(Walobo Falem Yesus Re Wabewounge) ¹ Yordan wira keteke Yesus Allah re Roh na u keteungeboke. Roh ye yaweungehoke a kala kalare ekete ² Ekete ya rorele u bee einyekeukoke walobo falem umali hubanenggondere wabewoungemeke. Bele yakoko nekeumeke bune hamamne emaneimo nekewmeke, riyauke wennebonde yare bae moni kabamsele hubaungehike. ³ Walobo yae weunge, "Weyae nehale Allahre hinafa hoifana, rake ruka weimile feu ke inyaibonde. ⁴ Yesusyae, "Homo faene molaikoke. 'Ro miyae wali hamamne mo enekei." Ulangan 8:3 ⁵ Benem bulowalobo Yesus re yaweungehoke anuwau mbai bumare hele ekete. Rake kanina yo yam yoni-yoni na nene waewae honate Yesus re kelewonge. ⁶ Walobo falem bae Yesus re weunge, "Rake kaniranna ondofolo anggem nekei nanene waewae yaele nemene wanae wame einye iteite. Nanemene raei me einye honatene, ro miyae kena koronggonde kiyaere reyae kinyerende. ⁷ Bele mekaine be ebifen rare insineukobondena nemene ware iteite hayerete." ⁸ Yesus benem bukeungehike weunge, "Homone molaikoke honoye, Tuhan waei Allah mbai temo buma koloungende naremo ei moloungende." ⁹ Benem bulo walobo Yesus re yaweungehoke Yerusalem re ekete. Allah re imae kabam moko-moko bumana hele ekehonoye yeungebokemo Yesus re weunge, ¹⁰ Homone molaikoke. Allah na malaikat-malaikat wemmile Ware kaya ainyayeukonde hebenate. ¹¹ Name hirenaibonde name bumane roungayete, woro rukane neijalene. ¹² Yesus, walobo falemre beufoke weunge,Tuhan Allah re weyae umali ehubaijae. ¹³ Bulo walobo Yesus re umali yoni yoni hubaunge koke beufoke, Yesus nembai nukeungeboke, ya ikai ehine eraumeke. (Galilea Kanine Yesus Name u Huba Raweuboke) ¹⁴ Galilea kanire Yesus Allah re Roh yae keteungeboke maemae koukoke eiwoye. Bele kanine Yesus re igwau horewoy borowate. ¹⁵ Henggeleng raungehike Yahudi maei ebeli boiboi imaene raweuboke kelewoumi, ro miyae helem Yesus re eisele molowainye. (Yesus Nazaret Yone Hukanyehike) ¹⁶ Yesus Nazaret yore eke, bele yone naraiboke, kabam yeuboke. Sabat ya Yesus naei mokoje wanem Allah re imae eite euweufike homore ronggondere aunguke. ¹⁷ Allah na yendo-kayayo Yesaya moloukoke homofae yae ikainye na rulura bulaereuboke wekeunge rouboye, ¹⁸ Allah re roh Raune keteukeboke Rare raneukerike a foi-faeu foi kerebam nalebam yore hukemilere. Allah ukeuke mekale me u moko rebondere bulo walobo ikileumikoke me einye nekate yo bulearemikonde, ¹⁹ Yakala remile Tuhanrena ya onomi honomi meke yakalauboke." ²⁰ Yesus homo remo oleukoke ikainyele yore namene ikeumi Sinagoge imaene nekewate kohobam yaeiboke ijokomo raisike erewainye. ²¹ Yesus huba raweuboke weumi, "Mana ya nahinggi neijae meiyeuboke homofe yolo-yolo eleye afaeu. ²² Nahelere elewate yo buma kaiwanyele elate neugwara balaimeke emehahele hubawainye bele yo elate, "Rake Yusuf re fa bambae, mehaemekai jae meke eleyebam?" ²³ Yesus bele yore weumi, "Meyae a habeiboi-habeiboi