¹ Genam no Woy Wali Iram lo pu go: "Demusamklik kangok go-a klaya se iti! Ngga ey, nemot blo no sam se klik nalo: Maher-Syalal Hash-Bas." ² Yang nggano, sedue namon kunala suey go-a at lo gemang usi, yangga woy Uria ey Yerebekhya go danon Zakharia ey. ³ Ngga blo idi lo, at genam go kabung ey srek go. Kabung duo iti go, duo sedue denok gemang tui. Ngga ey, genam no Woy Wali Iram lo gemang pu: "Nemot go sui: Maher-Syalal Hash-Bas, ⁴ seni so duo ngga, Mia! Aya! uusi maning kua senong gono, Damsik go taut nggano Samaria sik sogo guik go taut ey, Asyur go deguena go nemuku sono king go mea klong." ⁵ tandali genam sono Woy Wali Iram Nemot go nebut gemang pung: ⁶ "Syiolah butuo tuso-tuigo so koklong go Saula tang ngge tenguo butuo Syiloah bu, nggano, Rezin nogo dabui mo kua duo Remalya nogo ey, ⁷ ngga, seni so, Woy Dem lo mea semu, Efrat butuo budon kangok dega go, bulatang nemotnang blo no mea klak. Yangga, Asyur go deguena ey nemot go blong naklay eygo. Bulatang ngga klak go, nemot go butap-butap bu ba no mea gigit, nggano meduim-tablang naklay bu ngga lo mea kenok, ⁸ Yehuda ba sono go ey togut go naklay degut mea, blindon yam logo kalik buklak go. Ngga lo mot go nan ngge blo nogo tabang dali-dali kik go naklay, mea kidik, yang Imanuel!" ⁹ Ey saula-saula se senong. Nggano, saduibuong ey se pling, se ikum, yang kukunan blo naklay, kuibey se kekeduik-lak, nggano saduibong se pling! ¹⁰ Motnang, atuia se semu, no, meakua lemoy dali; yaluim go motnang lo pu go, no, meakua lemoy dali, seni so Ki Wali Iram-a atnang ey mea susuing! ¹¹ Yang, Nemot go ta genam no tui gono, ngge kalik so genam no, Woy Wali Iram lo pu go, nggano Nemot lo genam no pen go ku no, saulakuon ngge go wali piam gono genam keng eygo so: ¹² "Saula tang ngge iyaluim gono pu go, nemotnang lo pu go nebut ngga kua pepen. Nggano, nemotnang lo sogo-sogo no suali go nogo, mot suali kua tra, ngga ikum go nogo mot bubuong ey kua king. ¹³ No, Woy Wali Iram Ki Wali Kumam, Nemot-a motnang lo se yang, Teguop go kon kua go gemang. Nemot seguong nogo-a se suali, nggano bubuong eygo se king. ¹⁴ Konkuago sip Nemot lo mea semu, no, mea semu demu dali kluing-sing go, nggano Israel tang namon ngganemot nogo masikling genang demu mea semu, tegan nemotnang keduik genang mea semu, nggano Yerusalem so susuing go sedue kabung nogo sado dali mea mon dali. ¹⁵ Nggano, nemotnang sik sogo mata so masi dak go mea pui, pui go ngga kuo kangok, nemotnang mlak gono dok go mea king go klong ukuman no." ¹⁶ Nebut pen ngge, genam lo suey so se tui, nggano, sesenong ngge genam go denok nguok go meteray genang. ¹⁷ Nggano, Woy Wali Iram Nemot go nebuemnemu Yakob go duo-yap sik sogo mo son go ngga-a genam lo mea bubung. Nemot-a, genam lo mea bubung. ¹⁸ Seni so, genam no Woy Wali Iram iti go duo-yap ngga genam nogo tasam ey sui eygo Woy Wali Iram Ki Wali Kumam sedue Israel ey susuing go meduim Sion so susuing. ¹⁹ Nggano, nagono seduekabung lo mot no pu go: "Klong-a, seduelap ey blue eygo kunala sedue no tang-klong usi, nebutseglup so pepen go, nggano lom menop so pepen go sono! No, mot lo se pu: "No, saulatang, nemot go ida nogo tang usi go yakua pen? Kua go, sedue kebong go sik so nemotnang kunala usi go ya wadong? Maning wali sogo sedue nogo yakua?" ²⁰ "Sesenong ey wali bano lemoy go eygo-a se wet!" Nebutpen ngga ey kerlam go-a, nando lo kua pepen go, nemot nogo wadikua go woy meakua klak. ²¹ Nan ngganemot blo lo nemotnang mea klong-weng, tenkua goso, taut kua go, nggano nagono nemotnang tentra go, nemotnang mea kayang waklo ey piam mea pu, nemot go wengkabui ey nemonang go Ki Wali Iram eygo nogo. Nemotnang susu teguik ut sono mea, ²² ngga ey, nan sono mea yalap, ngga seni so, diding ba logo-a, nggano kuklik, kusena golo dok go, nggano, kukuim lo ketok go ba sono nemotnang mea betep.