Yesus Na Yobe Naei Khamahe Naei (Luk.3:23-28) ¹ Homofea Yesus na yobe naei Yesus Kristus Daudle khelu, Abrahamle khelu. ² Abrahamle khelu Ishak, Ishakle khelu Yakob, Yakoble khelu Yehuda na akha beakhe bele. ³ Yehuda na khelu Peresle Zerahle Tamar yea honoukokhe. Peresle khelu Hezron, Hezronle khelu Ram. ⁴ Ram na khelu Aminadab, Aminadab na khelu Nahason, Nahason na khelu Salmon. ⁵ Salmon na khelu Boas, Rahab yea hongge. Boas na khelu Obed, Rut yea hongge, Obed na khelu Isai. ⁶ Isai na khelu ondofolo Daud. Ondofolo Daud neai khelu Salomo, ne nakhe Uria na miyea nale ⁷ Salomo na khelu Rehabeam, Rehabeam na khelu Abia, Abia na khelu Asa. ⁸ Asa na khelu Yosafat. Yosafat na khelu Yoram. Yoram na khelu Uzia. ⁹ Uzia na khelu Yotam. Yotam na khelu Ahas. Ahas na khelu Hizkia. ¹⁰ Hizkia na khelu Manasye. Manasye na khelu Amon. Amon na khelu Yosia. ¹¹ Yosia na khelu Yekhonya na akha beakhe bele Babel yore ikilaikokhe ewate. ¹² Babel yore ikilaikokhe ewate hee, Yekhonya naei khelu Sealtiel. Sealtiel na khelu Zerubabel. ¹³ Zerubabel na khelu Abihud. Abihud na khelu Elyakim. Elyakim na khelu Azor. ¹⁴ Azor na khelu Zadok. Zadok na khelu Akhim. Akhim na khelu Eliud. ¹⁵ Eliud na khelu Eleazar. Eleazar na khelu Matan. Matan na khelu Yakub. ¹⁶ Yakub na khelu Yusuf, Maria na molo. Maria Yesus re hongge, Na Ro niyea Kristus. ¹⁷ Nda orona mena nemene Abrahamlera mekhe Daudle hene nemene me bhe orohin kheli bele neai orona mena. Daudle he ra mekhe Babelre hayaeikokhe naei orona mena me bhe orohin kheli bele. Babelra mekhe Kristusle he ne nane merau me bhe orohin kheli bele naei orona mena. ¹⁸ Yesus honokhate naei ahuba nda wanen; Nenakhe Maria Yusufle molore hinaisike, nanembainya enekheibe Maria uga bele yeubokhe Roh Kudusle ra. ¹⁹ Nebeibe Yusuf ro mbai na wali naheleremo nekhewolene, nane merau na miyea Mariale ro yakha hebewole nebeinye na maleu maleu yea Mariare nukennebonde nibi beawole. ²⁰ Nebei merau Yusuf kholowongemo, malaikat imene mekhe yakangeboke a weunge, "Yusuf, Daudle khelu, buhe hokhoijea, Maria re nendong rowei weai miyeare yeugo, nebei Roh Kudusle na faa ya. ²¹ Neyea khelube hononde, Na Ro Yesus yea roubonde naei walora wali hena enjarombe mai bekho nolora." ²² Nda nemene benate yakhanate Tuhan naei yenjo khaya yo yea a kholaikokhe huluinye. ²³ Meangge mbai na yarele emene ugabele yeubokhe, khelu bhe hononde. Na Ro niyea Immanuel yea ronai bonde, "Allah naei nembainye nekhemale." ²⁴ Yusuf khulu-khulu yeubokhe aungukhe, malaikat yea ukenge huluinye mokoubokhe, Mariare rouke naei miyeare yeubokhe. ²⁵ Nebeibe uga naei bele ehonoimo nekhewole, nahibi Maria nda khelu honokhe, Yusuf naro Yesus yea roubokhe.