Kabung iti nggano nemot go mam nembu-ey

¹ . Simso Timna no klong nggano Filistin kaguit gemang ikum. ² . Yap no tandali weng gono gemang nawon nglangin ey unen ey: “ Timna no genam Filistin kaguit gemang ikum genam nogo ya iti at go senun so lemoy genang.” ³ . No Nglangin ey unen ey gemang pen nemot nogo: “no imotnang go tang ba nogo kabung-a yakwa ikum go iti no mot lo teba dali dia sip sik sogo kabung sedue Filistin sik sogo ngga sikabung sunat kwa semu go? No way sogo Simson lo gemang pen nawon nglangin nogo: “ iti-a nemot-a genam nemot sogo naklai sogo mo duing.” ⁴ . No nglangin ey unen ey kwa senong ngga naklai Kiwali Iram sik sogo weng go: ngga tang sogo Simson tatuik semu genang Sedue Filistin nang ey ku ngga nemot nogo sedue Filistin lo sedue Israel kuno gluik go. ⁵ . Nggano Simson kerlam sogo gemang klong nemot aya ey mia ey Timna nogo. Maning anggul usu nang no pung go Timna no menai Singa ngout sogo gemang weng Simson sono wake y gemang klung. ⁶ . Ku ngganemot nogo Kiwali Waglo lo nemot bano suing go nemot lo menai Singa but go wok menai kambing nok kalik ta ule sogo no nemot lo kwa pen nemot go aya mia nogo ey taibat ngga plok go. ⁷ . Nggano nemot gemang klong ngga sono kabung ngga ey nembut gemang pen Simson naklai nemot so mo duing. ⁸ . Ngga blo idi no nemot tandali gemang klong ngga sono kabung ngga ey klai so suing genang; nggano tap idi lo pay go klong gono gemang ikum son tigin menai singa temoi nogo semu go madu ey gemang. ⁹ . Nemot go talo wok go gemang iti go glong tap blo lo gemang temung gemang dam natun ngga ey klong go aya mia ey nogo gemang iti go dam no nemot lo kwa pen nemotnang nogo madu ngga menai singa kebong go don long ba so iti go. ¹⁰ . Nemot go nglangin gemang klong kabung ngga sono nggano Simson ten dam bu drop gemang semu ngga sono ngganemot kalik nemotnang go ngout kaguit ko mlay. ¹¹ . Nggano nemotnang nemot ikum go tang sogo 30 sedue gemang ikum go nemot ey suing genang. ¹² . Simson lo nemotnang sono gemang pen: “genam mam nembut ngge motnang no pen sogo no nandolo way nembut nemot go seni suey so pen go ku 7 yam so ngge bano ten dam budrop ngge semu suey so mo pen mo genam lo 30 amkeba lenan suey ey 30 amkeba kangok ey. ¹³ . No motnang lo suey so wa pen mo genam nogo no motnang lo genam nogo se iti 30 amkeba ngge ba kok genang ey 30 amkeba kangok ey:” pen-a mot gomam nembut ngga gena mya tup eyun.” ¹⁴ . Nggano nemot lo gemang pen nemot nogo: “Ten dam sik sogo ten pung, don ey sik sogo tom ey pung go.” Ku nangglik so nemotnang lo duing go mam nembut ngga nemot go seni kwa tegu ¹⁵ . Ku 7 no degut go nemotnang gemang pen Simson go senun nogo: “mot go kinin ey mlue nemot lo mot no mea pen mam nembut ngga nemot go seni; kwa go imot nang lo mot go aya go ya p mot ey naklai mea put koy lo. No motnang genamnang pu go weng ngge sono genam nang go drang kwa genang sogo ya bung? Ngga sogo kwa?” ¹⁶ . Nggano Simson go senun U gemang kluo Simsom tegwout gemang pen: “Mot genam nogo dabui piam to nggaey dabui klum kwa; mam nembut pen to at go sedue kabung nogo no nemot go seni genam nogo kwa pen ne.” nemot lo pu go: “genam go aya ey mia ey nogo genam kwa pen no sogo tang lo mot sono gena mya pen?” ¹⁷ . No nemot go senun lo u klo go ku 7 yamso nemotnang lo ten dam bu drop semu gono nggano ku 7 no nemot lo gemang pen senun no, nemot lo u senang so kuklo go tang so nggani kabung ngga lo gemang pen mam nembut go seni nemot go saula nogo. ¹⁸ . Nggano ku 7 woi maning kwa sut gano sedue nang yakena dega lo gemang pen nemot nogo:” sogo-a naklai tom dega seni madu sik sogo? Sogo-a don naklai kangok menai singa lo go?” nemot lo gemang pen nemotnang nogo: “motnang lo genam go menai lembu unen lo nan kwa kop go motnang yakwa senong genam go mam nembut go seni.” ¹⁹ . Nggano Kiwali Waglo nemot ba nogo li go ngga ey gemang klong Askelon nogo 30 sedue nggano but go nemot nang go amkeba kangok ngga iti go ngga ey gemang wasei sing sedue mam nembut go seni pen go no gemang iti. No dabu koy maning blon nggaey gemang klong nemot go aya go yap no. ²⁰ . Nggano Simson senun ngga gemang iti nemot go andua meno bekas pegiringnya