JANJI UNTUK MASUK KETEMPAT PERHENTIAN ALLAH ¹ Israel romiyea Kanaan kanire ayeuboke hee ne,Allah are heteungekoke neai a wemmile huluinye nekenatena Allahre mokoungehake no yeiboi wali nibire enaisubayenggonde. Bele waneng mbai rake hee Allah eare are heteumekoke neai weumi a huluinye nekemale na, neai mokoungehake no yeiboi wali nibire emahubayenggonde pele earene mai uw nolo uw ikainya romiyea ehimbea pele wali nibira engwende pelene eai uw kaya yeale hebemale. ² Haubihine bang Musare hee na wali nekewate romiyeare, pele afoi feaufoi weibaimi waneng mbai eare no yeboi wali nibi neai afoi feau foi huwaeme peleyeare, pele yo neai uw ne eyakeiboi waneng bea nekewate, haubihine bang neyea a foi feaufoite borowate horoyea, peleyeare Allahre a elewoyere hilarabu ehalenye. ³ Eyea Allah mokoungehake wali nibi afoi feaufoi, "foite hilarabo haleande yo no yeiboi wali nibi na foi neaite isubawanne, Allahre hilarabo ehale holonayo neaite rake a waneng mea eleukoke. "Pelene rakena ikele yea rake a holo koukokale, Bele romiyea Reai mokoungehakale no yeiboi wali nibire neyea eisubaikoi hului. ⁴ Ya me hine bee neai Allahre homofea einye rake waneng moloukoke, "Mehine bee nen ja Allah kalya yoni yoni mokowoye riyau weuboke,no yeuboke." ⁵ Nawaneng naranna waneng beneng rake a moloukokale, "Bele romiyea Reai mokoungehakanale no yeiboi wali nibire neyea eisubaikoi hului." ⁶ Allah are heteumekoke hului romiyea ehi pele wali nibi hului nekanatene pele anuwaunge no enaiyende, Nawenang pele wali nibi nea afoi feau foi bere huwaimikoke borowate romiyea Allah weiboumi a huluinye ehakoiboinye pele no yeiboi wali nibi eisubaikoi. ⁷ Pelene ayea nahului no emayembonde neaite, "Beneng Allah moite haibande ralo yakama Ondofolo kabang Daudre walora a eleukoke" manaya niyea Allah yea mana ya rake a waneng eleukoke-manaya neai ako feauko boraubena, meyea kena elea uw elea okonnem mea." ⁸ Nayahina Israel romiyea neai beyun yebea Yosua Allah are heteungekoke Kanaan kani nafoi selere yaweumiboke. Bele romiyae nahale no eyeiboi wali nibi nafoi neaite hubainyeufoube yea. Beneng Allah ya ehi neai a eleikoi. ⁹ ( Peleyeare Allah yea no yeiboi neaite beneng Yahudi Ondofolo Kabang Daudre walora huwboumi) Pelene Allahre holona neaite no yeiboi wali nibire mokoungehake, ya mehineng bee nenja no yeiboi ya waneng. ¹⁰ Hinye neai Allah mokoungehake no yeiboi yeale wali nibi hului nekate yo Allah neai kalia mokowoyera no yeuboke waneng, Pele yo na wali himalainyeboke yo yea me beammile neai kalia yoni yoni mokayekera no yeaiboke. ¹¹ Pelene, mem eai uw nolo uw ikainya romiyea ehi re eai Yobe neai Allah neai eleye are hilarabo ehalei waneng mea naisong moi uwngainyonde yeale, relemande pele no yeiboi yeale yea uwbulu wabulu nelewaneng. ¹² Haubihinebang Allah neai a eleye, a wali yeale elea yeale yamiyeali be moi heneng yeale yea uw bulu wa bulu nele waneng. Allah neai eleyea kena ei uw einye nele, uw bene nekaimi yoni yoni belere uw hului koloijeumi. ¹³ Allahyea mokouboke hambung yoni yoni, mbai sambai Allahre ijoko bera enundeiboi Allah eai wali re wo emangkonde kiyea. Nabero royoinye namemene wewe molaiboke, a yakala yeaiboke. ¹⁴ Yesus Allahre kelu surgane eke nekeye kiyea rake hee eai Imam Kabangde yeuboke. Pelene romiyea ehire huwaimi waneng. Mea Allahre kelu neai eleyere nahibi hibi hila rabo halemande. ¹⁵ Haubihine bang eai Imam Kabangde yeuboke kiyea, eai male uw yambi uwre hubaungehikene, eai kou kalo elakonde are boroye. Eai waneng mbai uwmali hubawounge, peleyeare uw mekai nebang omokoiboi mo. ¹⁶ Peleyeare eai wali emangkabende hee, eare yanekoi yare yea ei emme hawende neaite, mem kendang wamerang nabumane helere kena elea hubanne yea ema. Peleyeare nekeye kiyae romiyea re kena buhea eare bang heumi.