ma ubenena nekembe wendelere, "Dokter waei u onomi inyete! Meyae borande Weyae Kapernaum yone hambum mehi mehi mokowoye, mana Waei?" ²⁴ Yesus yae weumi, "Reyae nehale yae Wamale, ro mbai naei yo-yamne me ebaei wanem nekenayende. ²⁵ Mana borombo a nehale re ukembere, Elia Allah Na yendo kaya yo nekewoye ralo yakama name bohi yaele moni mai Israel kanine meungeke koiwate. ²⁶ Allah Elia re naei yo bokore ewei ei Sarfat yore Sidon kanina miyae nale mbaite bokore ukeunge eke. ²⁷ Ro miyae nau bau-bau bae molai miyeke helensele Elisa yendo kaya yo nekewoye, ro mbai jae onomi roukebam, Naaman Siria na ro mbai mo ro onomi yeuboke." ²⁸ Sinagoge ne nekewate yo bele mekai a elewoye borowanyele ikele yaeiboke. ²⁹ Nanemene ainyuke Yesus yoboiboke nekewate anuwauka yomoite aibaleke a ya yara kinyenai bondere ekate. ³⁰ Yesus bele ro miyae nolora aloungeko euboye. (U Rani Rani Koiboye Ro Rouke) ³¹ Beleramo Yesus Galilea kanina yo mbai Kapernaum re eke, sabat ya yeuboke ro miyae helem eke kelewoumi. ³² Ro miyae helem kelewoumi nenemene eisele molowainyele, na fa yae boiwate, na yo malo waku malo maemae koungekoke . ³³ Bele imea einye ro mbai walobo yae aungeboke nambele nekewate kelaa kabam elaekaeisele hebeungekoke kenewoye, ³⁴ Maere waeimihi menaeijae nekeae, Yesus Nazaret na ro maere makare mokoumobondere? Weyae mekae maere houmokondere. Reyae raitaei Weyae wahinye, Weyae nene wae-wae Allah rera mekae!" ³⁵ Yesus bele walobo re ayelae heungoboke weunge, "Koko yeibo! Rake ro na ubulura etuwe. Bele walobo na ro miyae bene rake ro ane woke, na ubulura meukuke. ³⁶ Belena rowoke, iye neite-neite alate maka a makaijae ukeunge na u ubuluna ketainyeboke walobo yoni yoni hukeumihke aibaleke ekate. ³⁷ Yesus na u mekai baeke yo einye mokoubokene, rake kani-kelaa ahire-ahire Naro hureweke. (Petrus na Fau Miyae, Ro Miyae Helem Yesus Onomi Yeuwoumile) ³⁸ Yesus Sinagoge ra meukuke, Simon imaere eiwoye. Simon na miyae nenake eha naume kabansele koiwoye, belene Yesus riyainyehike onomi yemmilere. ³⁹ Yesus meke Simon na miyae nenake bokone hebeunguke nauna eha naume koiboye hukeumihike nahibi foi yeuboke, ro miyae arileweke yore rikewoumi. ⁴⁰ Huwae rai hu akoweke he Yesus bokore ehana bulona koubate yo helem-bolem yawaimiboke meubate onomire yaronatere. Yesus aunguke mere mo nau ranne, koloumiyeke foi baeyeke. ⁴¹ Walobo yoni-yoni aibaleke na ubulura, eiwate kaenate, "Weyae nehale Allah re kelu ya!" Yesus oku yae nekeumi a elenatere ahun kolowoumi., (Yesus Yo ran Yo randa Ohoweke) ⁴² Yahe heuboke mo Yesus aloungekoke namaleu maleubae anuwau mbaite eke. Ro miyae helensele baewainyele, hubainyaikondena Yesusre hun ranainyihende naere enukeijae. ⁴³ Yesus benem weumi, "Reyae Allah Na ako faeuko yoranda-yoranda hukemiyendere, bele are Reyae hukemilere mekale. ⁴⁴ Yesus naei ako-faeuko Yudea kanina sinagoge imaene kelewoumile.