¹ Reyae Paulus, Yesus re yebaei buhbaete yeubo kale, ro miyae yae rare eyeleiboi, Yesus, Allah here nolora waleungeboke Kiyae yae eleukeboke. ² Na wanem, aka naei baeke naei Galatia yo yamne nekaube yo, rambele nembainye Yesusre hila rabo halaennele yo. ³ Onomi honomi, kolo-kolo maemae Ako Allah rena, Yesus Kristus rena aei wali einye, ⁴ Kristus aei mokoi kabei aerene hereke, eyae wali henare ema yarondere, bele Allah Naei kenare kokoke wanem bae yeuboke. ⁵ Allah nembai sele huba bam haei bambae bumane kolomanende. ⁶ Reyae faa yae bale, meyae hasale hele Allahre nukaungeboke, Kristus yae mare wali hena ikembe, bele yaere meyae moi bulaeungeboke homo fae ehire hakaungeboke. ⁷ Naei, sele homo fae ehi uhele, beleyaere ro mbe-mba yae Kristus re akho faeuko mare pulaeyembe - wabayembe. ⁸ Belene yae, meyae, namekai malaikat yobuma- yam buma yae, homo fae ehiyae mare kelemayembena, bele ro miyae re olomo emmiroronde! ⁹ Neyae mare bulayembe - wabayembe Kristus rena afoi faeu foi, olomo yae nembebonde. ¹⁰ Menaei jae ijoko erembe, reyae ro miyae rare ei molanatele yae mokorelere, Allah Naei kenare koye mekai jae mokorelere? Raei u maenggeuw bae mokalene, reyae Allah Naei yebaei bubaeibam. ¹¹ Aka neai baeke naei, reyae kena kale meyae itayembombe, Yesus re ako-faeuko, ro miyae meyae yae emoloikoi. ¹² Ro miyae mbai jae rare eweiko-ehuweikoi, namekai rare ekeleikoi, Yesus Kristus Nenaei jae Naei ako-feuko mokoukoboke itaeyeubokale. ¹³ Meyae raei wali mekai bere nekewale mataei sele. Reyae Yahudi ro miyea, na rabo halewate, Bele he Allahre hakainyeboke holore iwe - tasi koubamaele. ¹⁴ Raei hokolo uyau nolone, Yahudi maei nibi a re, reyae ewekokale, Raei yobe naeite nibi a, me hukhum reyae itayeubokale.. ¹⁵ Bele yaere, Allah na foi rare ehayeikoi, menakere kou bulu yahi bulune nekewale hee rare eleukoboke, namekai kaeneu kekore naei buyo-ayo re itebondere ¹⁶ Allah kena keukoke raei Wali einye naei hina fa hoi fa yakalaukoboke Yahudibam ro miyae re a foi-faeu foi eremi huwende, ro miyae ehire itayaeihaba eriyei. ¹⁷ Na wanem reyae Yerusalem yore ei, ro miyae ehi na yebaei bubaei yo ehubai koi, namekai reyae Arab kanire nahibi ekale betamo beufokale Damaskus yore mekale. ¹⁸ Ralo yakama name nekekokalemo, Kefas hubayeikote Yerusalem yore ekale, na bokone ya me bee orone mehaembai nekendekoke. ¹⁹ Na yebaei-bubaei mbai ehubayeikoi hele, bele yaere ro ehi naro Yakobus, Yesus naubake mbai mo hubayendekoke. ²⁰ Allah bene reyae ahuwe roramale, rake Allah re ako faeuko molowale, amebam - karebaibam. ²¹ Beleramo reyae Siria kani re egwale, namekai Kilikia kanire ekale. ²² Beleyaere, belena ro miyae Yudea kanina Kristus re hila rabo halaete yo yae, rare onaitele. ²³ Ro miyae huwate remo anggaei borowande, "Ro mbai bere holo, Yesusre namoita ohowate yore, mehinim bam iwe-tasi kouboumi yaere, mana Yesusre hila rabo halaenale, namekai Naei wali nibi a faue yae huweumi." ²⁴ Beleneyae mana reyae meka kelaemaele rannda, Allahre buma kolainyele.