¹ Nebheinye,Allah yae elembokhembe wekembhe holona akhae bhaekhe,Yesus bhele mbainye surgane nekhembere kaenengkokembe ro miyae,Yesusle naeise nou hennene.Neyae Allahle abhu akho nebhei waneng aei imam khabhang mae wo khande kiyae. ² Allahle holona yore imae a yae ahuneubhokhe.Na bhere Allah elewole a huluinye Yahudi ri miyae foi naeise Musa khalia mokhowekhe waneng mbai,Allah elele a huluinye Yesus Naei a elelere hakainye ro miyae foi naeise mokhoumi. ³ Yesus na nene waewae huluinye yeise raeibhoi emekhai bhele Musalera,rabuhine bhang imaere nuleubhokhe kiyae na yeisi raeibhoi emekhai bhele nebhei imaere aungunukhe kiyaelera. ⁴ Imae ainyuise na ro miyae bhele,nebheibhe Allah yae rambung yoni-yoni nemene mokhowole. ⁵ Musa Allahle holona yo naei yebhaei bhubhai waneng nekewole,Allah ugounge huluinye mokhowole yae bhena ya naei wali are huwewoumi. ⁶ Nebheibhe Yesus Wali Ondofolo Allahle Kelu yae mokhowoumi.Eyae khena wauwau okhoinya,nebhei waneng Allah elele a huluinye mokhondere rabho elae halemandena,eyae Allahle imae obhe niyae. ⁷ Nebheinye Allahle Roh yae nda a eleukokhe hului mokhombhe: "Nda ya,mayae Raeei akho faeuko wamalere bhoraubhena, ⁸ abhu naei arai naeite waneng mae khena elae u elae okhonnemae. Nendahina a khala-khala anuwaunge nekhewate yae,Allah umali hubhawoumi heena khena elae u elae yae nekhewatene, Allahle uwoumi a huluinye ehakhoiboi. ⁹ Nebhei anuwaunge abhu naei arai naei ralo yakhama rorele u bhee hele iwau mahi-mahi mokhowole na ijokho yae erewate hororebhe, Raei elele a huluinye mokhorele naeise umali hubawaise. ¹⁰ Nebhei aerene nda yore reyae ikhele hang khowamaelene nda yae eleukokhele: "Nebhei yo na khena einye u einye bhae wali nalaibhokhe nibhire hakhoyate nebhei waneng raeinya wali nibhi khelewamaelere isaeyeibhoi. ¹¹ Nebheinye Ra khena ikhele yae nda a holo khowamaele: "Nebhei ro miyae Raei mokhoungehakhale no yeibhoi wali nibhire eisubhaikhoi sului!"* ¹² Akha naei bhaekhe naei,maugare khayaa hebhembhe bheneng u mekhai bheko mokhomembera Wali Ondofolo Naei a elelere hila rabho ehaleinye,Allah wali bhele kiyaere moi bhulennebhombhe bhelene. ¹³ Nebheibhe eyae nammang elande,"Nda ya"yae mai u nolo u khaisahibhe mai bhekhore khena khaugere harayembe elae ame-ame yae mokhonembombe khena elae u elaebhe yembhonde bhelene,na yane bhaei a usaei wasaei maeise naeise homo mbai a mbaeinye oromembe elemembe. ¹⁴ Na bhemena Wali Ondofololena a foi faeu foi a bhorowande hee,Allah a elele huluinye mokholere hila rabho elae halaende hului nekhemalena,Yesus Wali Ondo bhele mbainye nekhemale.Yesus Wali Ondofolo bhele mbainye nekhemale. ¹⁵ Bhene nekhenayembe nda Allahle homofaena a na ranne moloukokhale mbai, "Nda ya,Raei akho faeko wamale mayae bhoraubena, khena elae u elae yae okonnemae,abhu naei arai naei yae Allah yae umali hubhawoumi heena Naei ugoumi are ehakoibhoi nekhewate waneng."* *3:11 Mazmur 95:7-11 *3:15 Mazmur 95:7-8 ¹⁶ Yo maenin nde naei Allahle akho faeuko bhorowate hororebhe,bhe elae u elae yae Allahre khowainye?Musa yae Mesir khanira yaweumibhokhe fowate ro miyae mbai niyaebhe ya! ¹⁷ Nebhei waneng yo maenin nde naei ralo yakhama rorele u bhee hele Allahre khena ikhele u ikhelere mokhowainye yo?Nebhei u mekhai bheko mokhowate ro miyae a khala-khala anuwaunge heraikoke yo! ¹⁸ Nebhei bhe elae u elaere khowate yore Allah nda a yae a holore khoukokhe,"Nebhei ro miyae Raei mokhoungehakhale no yeibhoi wali nibhire eisubhaikhoi sului?"Allah nebhei a mekhai haraungebhokhe eleukhokhe! ¹⁹ Nebheinye eyae isaeyandebhokhe nebhei yo Allah yae ugombe are hila rabho ehalei aerene,Naei mokhoungehakhe no yeibhoi wali nibhi hubhaikhoise Allah ewaeisi sele.