(Tuhan sabat yane) ¹ Sabatya mbaimo, Yesus namota ohowate yoyaele, gandum heke nolora eubatemo, gandum hokayeke meyae hubayeke eubane anayeke eubate. ² Farisiiyo yae hinaimile, "Mekane meyae Sabatyare asasi koukoyaube, emokoi ehayae imokaube?" ³ Beleyae Yesusyae weumi, "Meyae mataeibam heleha, mekayae yobe Daud moloukoke, neyae/Daud namekai ro nembainye moni katene, ⁴ mehae mekai yo imae-ralo imaere aruleibiyate, beyu beyebare hebateyoyae annaikonde yaere bele yore yemmile annaikonde?'' ⁵ Yesusyae Farisi yore weumi, "Meyae mataeibam hele, yobe kabam Daud namota hakanyekoke ohowateyo moni koubatene mokouboke u mekai meyae homone ehoikoi? Yesusyae Farisi yore weumi, "Reyae Akore bokora mekale romiyae u re yeubokale kiyae, Sabat nano Riyae niyae." ⁶ Sabatya mbai mo, Yesus Allahre ima obe einye eke kelewoumi, belena ro mbai name meube me nimainyekoke. ⁷ Tauratre itayaeibokeyo yaele Farisiyo yaele na ijoko Yesus remo erewanyele, keme nenainyebondere, sabatyayae rake ro onomi yennelere ha? ⁸ Beleyaere, na ubenere nekewaimile ha Yesus itayeuboke, Na ijoko weke bele ro name nimanyekoke kiyaere weunge, "Anyu, nolone hebenyu, " Bele ro afae anguke bele anuwaunge hebenguke. ⁹ Yesus bele yore weumi, "Reyae mare hinerensimbere, meyae mehae mekai kayeyae mai kena kaube, sabatyane mokomabondere, foi kayae, nebam kayeyae? Ro miyae na wali hole molomambondere, ro miyaere hosote? ¹⁰ Yesus na ijoko refi rafire ereumikokemo, Yesus name nimainyekoke ro re weunge, "Wame neinye, " Bele ro name nekeunge, name nahibi foijae yeuboke. ¹¹ Bele mekai erekatene, Tauratre itayaeiboke yoyaele Farisi yoyaele akuba yeuboke hoibate, merau kolowanye/rainyihike mekayae Yesusre mokonainyebonde bam. (Ro me bee mehine bee yaele elaikoke) ¹² Bele ya mbai mo, Yesus homunggaere eke Naekore ebeline reniyai koko boungemeke. ¹³ Ya heubokewa Namota owate yore kaeneumikoke, ro me bee orone beeyae ro eleukoke Na yebaei-bubaeite inyaibondore. ¹⁴ Simon, Yesus yae Petrusyae ro roungeboke kiyae, Andreas, Petrus na aka baeke, Yakobus, Yohanes, Filipus, Bartolomeus. ¹⁵ Matius, Tomas, Yakobus, Alfeusre khelu, Simon Zelotyae kaenainyele. ¹⁶ Yudas, Yakobusre khelu, namekai Yudas Iskariot, kelaite neke ro. Yesus Wali a hena a mo keleumiyeke. ¹⁷ Yesus bele ro eleukoke yoyaele wayakoukoke, Yesus faunge hebengukemo, Yesus namota ohowate yo helem bolem arileufike, Yudea kanina ro miyae, Yerusalem yora, namekai buhaei yo Tirusra namekai Sidonra helem arileufike. ¹⁸ Rake ro miyae arilewoye, Yesus Na wali a hena are boronatere, namekai bulone felana kateyo onomire yaronatere. Namekai ro miyae na waline bulo walobo aumiboke kojate yo, onomi yaronayende. ¹⁹ Ro miyae nawaere-waere Yesus Na ure kilenaibondere mate, mekanebam Yesus Na una ela metuweyemo bele elaeyae ro miyaere onomi ijeumi. ²⁰ Yesus namota ohowate yore beufokemo weumi, "Kerebam nalebam nekejaube yo, Raei me kelene u kelene nekembena ma u onomi honomimo nekemembe. ²¹ Meyae rake moni maite kaubeyo, Allah mare hamam narenembe u rembombe, namekai onomi honomimo hubannele. ²² Ro miyae mare ikele-isam konayembena, ma wali onomi honomimo nekembe, mare nenayensimbena, namekai Raei aerene maro nebam mokonayembena, ²³ Yokoi-yobae, reimai nasom hukelembe, mekanebam, mai mebuhae kabam sele surgana mokoungehakale, habuhinebam, mai yobe-yobere naei mekaijae mokowaimile. ²⁴ Beleyaere meyae ruyaele-kanggeyaeleyo, ma wali nebambae ennehubambe, mekanebam rake he ma wali na hinggi-hinggi hubaungelene. ²⁵ Wandere hubangeleyo, meyae moni maijae ma waline ennehubambe. Reyae ayae kaubeyo, meyae hele ayae endimembe. ²⁶ Himi hele ma u hubannele, mekanebam, ro miyae nanemene mare ei molonayembe, naei yobe-yobe, naei mekai mbai ame karebaite mokowate a re elewate.'' Waei yokeijore kena buhaeyae heumile ²⁷ ''Beleneyae, anggaeite boraube yo