¹ Bhena heena rokho heleng,Allah naei khayaayo walora a faeu mekhai mahi-mahi yae eyae Yahudi ro miyae aei yobhe naei khamahe naeise Allah ugoumi. ² Nebheibhe nda hee hubha mokhoikhoi yane,Allah Na Khelule walora aere a ukeume.Na khelule naeise Allah a hokhoukokhe Na me einya honate rambung yoni-yoni Naei me einye enaisononde Kiyae,nebhei waneng Naei walora Allah nda khani khela bhele kung wau bhele mokhoubhokhe Kiyae. ³ Naei Khelu Allahle nene waewae mbai nebhei waneng Allahle u mekhai bhele nekhele.Rambung nemene fomene Na Khelu elae bhele wake bhele a elele yae hara nekheuge.Neyae Ro miyae naei bheko bhako faeinyemmibhonde naei nibhi mokhoubhokhera Allah surgana nene waewae bhele kiyae Na meuge refine eungeweubhokhe. ⁴ Nebheibhe Allah yae Naei Khelu yae roungebhokhene,Bhuyo Ayo yoni-yoni yae ehameikoi sului. ⁵ Rokho mbai Allah yae Na Puyo Ayo nda waneng mae ewei mo, "Weyae Raei Khelu. Mana ya yae Reyae waei Akho helere yeubhokhale."* Nebhei waneng Ayo Bhuyo naeise nda mekhai yae a eleikoi, "Reyae naei Akhore enjembonde ."* )*1:5a Mazmur 2:7 *1:5b 2 Samuel 7:14 ⁶ Nebhei waneng Allah Na Khelu Hina Fa Hoi Fa nda khani khelare yakhaumibhokhe hee,Allah nda mekai yae eleukokhe, "Allahle Ayo Bhuyo nemene Nare ei molonainyele hele". ⁷ Nda mekhai jae Allah eleukokhe na Ayo Bhuyo yoni-yonire, "Naei khaliare mokhate Ayo Bhuyo yoni-yonire mokhommile elu mbai yo bhele i faeu bhelere inyaibhonde."* *1:6 Ulangan 32:43 *1:7 Mazmur 104:4 ⁸ Nebheibe Allah Na hina Fa Hoi Fa Naei a nda mekhai yae eleukokhe:"Allah, waei kendan wameran hubha bhng haei bhang hononende, na ijeng mae ro miyaere me eumimokhonde. ⁹ Weyae u mekhai na ijengde harayainye yore bhuhae heimeyamae nebhei waneng me bheko u bhekore mokhate yore ikhele yae khoimeyamae. Nebhei aerene minyak*Waei yung ranne rileubhokhe yae Allah Waei kahili wafeu nekhatera Ware anuwau bhumane raneujekhete nebhei waneng reimai sele mokhowote."* ¹⁰ Nebhei waneng Allah a eleukokhe,"Weyae Tuhan na bheme fomere nda khani khela bhele yakhu bhele Waei me yae u yae mokhoubhokhae. ¹¹ Nebhei yoni-yoni mokhowoyae nanemene malo male waneng menayembonde bheko bhenate,nebheibhe Weyae Tuhan mahire eyeibhoi nekhewende. ¹² Nda khani khela malo male waneng mae Weyae oleungekhonde, neme bheungekhonde hononende.Nebheibhe Weyae mahire eyeibhoi nebhei waneng Waei ralo yakhama hubha bhang haei bhang."* ¹³ Allah mbaise Allah yae nda waneng mae eleikhoi, "Weyae Raei meubhe reufina ro bhele anuwaunge meinyuweibo mende Reyae Waei yokheijo yoni-yoni bheko mokhoremibhonde Waei oro hensen anuwau waneng mae enaijembonde."* ¹⁴ Nebhei Allah na bhuyo ayo khaliare mokhate roh yoni-yoni,nebhei waneng wali hena bhona enaiyaronde yore eise haungaimile naeise Allah ukheumi.