge, pele earene, Yahudi bang romiyea uw nolo uw ikainye, reyea ware buma ereikeanete, namekai koijea bea yea ereikokte. ¹⁰ Nawaneng Allahre homo feane rake waneng molakote, Yahudi bang romiyea mem Yahudi romiyea yeale reimai mbainye emansukelendere. ¹¹ Nawaneng, meyea Yahudi bang romiyea, Tuhande bumane keanne, nawaneng koi bea yeale yea hare bumane. ¹² Nawaneng Allahre yendo kayalo Yesaya yea eleye, Yahudi yobe isaite orona mena enaisonodera ro mbai enjakalang bonde - Yahudi bang romiyeare mere mokommile neai eleye are nahele inyebondere, Yahudi bang romiyea rabo elea halenainyele yea nekenate. ¹³ Allah mokonembe rabo elea helembe neai eleye a huluinye mokonde Allahre na Roh elea walora meyea rabo elea halembe Allah nuleuboke are nahele inyaibonde neaite reyea riyanale neai a eleyera hila rabo haleaunge neyea mai kena rowenesimbe nawaneng reimai yeale haungenembe. (Paulus Na Kaliya Romiyae Roma bam yore Mokowoye) ¹⁴ Aka neai bake neai, mai neaite reyea kena wauwau okoi, haubihine bang uw foi yoni yoni heleng mainye honanyembe, iteai hebeam yoni yoni are iteayeaukoke na mekai na hului ehiya ehre kelennele. ¹⁵ Bena kelewamale are neneng uw bene nekena yembe neaite, be raubuleubokele rake homo moloukokale, bang, Allah kena buhea eare bang mea heukekoke na waneng. ¹⁶ Ukeuke Yesus wwali ondofolo kaliare Yahudi bang romiyea uw nolo uw ikaitaye mokorele Allahre Rohyea Allahre kena foite moko nainyele uw mekaite, Yahudi bang romiyeare mokommibonde namekai pele yo hili eha akau eha waneng mea Allahre kena foite mokonainyele neaite, Allah ukeuke iman waneng mea neai wali ondofolo re na a foi feaufoi Yahudi bang romiyeare eremihuwende. ¹⁷ Yesus wali ondofolo yeale mbainye nekendene, Allah ukeuke mokoimiyale kaliare embei aiko jea roukehike kale. ¹⁸ Yesus wali ondofolo reai walora Yahudi bang romiyea yaweremile Allah weumi a huluinye hakonainyele eaite, wali ondofolo rena afoi feau foi huwameale. ¹⁹ Nawaneng Allahre Roh elea yea eireyea aukebokene hambung hemere emere mokowale pele beibate hambung de mo reyea a elerele, hambung ehi a eyelei, wali ondofolo rena afoi feau foi huwa meale Yerusalem yora huba raweubokale ekale nibi yo ranne ilirikum yone huba eungemokouko kale. ²⁰ Reyea kena koimeyale wali ondofolore onewainye mea ehi yo yea ainyunuke jemaat mbainya reyea jemaa ehire arununde yealene. ²¹ Bukainyeke Allahre homo feane wali ondofolore neaite rake waneng moloikoke neai a keleami yo roko mbai ei aiboi yo, ijoko enainyerende nawaneng neyea keleumi are roko mbai eiboroiboi romiyea enai tea yembonde. (Paulus Merau Raungehike Roma Yore Endere) ²² Pele kalya mokowalene roko heleng mai bokore erelere neaite meungekabeukokale. ²³ Ralo yea yakama yea mai bokore erelere kena koijale, peleyeare reyea ikai bang. ²⁴ Reyea merau raungehikale, Spanyol kanira erelere reyea rabo halale pele kulungne erewende mambele hubamakonde remai mbainye emakonde pelera Spanyolre erele neai eha inyale reyea rabo halale meyeanahinggi hakondebombe. ²⁵ Peleyeare Spanyol kanire ei mo, reyea rake hee Yesus neai eleuboke wekeumi holona yo neai hambung arilakoke yeale Yerusalem yore roukndere. ²⁶ Yerusalem yona Yesus neai eleuboke neai eleuboke wekeumi romiyea ehi hambung kalo hele wokene jem jemaat Makendonia kanina yeale akhaya kanina yeale kena kabang koibate hakonaimi bondere, pele yore inyaimile neaite hambung yoni yoni arilaikoke. ²⁷ Rake romiyea kena remai sele yea hakonaimibondere nana hesele neai paka ranne honoye, haubihine bang bena Allah yea Yahudi romiyea neaite foi jea mokoimeyeumi pelera Allah nibi mbai mokoungeboke Yahudi bang romiyea na hului Yahudi romiyea waneng mbai neai foi yaronate, pelene Yahudi bang romiyea nabaka ranne huluinye Yahudi romiyeare na wali hambung yoni yoni yea hakonaimile. ²⁸ Hambung rake uyo yea arilaisikere, Yerusalem yona yore itemmile kalia mokorekonde riyau ukembondera, reyea nekaube kanire erele. ²⁹ Reyea reateai mai bokore erele hee mai kalo molongkokembe huluinye wali ondofolo reai walora na hului mokonembombe. ³⁰ Eai Tuhan Yesus wali ondofolo mambele nekaube earene, nawaneng Allahre ro elea yeume eaite neaite kena buhea hemamile earene, reyea riyamale mambele rambele reai neaite Allahre ebeu bomannele. ³¹ Allah kena koye hului reai kena rei mai jea mai bokore merele, nawaneng mai nolone eyea kena foi uw foi emansubande neaite. ³² Allahre ebeli bonembe Yudea kanina Allahre hila rabo ehalei holona me eita Allah hayendekonde nawaneng rake hambung roukende kayere Yerusalem yona Yesus yea eleumboke wekemi holona romiyea nakena reimai jea yaronakonde. ³³ Reyea ebeli banale, Allah rei mai onomi fokano kiyea mare nanemene ei haungenembe Amin.