Reyae mare wamale. Mai yokeijore kena buhaeyae kommile namekai ro miyae mare ikelere kayembe yore foijae mokommile. ²⁸ Ware olomore roronete kiyaere, Akore riyeungele foijae mokommile, ware anebam mokonayete kiyaere Ako riyeungle foijae mokommile. ²⁹ Ware mefaere wa karu wende kiyae woungele benen wa karu refiyaele yenyele wende. Namekai hinye ma malore nukensande kiyae, waenyehinde rewende. ³⁰ Ro miyae waei hambum hambum rinyayetena, bele ro miyaereyeumile, namekai ro miyae mbai waei hambum rewendena, benem bele hambum roke eriyeijae. ³¹ Ro miyae ehire foijaemo mokomamile bele mekaimbai aei kena kande ro miyae ehi are mokonaimile. ³² Weya ro miyae kena buhaere haeyete yoremo haemaena, meka foijae weyae hubayekondere? Belemekai mbai, ro miyae nebamre mokoijate yo bele mekaimbai mokojate. ³³ Weyae, kena buhae haeyete yoremo foi mokoijaeme, weyae meka foijae hubayekonde? Ro miyae nebamre mokojate naeimekai mbai mokojate. ³⁴ Weyae hambum mbai ro miyae ehire ikame, wa rabo haleyae naei mekai mbai benayeufonde, mekayaere weyae hubayeukonde? Naei mekai mbai, ro miyae nebamre mokojate yo mokojate, mekanebam, bele ro miyae bele hangga mbai enaiyaronggonde. ³⁵ Beleyaere, wa yokeijore kena buhae heumile namekai foijae mokoimile, ro miyae ehire hambum yeumiyende, rabo ehaleijae benem benayeufonde. Bele mekai mokalena Ako helem sele yemmile, mekanebam, Ako bele ro miyae mekaite kena buhae kabam hele heijeumi. ³⁶ Beleneyae, meyae namekai ma waline kena buhaeyae, eije meije nekemembe, mekanebam, Ako Na kena buhae kabam sele heijeume." Ro miyae ehire keme eroroijae nekayende ³⁷ ''Weyae ehiyomaei himi mokoijatere hului okoloijae, waei himire naimekaijae elenateyaelene, ro miyae maei are weyae nehale eleijae, Allah ware beneufondeyaelene, ro miyae ehiyo maei himi mokoijate, weyae nundenayewende, belemakai nekalena, Allah aei himi Neyae fanyemile. ³⁸ Nasombae hambum-hambum yeumiyende: waheumiyendena, bele hului mbai ware mokonayewonde, kole-kole maemae enaiketete. Mehinimbae kolongele yeumilena, bele makai mbai ware mehinim bae kolonayewende inyayewende.'' ³⁹ Betamo Yesus rake ahubayae aruneubeko huboumi, "Ijoko kumba kiyae benem ro ijoko kumba kiyaere yawennehondena, bele ro bee bo einye eneibalende? ⁴⁰ Guru mbai naei itaei bumana na fa-fa keleumira. Beleyaere itaei itayaeikoke fa-fa na guru u mekai wanem mbai nekenate. ⁴¹ Mekane wa aka baeke na ijkona kerere mo weyae eranae, beleyaere o kabam wa ijokonare bae weyae ereiboi? ⁴² Mehae mekaijae wa aka baeke na ijokona kere rokei, 'beleyaere o kabam waei ijoko einyere bae weyae ehubaisi sele. Weyae faeu kai bee! Wa ijokona o kabambae re!ei! Ijoko foi ereye mo ba, beleramo wa aka baekere ijokona kere roweye." O ha na ani yaele mo ⁴³ O foi ha foi na ani himire emokoiboi, bele mekai mbai o himi ha himi ani foite omokoiboi. ⁴⁴ Nanira rowate ereiboyatera. betamo na no roiboyanyele. Ro miyae ara ani fonom kawa o ra ehokoiboi, namekai anggur ani o isa yaele o yae omokoiboi. ⁴⁵ Bele mekai mbai ro miyae u mekai foijale ro miyae, na kena une foi mokatera a foi elejate. u mekai himi yaele ro miyae na kena une himiyae elejate. Na kena u einya wanem mbaijae neugara baleijate. Itaei jaele ro yaele. '' Itaeibam Yo Yaele Imae Haeikoke ⁴⁶ Mekane meyae Rare kaenejaukele, 'Tuhan, Tuhan,' beleyaere ma wali bae Raei a wejamale mekainye emokoyei? ⁴⁷ Ro miyae rambele mbainye nekate yo namekai raei are borate mekaijae mokate yo, reayae kelerembombe. ⁴⁸ Naei u mekai ro mbai imae ruka ranne heuboke wanem. Alune yane hu foi finyau foinye, bele imae kuseikoi mahekoi bam hebende. ⁴⁹ Beleyaere, ro miyae Reyae huwamale are boraukoke beleyaere mere ure omokoyei nekeijaube yo, Reyae kelerembombe. Naei u mekai ro mbai na imae ifau ranne heuboke wanem. Alune yane mende wende bele imae kelambonde, nemene himi yembonde."