(Majus Romiyea Ralira Mekhate) ¹ Manaya Yesusre honggate Betlehem yo ne, Yudea khanine, ondofolo Herodesle he ne, eremmi, majus romiyea rali refira Yerusalem yo re mekhate. ² Mekhate hinate, "Makheinye Yahudi Ondofolo honokhate? Rahene bham, meyea na findelau rali refine erekannele nebeinye mande eise molomambondere." ³ Ondofolo Herodes nebei anggaei borokhene na uga bulinggea yea hinaugoke na Yerusalem yo na romiyea bele nemene. ⁴ Nahibi imam-imam yungre nekhate, homofea isaejo arileumihike mo hineumi Kristus makheinye honokhate. ⁵ Nebeinye wainyele, "Betlehem yo ne Yudea khanine na bemere nabi-nabi yea nebei mekhai molaikokhe. ⁶ Nebeibe weyae Betlehem Efrata Yudea khanina, weyae ebinggeng ban ya, Yudea ondofolo khose nolone waeisa ro mbai annunde Israelre Yungre nekhendere." ⁷ Nebeisa mo Herodes na maleu-maleu yea majus riana yore weumi, makhei heijae nda findelau neakokhe. ⁸ Nebeisa mo nda yore weumi, "Eme Betlehem yo re nebei Faa na mekhai nendea ma mo membe wensele reai bele erele ererembonde bhe hinerembonde." ⁹ Ondofololera a boraibokhemo alanekokhe ewate. Nane findelau nehebi neumimekhe nda faa honole ijenne yaubokhe. ¹⁰ Nda yo nebei findelau erekhainyelene rei mai khowate. ¹¹ Nebei imae eise ayeubokhe nane faa erainyele nenakhe Mariale naei me ne nekeitene raibokhate bhe hinainebokhe. Nebeisa mo na rung khangge wekhainyele na eba he yarowate kholowainyele nda faa re, nebei eba he na ro niyea, emas, kemenyan, mur. ¹² Nebeisa malaikat yea imene kheleumibokhe, benen Herodesle bokhore besoi eijae, nebeinye nibhi hi ra naei yo yangre wekhate ewate. ¹³ Majus romiyea ewatera, Tuhan naei malaikat mekhe Yusufre imene yakhangeboke weunge, "Ainyu, nebei faa kaeibo nenakhele bele Mesir re hakanggo fong. Nebeinye nekhepe reyea a ufepe mo , Herodes nebei faa re hombondere beaunge." ¹⁴ Nebeisa Yusuf aungukhe nebei faa re mo roukenge nenakhele bele Mesir re na huwea yea fokhate. ¹⁵ Nebeinye mo nekhepe Herodes herende mo Nabi-nabi yea a re homone molaikokhe hului, Allah na akho feuko, "Mesir ra reai faa khanerenggonde." ¹⁶ Nebeisa Herodes iseyeubokhe Majus romiye nare ame-ame bewabainyokokhe , ikele hanengebokhe ukeimi Betlehem fafa neai ralo yakhama be ra onde wayeu hokolo nemene haikokhe. ¹⁷ Nabi Yeremia eleukokhe huluinye yeubokhe. ¹⁸ "Rama yo ra rime a ekhaikate, Rahel naei fafa mehibe ekefolole khena foise yembondere nahukui bham." ¹⁹ Hereodes hereke hera malaikat Yusufre Mesirne uga yakhangeboke, ²⁰ weunge, "Ainyu, nebei faa bele nenakhele bele yaweimibo Israel khanire bembo nane, nebei fa re honaibondere relewainye yo heraibokhe." ²¹ Nebeinye, Yusuf angukhe nebei fa bele nenakhele bele yaweimibikhe Israel khanire beibokhe mekhate. ²² Nebeibe, borowole Arkelaus Yudea ne nekho Herodesle anuwau yeunuweiboke, Yusuf buhea hokowongene neise ei. Imera kelengebokene Galileare ekhe. ²³ Neyea ekhe yo mbai na ro Nazaret nebeinye nekewole nabi-nabi yea elaikokhe huluinye, "Nazaret Na Ro yea elenate."